1 कुरिंती 12:10 - Korwa Bible

¹⁰ अरू एटाः होड़कू बयाव जुवाः इयाःआ बुताकून एचे लगा अरू एटाः होड़कू भगवानराः बड़रा कता होड़कू होयाः लगा सुद बिरुवा दहिन एमेवाकूता। तोनोंग तोनोंग होड़कू सुद बिरुवाराः बड़रा अरू भूतकूराः बड़रा अंदजाव लगा अरू तोनोंग तोनोंग होड़कू अनबुझ भासीकून बड़रा लगा अरू तोनोंग तोनोंग होड़कू अनबुझ भासीकूनराः अरत बुझाः लगा दहिनकू पवाःता।

1 कुरिंती 12:10 Referans Kwoze

1 कुरिंती 14:39

हनालगा ईंगरिकुःआ अजी बोपोहकूतिंग, अपे हों भगवानराः बड़रा कता होड़कू होयाः लगापे रोयोँन, अरू अनबुझ भासी बड़रा होड़कू अलोपे रोंकावकू।

1 एहुना 4:1

ने अजी बोपोहकूतिंग, नाःआ चउंदीसरे भगवानराः बड़रा लबराकेडखन कताय होड़कू मुरुक इदनकुःआ। हँकुःआ होड़कूराः कता अपे ओहेन अहापे बिसवासगे। मनदो अपे हँकुःआ होड़कू सतायते भगवानराः बड़राकू कतायता जा कोवान हना नपायते जासवाडखनपे बिसवासगे।

मरकूस 16:17

बिसवासगेता, हँकुःआ होड़कू नाःआ जमाकूनकू चिनहा इयाकू एचे अवेता। हँकू ईंग ञावते भूतकूकू एचे उडुंगगोडता अरू हँकू एटाः एटाः नँवा नँवा भासीकू बड़राता।

गलातिया 3:5

ईंग अपे एचेरे अरूयिंग होंबरेतना। भगवान अपे सुद बिरुवाय ओवाडपेःआ अरू अपे तलारे बयाव जुवाः इयाःआ बुताकूने एचेकेरा। अपे नियमपे मनाः अते भगवान नाःआ जमाकूने एचेकेरा जा? कोनोवान। अपे ईसू मसीराः नपाय-सरवनपे बिसवासकेड अते भगवान नाःआ जमाकूने एचेकेरा।

मरकूस 16:20

हनते चेलाकू जमा देसरे सेनेवाडखन नपाय सरवन होड़कूकू परसार उदुःवातेरा। परबू ईसू हँकू जमा एचेगे लगा डीड़े एमेवाकुःआ। अरू हँकू बयाव जुवाः इयाःआ बुताकूनकू एचेःआ अते परबूराः सरवन सताय हवे माःआने उदुःगेःआ। आमीन!]

उदुःतो कताकून 2:2

“अपेराः बुतायिंग सुसुदीता। अपे मिहनइत घड़ीनपे बुताता अरू सहाव घड़ीनपे दोहोनता। अपे बेनेलूर होड़कू मेरपे सहाव अवेकूता। अपे हँकुःआ होड़कू जासतेडकूखन सुदीगोतेडकुःआ, नँकू अडिग होड़कू इदानकुःआ, माःआन। हँकू सतायरे मूक चेलाकू ना लवे, मनदो हँकू अँननकू अँकू कतनता, अले ईसूरिकुःआ मूक चेलाकू हवे, माःआन।

1 तिसलूनिका 5:20

भगवानराः सुद बिरुवा तोनोंगीग होड़ते आँयगराः बड़राय कता उदुःगेता दो हना बड़रा हुडिंग अहापे ओंगले।

1 कुरिंती 13:8

भगवानराः बड़रा कता होड़कूराः कता चबा जुवाःता, अनबुझ भासीकू बड़राता हँकुःआ होड़कूराः बड़रा केड़े जुवाःता, कनहूनदारकूराः कनहून टुटीग जुवाःता, मनदो एटाः होड़कूय दुलारता हाँयग होड़राः दुलार कहियो ओरो टगावनेना।

