2 तिसलूनिका 2:16 - Korwa Bible

¹⁶ दो अबूय दुलारकेरा, अरू मयावाडबूखन सगर सइट लगा अबू जीवे हड़ियड़गोतेडा, अरू नपाय असराय एमेकेरा अबूरीग अपांग भगवान अरू परबू इनीसू मसी,

2 तिसलूनिका 2:16 Referans Kwoze

एहुना 3:16

“भगवान चउंदीसरिकुःआ होड़कू सुदा मुरुक दुलारकेडखन अनँयगरीग मिनीटोंग बेटाते एमेगोतेड, जेमहा हाँय एचेरेकू बिसवासगे हँकुःआ होड़कू अहाकू लायगुः, मनदो ओरो टुटीगनेना हना जीवकू पवाः।

तितूस 1:2

अरू कहियो मेरेय लबराता हाँयग भगवान मुनुरुक जूग परियारेय जबानतेरा ओरो टुटीगनेना हना जीव लगाकू असरागे।

1 तिसलूनिका 3:11

अपे एचेरे सेन बदीरे अबूरीग अपांग भगवान अरू परबू ईसू अगुवाइवाले लगाले अरजीतना।

उदुःतो कताकून 1:5

अरू ईसू मसी हों अपे मयावाडपेखन सलसत एमेवापे लगायिंग अरजीतना। हाँय बिसवासगेयीग दोहोकियानखन होड़कू एचेरे सताय भगवाने उदुःवातेडकुःआ। हाँय गोएगनेनखन जियाव रेमतो होड़कू अते मड़ंगीगे दोहोना अरू चउंदीसरिकुःआ जमा राजाकूरीग मनारंग राजा हवे। ईसू अबूय दुलारकेडबुःआ अरू कुरूसरे अनँयग बलंगीय तूतेड अते हाँय अबू कसूरराः बोझातेय अजइतकेडबुःआ।

कुलूसी 1:23

मनदो मसीरे अपेराः बिसवास निठा अरू बनड़ियाड़गोड ञवन लगा इदा। अरू नपाय सरवनतेपे पवावकिया, हना असरा अपे अहापे अड़गे। अपे अयूमकेरा हनानाः नपाय सरवन चउंदीसरिकुःआ मुरुक होड़कू होंकू अयूमकेरा। अरू ईंग पउलूस ननानाः सरवन परसारगे लगा भगवानरीग सेवकिया होड़िंग बड़ाँवनेना।

इपीसी 5:25

ने हेपेरेलकू, मसी अनँयग आँयगते गुजुः लगा जिमानेनखन कलसियाय अलार-दुलारकेरा, हनन इया अपे अँननपेरिकुःआ एपेराकूपे अलार-दुलार।

इपीसी 5:2

ईसू मसी अबू दुलारकेडखन अनँयग जीव अबू लगा भगवान मड़ंगरे मुरुक नपाय महकराः बलिदान इयाय जिमातेरा। हननलगा अपे अँननपे दुलार होड़ेंगगोड ञवन।

रूमी 5:8

मनदो भगवान अनँयग दुलार नाःआ इयाय उदुःतेरा, अबू कनासूर कसूररेबू दोहोन मेला, मसी अबू लगाय गोएगनेना।

रूमी 4:16

दो नियम इया सलाः लगाकू कुरनिसगेता हँकुःआ होड़कू कोवान, मनदो इबराहीम इया भगवान एचेरेकू बिसवासगेता हँकुःआ होड़कू भगवानराः जबानकू पवाःता। नाःआ जबान भगवान एचेरे बिसवासगे अते इमान इया इबराहीमरिकुःआ जमा नइड़-बाँस होड़कू होंकू पवाःता।

रूमी 4:4

तोनोंगीग होड़राः बुता बनी, इमान इया मेरकू एमेवायता। मनदो बुतातेराय हनाते हाँय हना बनीय पवाःता।

मूक चेलाकू 18:27

अपोलोस अकाया छतर सेन लगाय ओंगलेःआ दो इपीसी सहररिकुःआ बिसवासी होड़कू हाँयकू कता बहालगोतेडीग अरू अकायारिकुःआ बिसवासी होड़कू हाँयकू नेत-नेवारगेय लगा चिठीकू ओजाः इदीतेरा। हाँय हंडाय सोदोरनेना दो भगवानराः मयातेकू बिसवासतेरा हँकुःआ अकाया छतररिकुःआ बिसवासी होड़कू लगा मुरुक संघरा होयानेना।

मूक चेलाकू 15:11

दो अबू बिसवासगेतना हँकुःआ होड़कू भगवान सडावकेडकुःआ, हनन इया अबूरीग परबू ईसूराः मयाते भगवान अबू होंय सडावकेरा।”

एहुना 16:22

हनन इया नुँहू अपे उसियाड़ीकिया, मनदो अपे सुदा अरूयिंग जुमाःता अरू अपेराः जीव बहाल जुवाःता। नाःआ बहाल तोनोंगीग अपे अते ओरोकू चलाः अवेतेरा।

एहुना 15:13

तोनोंगीग होड़ अनँयग सउंगताकू लगा जीवे एमे दो नाःआ अते मरंग दुलार तोनोंगीगराः कोवानेःआ।

