1 तिमुतियूस 6:20 - Korwa Bible

²⁰ ने तिमुतियूस, भगवान आम एचेरेय जिमाकेरा हना नपायतेम जतन हड़ाःगे। बेगर लूर बड़रा अरू कनहून माःआन लबरातेकू कतनता हना जमा कताकूनते तोनोरेम दोहोन।

1 तिमुतियूस 6:20 Referans Kwoze

कुलूसी 2:8

होड़कू अँननकूराः कनहून अरू सदाःआ बड़राते, अहाकू मोहाव अवेपे लगा सवासितीपे दोहोन। हँकूराः बड़रा मसीराः ओंगोल इया कोवानेःआ, मनदो होड़कूराः रिती-बिधी अरू नियमकून अते इदा। हँकू राइजबड़ी बदीरे मड़ंग जूगरिकुःआ होड़कूराः चेडतो अतेकू चेडकूता।

2 तिमुतियूस 2:16

भगवान मेर मान मरजइतगेयता अरू होड़कू भगवानराः दूर अतेकू बनाहकाव जुवाःता हना इयाःआ बेलूर बड़राते तोरेम दोहोन।

कुलूसी 2:18

भगवान अपेय एमेवापेता हना इमान अते तोनोंगीग अपे अहाकू अडिग अवेपे लगा सवासितीपे दोहोन। हँकुःआ होड़कू अँननकू हुडिंगकू बड़ाँव अडिगता, अरू सेरमोरिकुःआ बराहीलकूकू जागता। नाःआ इयाकुःआ होड़कू दरसनरेकू ञेल कता, हनानाः कताकून बदीरे, ओंगोल घड़ीनकू कता उदुःगोड ञवनता, अरू अँननकूराः ओंगोल इया बेगर लूर कताकूनरेकू बड़वारता।

रूमी 3:2

मनदो ईंग कतायतना, सतायरे एहूदा होड़ बड़ाँः अते मुरुक नफा इदा। मइद कता नाःआ हवे, भगवानराः सरवन मनाड़ंगरे अपे अयूमतेरा।

1 तिमुतियूस 6:14

आमिंग हुकुमवामतना, परबू ईसू मसी अरीने कुदा वेग वरी जमा हुकुमकून बेगर गारबारतेम मनावगोड ञवन।

2 तिसलूनिका 2:15

हनालगा ईंग अजी बोपोहकूतिंग, अपे ईसू मसीराः बिसवासरे बड़ियाड़गुःपे अरू अले अपे सुदा दोहोन मेलाले चेडतेडपेःआ अरू चिठीरेले ओजाःतेरा हना जमा कताकून मनावगोड ञवनपे।

तितूस 3:9

मनदो अड़ा-चउकीकू रिमुःता हना बेलूर बड़रा अरू खुटीपहारराः सदाःआ कहड़ीकून अरू एहूदाकूराः नियम बदीरे कड़ीग अरू बेलूर बेलूर कता होड़ेंग अते आम तोरेम दोहोन। नाःआ इयाःआ बड़राकून बेगर लूर इदा अरू तोनोंगाः नफा ओरो होयानेना।

2 तिमुतियूस 2:1

दो ईंग बेटा तिमुतियूस, ईसू मसी आमे मयावारा, हनाते आम जीव बड़ियाड़ इदीनमे।

1 तिमुतियूस 1:11

अरू अगम नपाय भगवान ईंगे जिमावारा हना जागगेयाः नपाय सरवनते नाःआ नियम खाप जोमता।

2 तिसलूनिका 1:4

हनालगा अले अपे बदीरे भगवानराः कलसियाकूनरिकुःआ बिसवासी होड़कू एचेरे अपे भल-भलावातेडखनले कतायता, एटाः होड़कू हँकूकू संतावतना अरू हँकू एचेरे हलकइनकू अगूतना। हनते हों हँकू सहाव घड़ीन असतिरकू दोहोनता अरू हँकू बिसवास मेरकू अड़ाःगेता, माःआन।

तितूस 1:14

अरू एहूदाकूराः तुलात कहड़ी अरू सतायकू आड-बेकारवाता हँकुःआ होड़कूराः कता अलोकू मनाः।

तितूस 1:9

हाँय अलिंग चेड उदुःकेरा ईसूराः सताय सरवनरे बड़ियाड़ बिसवासगे इदा, जेमहा हाँय जमाकू सताय सरवने चेड अवेकू अरू सताय सरवनकू घंटावता हँकुःआ होड़कूराः आहे रिपूड अवे।

1 तिमुतियूस 6:11

मनदो ने भगवानरीग होड़ तिमुतियूस, नाःआ इयाःआ ललची कताते तोरेम दोहोन। भगवानराः ओंगोलरे बेगर गारबारते धरमिया होड़ बड़ाँवकियानखन बिसवास अरू अलार-दुलारते ओंगोल समझाव घड़ीन सुधा होड़ होयाः लगाम होमगोड।

1 तिमुतियूस 4:7

भगवान मेर मान मरजइतगेयता हना कहड़ीकून अरू डुपुकुरीकूराः तुलात कहड़ीकून अते तोरेम दोहोन। मनदो भगवान मंजूरवाता हनानाः एचे लगाम चिडुः।

