1 तिमुतियूस 5:17 - Korwa Bible

¹⁷ नपायते होड़कूकू अगुवाइवाता हँकुःआ कलसियारिकुःआ अगुवा होड़कू अते तोनोंग तोनोंग होड़कू भगवानराः सरवनकू परसारगे लगा अरू चेडकू लगाकू मिहनइतगेता। दो ननन इयाकुःआ होड़कू बगरा मान मरजइतकू लगा इदा।

1 तिमुतियूस 5:17 Referans Kwoze

इबरानी 13:17

अपेरिकुःआ मूक होड़कू अपेकू तिहा हड़ाःता। हनालगा हँकूराः हुकुमपे मनाः अरू हँकूराः आड़रेपे दोहोन। हँकूके अपे बदीरे भगवान एचेरे आभा पुपुराव पराःता। हँकू बनाहालते नाःआ बुताकूपे एचे ओवाकू। हँकूके नाःआ बुता हंबाल इया होया जुवाः दो, अपे लगा तोनोंगाः नफा ओरो होयानेना।

गलातिया 6:6

सरवने चिडुःता हाँयग होड़ अनँयगराः आन-धान आँयगरीग चेडदार होड़े हटिंगवा।

लूका 10:7

तोनोंगीग होड़ बुताय बुतायता दो, हाँय हना बुता बनी पवाः जुकूर इदानिया। हनालगा अपेकू नेत-नेवारता हना ओड़ाःरेपे दोहोन अरू हँकू एमेयता हनापे जोम ञूय। अरू अपे हना ओड़ाः अते एटाः एटाः ओड़ाःरे दोहोन लगा अलोपे सेन।

इबरानी 13:7

भगवानराः सरवनकू कता उदुःवातेडपेःआ हँकुःआ मूक होड़कूपे उहियारकू अरू हँकूराः नपाय जीवते चिला नफा होयाःतना हना ञेलकेडखन अपे हों हँकू इया भगवान एचेरे बिसवासकेडखनपे सलाः।

2 तिमुतियूस 2:6

मुरुक मिहनइत घड़ीने बुताता, हनाँयग किसाड़ जमाकू अते, मनाड़ंग बंटा पवावगुः इदा।

पिलिपी 2:29

हाँय अपे एचेरेय सेन दो, नाँय ईसू मसीरीग होड़ हवे, माःआन ओंगोलवाडखन मुरुक बहालते हाँयपे नेत-नेवार, अरू नाःआ इयाकुःआ होड़कू, अपे मान मरजइतकू लगा इदा।

रूमी 12:8

तोनोंगीग एटाःकू कता-बहालकू लगा दहिने पवावकियान दो हाँय कता-बाहालगोड ञवनकूय, अरू तोनोंगीग हहटिंग लगा दहिने पवावकियान दो हाँय मिनी जीवकियानखने हटिंगगोड ञवन। तोनोंगीग अगुवाइवाकू लगा दहिने पवावकियान दो हाँय, ईंगराः जिमेवारी इदा माःआन ओंगोलकेडखने अगुवाइगोड ञवन अरू मयावाकू लगा तोनोंगीग दहिने पवावकियान दो हाँय बनाहाल घड़ीने मयावाकू।

मूक चेलाकू 28:10

हँकुःआ होड़कू अले मुरुककू मान मरजइततेडलेःआ अरू अले पेय महिना तयोमरे सेन लगाले सपड़ावनेन दो अले लगा हुडिंग बगरा दोहोना हना जिनिसकून जहाजरेकू देगगोतेड।

2 कुरिंती 6:1

अले भगवानरिकुःआ सेवा देंगवा होड़कू इदानलेःआ अते अपे एचेरेले असेयतना, भगवान अपे मुरुके मयावाडपेःआ, हना अपे जीवरे अहवइर अलोपे होया ओवा।

रूमी 16:12

मुरुक मिहनइत घड़ीन परबूकिन सेवाता हँकिनाः अइमीकिन तुरुपिना अरू तुरुपिसा ईंग अगीतेपे सलामगोडकिन। पिरिसीस ईंगरीग सउंगतायीन हवे। अरू हाँय हों मुरुक मिहनइत घड़ीन परबूय सेवाकेरा। हाँयग अइमी ईंग अगीतेपे सलामगोडेय।

रूमी 15:27

मड़ंगरे भगवानराः नपाय सरवन मकिदुनिया राइजरिकुःआ अरू अकाया राइजरिकुःआ होड़कू एहूदाकू अतेकू अयूमतेरा। हनालगा हँकुःआ होड़कू एहूदा बिसवासी होड़कू संघरावाकू लगा हों हँकूराः जिमेवारी इदा।

पिलिपी 4:3

ने सुजगे, आम ईंगरीग बिसवासगेयीग सेवा देंगवा होड़ हवे। नँकिनाः अइमीकिन, कलमेस अरू एटाः सेवा देंगवा होड़कू अरू ईंग सुदा, नपाय सरवन कता उदुःगे लगा मुरुककिन सेसा-दुराकिया। अरू नँकुःआ जमा होड़कूराः ञाव, जीवराः कागदरे भगवान ओजाःकेरा। हनालगा ने सुजगे, आम नँकिनाः अइमीकिन सलसतरेकिन दोहोन लगाम संघरावाकिन।

1 कुरिंती 16:16

नाःआ इयाकुःआ होड़कूराः कतापे मनाः। अरू ननन इया मिहनइत घड़ीन ईसूराः सेवाकू सेवातना हँकुःआ होड़कूराः कता होँपे मनाः।

