मूक चेलाकू 24:14 - Korwa Bible

¹⁴ मनदो ईंग नाःआ कता आम मड़ंगरेयिंग मनाव जुवाःतना, ईंग ईसूराः दूर इया, मोसेसराः नियमकून अरू भगवानराः बड़रा कता होड़कूराः कागदकूनरे ओजाःतो इदा हना जमाकून ईंग बिसवास घड़ीन अलेरिकुःआ खुटिपरिया होड़कूरीग भगवानिंग जागतना। नाःआ दूररिकुःआ होड़कू बदीरे नँकुःआ होड़कू गारबारतेःआ गउदा माःआनकू कतावातना।

मूक चेलाकू 24:14 Referans Kwoze

मूक चेलाकू 9:2

हनालगा हाँय मूक पुजउरी एचेरे सेनेडखने कतातेड, “दिमसकूसराः अरजी ओड़ाःरिकुःआ हातपात होड़कू लगा मीटोंग चिठी ओजाःकेडखन ईंगमे एमेवा जेमहा, हना सहररे ईसू एचेरे बिसवासकेडखन हना दूररेकू सेनता हँकुःआ होड़कू, मरदकू अरू अइमीकू साबकेडखन तोल रहावकेडकूखन एरुसलेम अगींग एचे कुदा अवेकू।”

रूमी 3:21

मनदो नुँहू भगवान आँयगराः ओंगोल इया बेगर गारबार होड़कूय बड़ाँवबू लगा, अनँयगराः दूर अबूय एचे उदुःवाता। अरू ननानाः कताकून भगवानराः बड़रा कता होड़कूराः कगदकूनरे अरू मोसेसराः नियमकूनरे हों उदुःवाबूता। मनदो अबू हना नियमकून मनाः लगाबू कुरनिसगे अते, बेगर गारबार होड़कू ओरोबू बड़ाँवनेना।

मूक चेलाकू 28:23

दो हँकू हाँय सुदा बुतुड़ु लगा मीटोंग दिनकू तोल दोहोतेरा। अरू हना दिन पउलूस दोहोना हना ओड़ाःरे, मुरुक होड़कू जुमावनेना। निंदावा अते सिंगाड़ वरी, हाँय भगवानराः बड़रा कता होड़ मोसेसराः नियमकून, अरू भगवानराः बड़रा कता होड़कू ओजाःतेरा एटाः कागदकूनते, ईसू मसीराः बदीरे एचे सुदीकू घड़ीन, भगवानराः राइज बदीरे हिदइते उदुःवातेडकुःआ।

मूक चेलाकू 3:13

इबराहीमरीग भगवान अरू इसहाकरीग भगवान अरू एकूबरीग भगवान अरू अबूरिकुःआ जमा खुटिपरिया होड़कूरीग भगवान, आँयग सेवकिया ईसूय मान मरजइतकेरा। अपे इसराएल होड़कू ईसू ञेड एंडागेय लगा रूमी देसरीग मरंग हातपात होड़ पिलातूस एचेरेपे जिमातिरिया अरू हाँय ईसूय एचे अड़ाःगेय लगाय ओंगोलतेरा, मनदो अपे हाँय मड़ंगरे ईसूपे आड-बेकारवातिरिया।

मूक चेलाकू 26:22

मनदो भगवान नुँहू वरी ईंगे बनसावकिडिंगा, अरू मरंग मरंग होड़कू अरू लचार होड़कू एचेरे हों हिदइतिंग उदुःगेतना। भगवानराः बड़रा कता होड़कू अरू मोसेस होंकू कता उदुःतेरा हना अड़ाःकेडखन कहिसाः मेरिंग कतायतना।

मूक चेलाकू 24:5

अले नाँयग होड़ सिकिसता एमे होड़ अरू चउंदीसरिकुःआ जमा एहूदाकू बहकावतोले ञेलकिरिया अरू नाँय नासरी ञावराः गारबारतेःआ गउदारीग अगुवा होड़ हवे।

2 तिमुतियूस 1:3

दो ने तिमुतियूस, दिन रइत उहियार घड़ीन आम लगायिंग अरजीतान मेला, ईंगरिकुःआ अपुयिंग ततायिंगकू इया सुद इंदरीतेयिंग जागगेयता हाँयग भगवानिंग धनियाबादगेयतना।

मूक चेलाकू 26:27

ने अगरिपा राजा, आम भगवानराः बड़रा कता होड़कू एचेरेम बिसवासगेतना जा? हाव! ईंग सुनुदीयतना आम बिसवासगेता।”