1 तिमुतियूस 1:6

मनदो तोनोंग तोनोंग होड़कू सताय सरवनराः दूरकू अड़ाःगोतेडा अरू हनाते हँकू सदा बड़राकू बड़राता।

1 तिमुतियूस 1:4

तुलात कहड़ीकून अरू खुटिपहार होड़कूराः ञाव सूची बदीराः बड़राकूनरे हँकुःआ होड़कूराः ओंगोल अलो दोहोन लगाम हुकुमवाकू। ननन इयाःआ कताकून बिसवासते होयाःता हना भगवानराः चेड इया कोवानेःआ अरू हना अते होड़कू मुरुककू अड़ा-चउकीता।

1 कुरिंती 3:19

नाःआ चउंदीसरिकुःआ होड़कूराः कनहून भगवान मड़ंगरे बुयांगतो इया इदा। अरू हनानाः बदीरे भगवानराः कागदरे ओजाःतो इदा, “अँननकू कनहूनदारकू ओंगलुःता, हँकुःआ होड़कू अँननकूराः बुइदकूनते भगवान दाःकूता।”

मूक चेलाकू 17:21

(दो एतेनसरिकुःआ होड़कू अरू एटाः देस अते वेगनेनखन हंडाकू दोहोना हँकुःआ होड़कू हों मुरुक बेला वरी नँवा नँवा कताकूनकू अयूम अते अरू कता होड़ेंग अते एटाः तोनोंगाः बुता हँकू मेरकू बुताःआ।)

मूक चेलाकू 17:18

तोनोंग तोनोंग इपिकुरी अरू इसतोइकी गउदारिकुःआ कनहून चेडदार होड़कू पउलूस सुदाकू अड़ा-चउकीःआ। हँकू अते अदोम होड़कू होंबोरतेरा, “नाँयग बेलूर बउकाः होड़ चेले माःआन कताय लगाय चहाःतना?” एटाः होड़कू कतातेरा, “नाँय दो एटाः देसरिकुःआ होड़कूराः तोनोंग देवताराः बदीरेय कतायतना।” पउलूस, ईसूराः नपाय सरवन अरू गोएगतो होड़कूय जियाव रेमता हना कताय परसार उदुःतेरा, हनालगा हँकुःआ होड़कू नाःआ इयाकू कतातेरा।

उदुःतो कताकून 3:3

दो अपे अयूमकेरा अरूपे चेडकिया हना कताकून उहियार घड़ीनपे मनाः अरू कसूर अते भगवान अगी जीवपे कुदा। अपे बेरेडतो मेरपे दोहोन दो ईंग इनिग होड़ इयायिंग सोदोर जुवाःता, अरू अपे कहियो ओरोपे सुदी अवेतेरा, ईंग तुमिस अपे एचेरेयिंग सोदोर जुवाःता।

तितूस 1:4

मिनी बिसवासते इदानलिंग अते ईंगरीग सताय बेटा तितूस, आम लगा नाःआ चिठीयिंग ओजाःगेतना। अपांग भगवान अरू अबूरीग सडावदार ईसू मसी आमकिन मयावा अरूकिन सलसतमे।

1 कुरिंती 2:6

हनते हों अले बिसवासरे उडु-बुडूत इदानकुःआ हँकुःआ होड़कू एचेरे कनहूनराः सरवनले कता उदुःता। मनदो हना कनहून होड़कूराः ओंगोल इया कोवान सहे लाय एंडानताकू हँकुःआ चउंदीसरिकुःआ मूक होड़कूराः कनहून इया हों कोवानेःआ।

रूमी 1:22

हँकू अँननकू अँकू कनहूनदारकू ओंगलुःतना, मनदो हँकू बुयांगयना।

मूक चेलाकू 16:1

पउलूस अरू सिलास दिरबे सहररेकिन सोदोरनेन अरू हनाते लुसतरा सहररेकिन सेनेडा। हंडा तिमुतियूस ञावीग मी होड़ ईसूरीग चेला दोहोना। हाँयरीग एंगात ईसू एचेरेय बिसवासगेःआ मी होड़ एहूदा अइमी दोहोना अरू हाँयरीग अपात बेगर एहूदा होड़े दोहोना।

1 तिमुतियूस 1:2

बिसवास बदीरे ईंग बेटा इया इदानमेःआ आम लगा नाःआ चिठीयिंग ओजाःगेतना। अबूरीग अपांग भगवान अरू परबू ईसू मसी, अपेकिन मयावा अरूकिन सोगावा, अरू सलसतरेकिन दोहो ओवापे।

1 तिमुतियूस 1:9

अबू नाःआ हों सुदीयतनाबू, भगवानराः नियमकून बेगर गारबार होड़कू लगा मेरेय तुलागाड। मनदो गारबार अरू तुड़ेंग-तपेग होड़कू लगा, भगवान मेरकू मनाःता अरू कसूर होड़कू लगा, सुद कोवानेःआ अरू बेलूर होड़कू लगा, एंगात अपातकू ञेड एंडात होड़कू अरू ञेड एएंडा होड़कू लगा,