मूक चेलाकू 11:30

हँकू हनन इयाकू एचेतेरा अरू एरुसलेमराः कलसियारिकुःआ अगुवा होड़कू एचेरे एमेय लगा बरनाबास अरू साहूल एचेरे पुंजी पसारकू एमेगोतेड।

2 तिमुतियूस 4:2

भगवानराः सरवनमे परसार। अरू सगर बेला परसारगे लगा सपड़ावतोम दोहोन। मुरुक सहाव घड़ीन होड़कूम मंदरावकू अरूम डंटावकू अरूम कता बहालवाकू अरू भगवानराः सरवन नपायतेम चेडकू।

1 तिमुतियूस 4:16

आम सवासिती दोहोन घड़ीनमे जियाः अरू होड़कूम चेड। नान इयाम एचेय दो आम अरू आमराः बड़राकू अयुमेता हँकुःआ होड़कू हों आम सुदाकू बनसाव जुवाःता।

1 तिमुतियूस 3:5

तोनोंगीग होड़ आँयग ओड़ाःरिकुःआ होड़कू पला दरीकू लगा मेरेय अवे दो, हाँय भगवानराः कलसियारिकुःआ होड़कू करा इयाय पला दरी अवेकू?

पिलिपी 2:16

अपे, जीव एमेता हना सरवन इयापे जियाः दो, ईसू कुदा वेगता हना दिन ईंग अपे बदीरे बहालते नपायतेयिंग कता अवेयता अरू ईंगराः मिहनइत सदाःआ ओरो होयानेना।

मती ओजाःतेरा भगवानराः नपाय सरवन 24:25

अयुमेपे! नाःआ जमाकून होयाः अते मड़ंगरे अपे एचेरेयिंग उदुःगेतना।

इबरानी 13:24

अपेरिकुःआ जमा मूक होड़कू अरू जमा सुद होड़कू ईंग अगीते मसी सलाम। इतालीया देसरिकुःआ बिसवासी होड़कू अपेकू मसी सलामतना।

1 तिमुतियूस 4:10

जीयत इदानिया हाँयग भगवान एचेरे अबूराः असरा इदा। हाँय जमा होड़कूरीग सडावदार हवे अरू हाँय आँयग एचेरेकू बिसवासगेता हँकुःआ होड़कूय सनाडावबाःकूता। हनालगा अबू मिहनइत घड़ीनबू सेसेवातना।

1 कुरिंती 15:10

मनदो भगवान ईंगे मयावारा। हनालगा नुँहू ईंग इदानिंगा हनानाःयिंग बड़ाँवनेना। अरू हाँय ईंगे मयावारा हना ईंग जीवरे सदाःआ मेर होयागना। हनते हों ईंग ईसूरिकुःआ एटाः मूक चेलाकू अते मुरुक बगरा मिहनइत घड़ीनिंग बुतातना। मनदो नाःआ बुता ईंग इनिंगराः जंगरते मेरिंग बुतातना। भगवान ईंगे मयावारा अरू हनानाः मया ईंग बुनुतागोड ञवन लगा संघरा एमेता।

मूक चेलाकू 20:35

ईंग एचेतेरा, हना बुताकूनते जमा बुताकून मुरुक मिहनइत घड़ीनपे एचेय लगा अरू गरीब होड़कू संघरावाकू लगायिंग उदुःवाडपेःआ। परबू ईसू कतातेरा, गोगोः अते एएमे लगा ननपाय इदा, हना कता होँपे उहियारगोड ञवन।”

एहुना 4:38

एटाः होड़ वेरकेरा हना कियारीराः हुड़ू बेगर मिहनइतते इईर लगायिंग वारपेतना। एटाः होड़कू हंडाकू मिहनइततेरा, मनदो हनाराः नफा अपेपे पवावकिया।”

लूका 12:42

दो परबू ईसू कतातेड, “अपे अते कनहूनदार अरू नपाय दोदोहोयीग जिमेवारी होड़ इये हवे? एटाः सेवकिया होड़कू नपाय बेलारे जोम जिनिसकून एमेवाकू लगा मालिक मूक होड़े बड़ाँवतिरिया हनाँय हवे।

1 तिमुतियूस 5:3

सतायरे रंडियाहीनकू इदानकुःआ हँकूपे मान मरजइतकू अरूपे संघरावाकू।

1 तिमुतियूस 4:6

नाःआ कताकून जमा बिसवासी होड़कूम चेडगोड ञवन दो, ईसू मसीरीग नपाय सेवकिया होड़मे बड़ाँःता। आम मनाः घड़ीन दरवामेःआ हना बिसवास अरू सताय सरवनराः कताकूनते आमराः पला दरी होनोयागोड ञवनता।

1 कुरिंती 3:9

दो मनइद कता ननानाः हवे, अलिंग भगवानरिकिनाः सेवा देंगवा होड़किन हवे, अरू अपे भगवानराः दोहोड़ इया इदानपेःआ। अरू अपे भगवानराः ओड़ाः इया हों इदानपेःआ।

1 तिमुतियूस 4:14

भगवानराः बड़रा कता होड़कू कतातेरा हना कता अरू कलसियारिकुःआ अगुवा होड़कू आम बोःरेकू खेपातेड मेला भगवान दहिनवातेडमेःआ, हना दहिन अहम एरांगवा।

1 तिमुतियूस 5:19

तोनोंगीग मूक होड़ बदीरे तोनोंगीगराः लालिस, बार पेय होड़कूराः हिदइत बेगर आम अलोम अयुमे।