उदुःतो कताकून 19:10

हनते ईंग हाँय जाग लगा हाँयराः काट कुटीरेयिंग तबेरनेना। मनदो हाँय ईंग एचेरेय कतातेड, “नाःआ इया अलोम एचेय। आम अरू एटाः बिसवासी होड़कू इया, ईंग हों ईसूरीग सेवकिया हवे। आम इया ईंग हों ईसूराः हिदइतिंग उदुःता। अरू भगवानराः बड़रा कता होड़कू हों ईसूराः हिदइतकू उदुःता। हनालगा भनगवानमे जाग।”

1 पतरस 1:11

मसीराः सुद बिरुवाते हँकुःआ होड़कू, मसी करा उड़ी कटसियाय सहावता अरू हना तयोमरे भगवान हाँय करा उड़ीय मान मरजइतगेयता, हना बदीरे मड़ंगरेकू कता उदुःतेरा। हनालगा भगवानराः बड़रा कता होड़कू, नाःआ जमाकून करा इया होयाःता अरू तुमिस होयाःता, हना सुदीगे लगा मुरुककू कुरनिस सोतेडा।

तितूस 3:10

तोनोंगीग हिगार हटिंगीग होड़ इदान होले, मी बार तुरहा सेताव सोयमे। हना तयोमते हों हाँय हनन उड़ीय एचे दो, हाँय अते तोरेम दोहोन।

गलातिया 5:20

मुरती पुजा अरू पंगाड़ होड़ेंग, हिनइस-बिनइस अरू कड़ीग, अंदून अरू रिसकट, अनँयग आँयग नफानराः ओंगोल, हिगार हटिंगगुः अरू बेलूर गुटगुः,

1 कुरिंती 11:19

अपे तलारे बेगराव हटिंग मेर होयाः दो करा इयापे सुदी अवेय, भगवानराः ओंगोलरे सताय होड़कू इये इये इदानलेःआ, माःआन?

मूक चेलाकू 26:6

अरू भगवान अलेरिकुःआ खुटिपरिया होड़कू एचेरेय जबानतेरा हना असराराः बदीरे नुँहू ईंगकू फड़ियाव लगा नंडायिंग चड़ाँकिया।

मूक चेलाकू 24:22

हनते ईसूराः दूररिकुःआ होड़कू बदीरे नपाये सुदीया हाँयग पेलिकस अनँयगराः फड़ियाव रोंकावतेडखने कताया, “सइनाकूरीग मरंग हातपात होड़ लुसियास वेग दो आमराः नाःआ कतायिंग फड़ियावगोडता।”

मूक चेलाकू 22:14

हनते हनानियाह ईंग एचेरे अरूय कतातेड, अबूरिकुःआ खुटिपरिया होड़कूरीग भगवान आँयगराः ओंगोलमे सुदी लगा अरू आँयगरीग सुद होड़मे ञेल लगा अरू हाँयराः आहते आँयगराः बड़राम अयूम लगा आमे सुनावकेडमेःआ।

मूक चेलाकू 19:9

मनदो हँकुःआ होड़कू अते अदोम होड़कूराः जीव केटेगयानखन हँकू मेरकू बिसवासगाड अरू ईसूराः दूर बदीरे ओपता घड़ीन होड़कू एचेरेकू कता उदुःतेरा। हनालगा पउलूस अरजी ओड़ाः सेन लगाय अड़ाःगोतेड अरू बिसवासी होड़कू हाँय सुदा गोःतेडखन तरनूसराः चेड ओड़ाःरे सगर दिनकू कता होड़ेंगगोड ञवना।

मूक चेलाकू 13:15

दो भगवानराः नियमकून अरू भगवानराः बड़रा कता होड़कूराः कागद अते बछावनेनखन तयोमरे हना अरजी ओड़ाःरिकुःआ हातपात होड़कू हँकिन एचेरे मी होड़ होड़तेकू एचे होंबोरतेडकिना, “ने वपक बोपोहकिन, नँकुःआ होड़कू कता-बहालकू लगा अबा एचेरे तोनोंगाः बड़रा कता लगा इदान दोबा कताय।”

मूक चेलाकू 10:43

हाँय बदीरे भगवानराः बड़रा कता होड़कू जमाकू कता उदुःगेता, तोनोंगीग होड़ हाँय एचेरेय बिसवासगे दो हाँयराः ञावते हाँयग होड़राः कसूर भगवान बराव एंडागोडता।”

मूक चेलाकू 7:32

ईंग आमरिकुःआ खुटिपरिया होड़कूरीग भगवान हवे; इबराहीमरीग, इसहाकरीग अरू एकूबरीग भगवान। दो मोसेस बोतोरतेय कलपाःआ अरू हाँय हना अगी ञेल लगा मेरेय डीड़ अवेगाड।

मूक चेलाकू 5:30

अपे कुरूसरेपे एचे ठोंकाव गोएगतिरिया, हाँयग ईसू गोएगतो होड़कू अते, अबू खुटिपरियारिकुःआ होड़कूरीग भगवान जियाव रेमकिरिया।