एहुना 15:9

अपांग ईंगे दुलारकेरा हनन इया अपे होयिंग दुलारकेडपेःआ। हनालगा अपे ईंग सुदा मिनीपे दोहोन अरू अपे ईंगपे अलार-दुलारगोड ञवन।

एहुना 13:1

पसहा परोब बुँहड़ीन अते मड़ंग ईसू सुदीगोतेडे, नाःआ चउंदीस अड़ाःकेडखन ईंग अपांग एचेरे सेन लगा बेला निचकाःतना। अरू चउंदीसरे इदानकुःआ आँयग निकता होड़कू हाँय मुरुके दुलारकेडकुःआ अरू हनन इया हँकू सगर सइटे दुलारकूता।

एहुना 4:14

मनदो ईंग एमेयता, हना दाः तोनोंगीग ञूय दो हाँय सगर सइट जूग वरी ततंगतो ओरोय दोहोनेना। सनातायरे, ईंग हाँयिंग एमेवाता, हना दाः हाँयराः इंदरीरे दाः सूती इया तू ञवनता अरू हना दाः हाँय ओरो टुटीगनेना हना जीव अगी गोःयायता।”

लूका 16:25

दो इबराहीम कतातेरा, ने बेटा, आम चउंदीसरे मुरुक नपाय नपाय जिनिसमे पवावनेना। अरू लाजर आम इया मेरेय पवावगान। मनदो नुँहू हाँय सलसतरे इदानिया अरू आम पीरारेम तड़पाःतना।

उदुःतो कताकून 22:5

हंडा कहियो ओरो अयूबनेना। परबू भगवान हँकू मरसले एमेवाकूता। हनालगा हँकूके ढिबरी अरू बेर, मरसल एमे लगा ओरो दोहोनेना। अरू हँकुःआ सेवकियाकू सगर सइट लगा राजाकू इयाकू राइजगेता।

उदुःतो कताकून 3:9

अपे ईंगपे अयूम! अदोम होड़कू भगवानरिकुःआ होड़कू ना लवे। मनदो अँनकू लबराकियानखनकू कतनता, अले भगवानरिकुःआ होड़कू हवे, माःआन। हँकू कलउराः गउदारिकुःआ होड़कू हवे। ञेलपे, ईंग हँकू अपे मड़ंगरेयिंग अगुकूता अरू अपेराः काट कुटीरेकू उकुड़ोमगुःता। हनते हँकू सुदीगोडता, ईंग अपेयिंग दुलारता।

1 एहुना 3:16

ईसू मसी अबू लगाय गोएगनेना अरू अबूय एचे उदुःवाडा करा इया होड़कू अलार-दुलाररे दोहोन इदा। हनन इया अबूरिकुःआ बिसवास वपक बोपोहकू लगा अबू हों अबूराः जीव एएमे इदा।

इबरानी 7:19

हना अते, हना नियमकू चलाः एंडागोतेड। मनदो नुँहू हना नियम बदलारे मीटोंग अरू नाय नपाय असरा रेःएयना, जेमहा अबू भगवान एचेरेबू सेने अवेन।

तितूस 2:13

अरू अबूरीग मरंग भगवान अरू सडावदार ईसू मसी मान मरजइत सुदा चउंदीसरेय कुदा वेगता हना दिन लगा बहालते असरा घड़ीनबू टकागोड ञवनतना।

कुलूसी 1:5

दो भगवान अपे लगा सेरमो रइजरेय दोहोकेरा, हना नपाय जीव जहन लगापे असरागोड ञवनतना। नाःआ असरा बदीरे भगवानराः सताय नपाय सरवनतेपे अयूमकेरा।

रूमी 1:7

रूमी सहररे भगवान दुलारकूता अरू अनँयगरिकुःआ सुद होड़कू होयाः लगाय एटाःकेडकुःआ हँकुःआ जमा बिसवासी होड़कू लगा नाःआ चिठीयिंग ओजाःगेतना। अबूरीग अपांग भगवान अरू परबू ईसू मसी, अपेकिन मयावा लगा, अरू सलसतरेकिन दोहो ओवापे।

2 तिसलूनिका 2:13

ने अजी बोपोहकूतिंग, सुद बिरुवाराः बुताते अपेराः जीव सुदयना अते, अरू परबू ईसू मसीराः सताय सरवनरेपे बिसवासगेतान अते, भगवान अपे मड़ंगाः जोःओ इयाय सडावकेडपेःआ। हनालगा अपेय दुलारपेतना हाँयग भगवान एचेरे, अले अपे बदीरे जमा बेलाले जागगोड ञवन लगा इदा।

1 तिसलूनिका 1:3

अरू अपे बदीरे, हँकू ईसू एचेरेकू बिसवासकेडखन नपाय बुताकू बुताता, अरू मुरुक मिहनइत घड़ीन एटाः होड़कूकू अलार-दुलारता, अरू अबूरीग परबू ईसू मसी एचेरे इदा हना असरारे सनाहाव घड़ीन इदानकुःआ माःआन, अबूरीग अपांग भगवानराः मड़ंगरेले उहियार अगूयता।