रूमी 15:19

ईंग बयाव जुवाः इयाःआ बुता अरू चिनहाकूनिंग एचेय लगा, हाँय सुद बिरुवाराः जंगरे एमेवारिंगा। नाःआ इया एरुसलेम सहर अते इलुरिकूम छतर वरी ईंग ईसू मसीराः नपाय सरवन मुरुक बगरा होड़कू एचेरेयिंग परसार उदुःकेरा।

रूमी 12:6

भगवान अबूय मयावाडबूखन एटाः एटाः दहिने एमेवाडबुःआ। तोनोंगीग भगवानराः बड़रा कतायीग होड़ हवे दो हाँय भगवान एमेतेरा हना बिसवास इयाय कताय।

मूक चेलाकू 19:6

हनते पउलूस हँकुःआ होड़कू चोटरे तिःईय खेपातेड दो सुद बिरुवा हँकू एचेरेय उतरावनेन अरू हँकू एटाः एटाः भासीरेकू बड़राःआ अरू दरवाःआ हना कताकूनकू कता उदुःतेरा।

मूक चेलाकू 11:28

हँकू अते मी होड़राः ञाव दोहोना अगबूस। हाँय जमाकू तलारे चड़ाँनेनखन सुद बिरुवा एचे कता इयाय कता उदुःतेरा, “जमा चउंदीसरे कतकाल होयाःता।” (अरू हना कतकाल मरंग राजा कलाउदियूस राइजगेःआ हनमेला होयानेना।)

मूक चेलाकू 5:3

दो पतरस कतातेड, “ने हनानियाह, आम कलउराः ओंगोल इया सलाः लगा आम जीव हाँय एचेरे चिला लगाम जिमातेरा? आम भगवानराः सुद बिरुवा एचेरे चिला लगाम लबराकिया? कियारी अकिरिंगकेडखन अदोम ढिबुवा चिला लगा हिगारकेडखनमे दोहोगोतेडा?

मूक चेलाकू 1:8

मनदो सुद बिरुवा अपे एचेरेय वेगता अरू जंगरपे पवाःता। हनते अपे एरुसलेम सहररे, एहूदिया छतररे, समरिया राइजरे अरू चउंदीसराः जमा देसरे ईंगरिकुःआ हिदइतदारकूपे बड़ाँःता।”

एहुना 16:13

मनदो सतायराः बिरुवा वेग दो अपे जमा बरानाः सताय दूरे उदुःवापेता। हाँय अनँयग ओंगोलते ओरोय कतातेरा। मनदो हाँय अयुमेता हनानाःए कता उदुःगेता अरू दरवाःआ हना कताकून होंय कता उदुःगोडता।

एहुना 14:12

अपे ईंगपे अयूम! मी होड़ ईंग एचेरेय बिसवासगेता दो, ईंग एचेयता हनानाः बुता हाँय होंय एचेयता। ईंग अपांग एचेरेयिंग सेनता। हनालगा हाँयग होड़ ईंग अते हों मरंग मरंग बुताय एचेयता।

लूका 24:49

ईंग अपांग जबानकेरा हाँयग सुद बिरुवायिंग वारेयता। अरू हाँय अते अपे सेरमो देसराः जंगर अरीनपे पवाः वरी ननानाः सहररेपे दोहो हताड़।”

इबरानी 2:4

चिनहाकूनते अरू बयाव जुवाः इयाःआ बुताकूनते अरू एटाः एटाः इयाःआ ञेनेल ञेलरे नपाय जुवाःता हना बुताकूनते, अरू अनँयग हिछा इया होड़कूय हटिंगवातेरा हाँयग सुद बिरुवाराः दहिनकूनते भगवान, हाँयराः सरवन सताय हवे माःआन हिदइते उदुःबाःगोतेडा।

मूक चेलाकू 11:27

हननमेला एरुसलेम अते अदोम भगवानराः बड़रा कता होड़कू अंतकिया सहररेकू वेजेडा।

1 कुरिंती 11:4

तोनोंगीग मरद अनँयगराः बोःरे सोनहे तंबूकेडखने अरजी, सहे भगवानराः सरवने कता उदुःता, हाँय अनँयगरीग मूके बेग-हतावाता।

1 कुरिंती 14:13

हनालगा तोनोंगीग होड़ अनबुझ भासीय बड़राता दो हाँय हना भासीराः अरत उदुः अवे लगा भगवान एचेरेय अरजी।