एहुना 1:45

दो पिलिपूस, नतनएल सुदा जुमावनेनखन हाँय एचेरेय कतातेरा, “भगवानराः नियम कागदरे मोसेस अरू भगवानराः बड़रा कता होड़कू इये बदीरेकू ओजाःतेरा, हाँयग होड़ सुदाले जुमावनेना। अरू हनाँय हवे नसरत सहररीग उसूपरीग बेटात ईसू।”

लूका 24:44

तयोमरे हाँय हँकू एचेरेय कताया, “ईंग अपे सुदा दोहोन मेलायिंग कतातेरा, मोसेसराः नियम कागदरे, भगवानराः बड़रा कता होड़कूराः कागदरे अरू सेरेंगकून कागदरे ईंग बदीरे ओजाःतो इदा, हना जमा कता हनन इया होनोयाः इदा।”

लूका 24:27

हनते भगवानराः कागदरे मोसेस अरू एटाः जमा भगवानराः बड़रा कता होड़कू ओजाःकेरा हनाते अनँयग बदीरे ओजाःतो दोहोना हना जमा ईसू हँकिने कता समझावतेडकिना।

लूका 16:29

दो इबराहीम हाँय एचेरेय कतातेरा, हँकू लगा मोसेस अरू भगवानराः बड़रा कता होड़कूराः सरवन इदा। हना हँकूके अअयूम इदा।

लूका 16:16

मोसेसराः नियम अरू भगवानराः बड़रा कता होड़कूराः कता, बतिसमा एमेयीग होड़ एहुना वरीकू पपरसारा। अरू हनानाः बेला वरीते भगवानराः राइजराः नपाय सरवनकू परसार अअगूतना। अरू जमा होड़कू भगवानराः राइजरे रेनहा-पेलहाकू बोलता।

लूका 1:70

हाँय आयँगराः बड़राकू कताःआ हँकुःआ सुद होड़कूते परिया जूग वरीतेय कता उदुःतेरा हना जबान इया,

मती ओजाःतेरा भगवानराः नपाय सरवन 22:40

जमा नियमकूनरे अरू भगवानराः बड़रा कता होड़कूराः कगदकूनरे नाःआ बनर हुकुमकून मइद इदा।”

मती ओजाःतेरा भगवानराः नपाय सरवन 10:32

हनते ईसू अरूय कताया, “अपे ईंगपे अयूम! तोनोंगीग होड़, होड़कू मड़ंगरे ईंगे मान मरजइत दो, ईंग हों सेरमो देसरीग अपांग भगवान मड़ंगरे हाँयग होड़िंग मान मरजइतगेयता।

मती ओजाःतेरा भगवानराः नपाय सरवन 7:12

दो जेहो सकालाः एटाः होड़कूते अपे चहाःतना हनन इया हँकू सुदापे एचेय। मोसेस एमेतेरा हना नियमकूनरे अरू भगवानराः बड़रा कता होड़कूराः कागदरे ननानाः कता इदा।

मूक चेलाकू 19:23

दो हनानाः दिनरे ईसूराः दूरकू साबा हँकुःआ होड़कू लगा मुरुक संताव होयानेना।

मूक चेलाकू 15:5

दो मड़ंगरे फरीसी होड़कूरिकुःआ गउदारेकू दोहोना हँकुःआ बिसवासी होड़कू अते अदोम होड़कू कताया, बेगर एहूदाकू बिसवासरे वेग लगा इदान दो हँकू मड़ंगरे एचे खतनान लगा इदा अरू मोसेस एमेतेरा हना जमा नियमकून हँकू मनावगे लगा इदा, माःआन।

मूक चेलाकू 25:8

हनते पउलूस कता कुदातेरा, “ईंग एहूदाकूराः नियम बदीरे सहे भगवानराः ओड़ाः बदीरे सहे कइसर मरंग राजा बदीरे ईंग तोनोंगाः मेरिंग कसूरगरा।”

मूक चेलाकू 26:4

ईंगराः लूर-नेवन ईंगराः देसरे अरू एरुसलेम सहररे लनँइग वरीते करा इयायिंग दोहोना हना जमा एहूदाकू सुसुदीतना।

मूक चेलाकू 28:22

अले सुदीयतना नाःआ गारबारतेःआ गउदारिकुःआ होड़कू बदीरे जमा ततेररिकुःआ होड़कू मिरिस-मिरिसता। मनदो नँकुःआ होड़कू बदीरे आम एचेरे चिला ओंगोल इदा, हना आम अते अयुमे लगाले चहाःतना।”

रूमी 1:9

जमा बेला अपे उहियारकेडपेखनिंग अरजीगोड ञवनतना माःआन भनगवान हमा ईंगरीग हिदइतदार हवे। अरू हनाँयग भगवानरीग बेटात ईसू मसीराः नपाय सरवन परसार घड़ीन मिनी जीवतेयिंग सेवायतना।