Vitendo 24:14 - Ibibiliya mu Shimakonde Imbodi Yaambi na dimbande dya Imbodi Yakala

¹⁴ Kanji nangu shangulivalanganga kwako ni ashi: ni kwodananavo Indila yavashema vanavo ishama ilangadavo yangulipudya kwa Nnungu wavanakuluvetu ngukulupila uti vya mu Lilamulo na vya mu Vakulava

Vitendo 24:14 Referans Kwoze

Vitendo 9:2

nanjugwa shitambulisho shakuka ndalodya muvitala vyamikodyanio vya ku Damashiko kwambangidya akavakodya váshinama mushinamidyo shake Umu valume na vakongwe, avakamule avaidenavo pa Yelusalemu.

Valoma 3:21

Ambi napane ishaliya yake Nnungu indililodya yapukananga na lilamulo; ata lyo lyene lilamulo na vakulava vankumya ushuda wake,

Vitendo 28:23

Napane vakavike liduva lyakukadyania namu nae, vandímwidila vanu voe palyutu lyashiikala na nae kutunduvangila lyamba mpaka lyulo andívaigwiniya ataa ushuda yautawala wa Nnungu alingangila avashombe kwaing'ano imwe Yesu kutunduvangila mu Lilamulo lyake Musha namomo mu Vakulava.

Vitendo 3:13

Nnungu umwe Abulaamu, umwe Ishaki, umwe Yakobo, Nnungu jojo wavanakuluvetu aninkwedya amupa lishangelo Yesu ntumika wake, jo wamunkamudidye mwenu na kumwita pamevo pamwe Pilatu paukile ndaamuwa nae amuungule.

Vitendo 26:22

Kanji kwalipwashalelo lya Nnungu ngupali mpaka nelo apa; ni ashi shingutádya ngupagwe apa ngumya ushuda kwavadyoko mpaka kwavanang'olo. Shanguvalanganga hashinapundana shinu na ashilá shavatangwele vakulava na shatangwele Musha kenga shindatandeka,

Vitendo 24:5

Tundyanalela kenga munu aju ni nantindingania wakujowa namene áidanavo shititimbu na kupwatananga pakati pavayuda mushilambo uti. Jojo aju ni nanangalaledi nkumene waishama yavanashaleti.

II Timoti 1:3

Ninkunnambwalela Nnungu wanintumika kenga mwavantumikidile vanyakala vangu kwamakumbukililo ákave ushapu amuntima pandikukumbukila ngwengwe wako mukushwali kwangu shilo na mui.

Vitendo 26:27

Umu Agilipa, da wako unkuvakulupila vakulava? Nangu ndimanya kenga unkuvakulupila.”

Maono 19:10

Napanelo ndígwilangila mmadodo mwake pakulota ngulipudye kwake kanji nae kushidoni, “Haunatende davo! Nangu ni ntumika kenga wako na kenga vanung'unumunu vavénavo likulupililo muushuda wake Yesu. Lipudye kumwe Nnungu! Mwaa ushuda ummalangánga Yesu ni imumu yakulava.”

I Patulu 1:11

Imumu umwe Klistu e apagwíte nkati mwave andyumya ushuda kaladavo avalanganga mauvilo alóta kumpata Klistu na lishangelo ling'oto lyamauvilo; vanavo vashindalambela vamanye Imumu ishimwamba nyani na wakati wene wo, wakwashi.

Titu 3:10

Munu áidanavo kwapukanianga, ling'oto lyakunduma mwanda utandi na wambili, mwambukange

Vagalata 5:20

kulipudya kwavannungu vakushang'apa, wavi, umongo, ungaigwania, liu, shitundi, shojo, mitau, kumwadilikananga,

I Vakolintu 11:19

mwaa indivaikila vipagwe vipinga pakati penu pakulota vakukubaligwa pakati penu vamanyike.

Vitendo 26:6

Napanelo nangu ninkupagwa mulyutu ali nguukumigwa kwamwaa walilindilililo lyangu mukulivikila kwake Nnungu kwavanakuluvetu,

Vitendo 24:22

Bai Pilishi, munu e avénavo limanyilo lyoe lyavinu vyámba Indila, andíimidya mwaa awo aashidoni, “Ing'ano ai ndalalyanga palota kwida Lishiyashi nang'olo nkumene wavaing'ondo.”

Vitendo 22:14

Nae kavili kushidoni, ‘Nnungu wavanakuluvetu andikutandola pakulota umanye malotelo ake, andikutadya umwone aijá Waishaliya na umwigwe atangola jo mwene.

Vitendo 19:9

Kanji vanu vanji vashindalitaukanga, havashilota kukulupila na vashindatangola kunyata Indila paumbala wavanu. Napavedoni Paulu andyúma pakati pave pamo na vakwoda kuka ndavapundisha kula liduva pashitala shimwe Tilanu.

Vitendo 13:15

Vakainuke kushomya Lilamulo na Vakulava, vananangalaledi vashitala shakulipudidya vandítuma vavajugwe doni, “Mmanung'unumunu, likapagwa lilove lyakuvanonowanga venentete, tangola.”

Vitendo 10:43

Ajo vakulava uti vankumuumidya ushuda kenga kula munu ánkulupila nae ankupata kulivalivigwa kwamadambi kwaindila yalina lyake.”

Vitendo 7:32

‘Nangu ni Nnungu wavanakuluvako; Nnungu jojo umwe Abulaamu, umwe Ishaki na umwe Yakobo.’ Bai Musha andítatamela mwaa wakujopa na halingangidíle ata padyoko vela kulola shinu shene.

Vitendo 5:30

Nnungu wavanakuluvetu anindyuwa Yesu, munu wamummyee mwenu kwaindila yakunkamela panshalaba.

Nshuwau 1:45

Jo Pilipo jo ankunkodya Nataniyele ankumwaulila doni, “Tunimpata munu wamwandike Musha mu Lilamulo na yadavo Vakulava, Yesu wa ku Nashaleti, mwanagwe Yoshe.”

Lukashi 24:44

Kutwala kuvaulila doni, “Vitandéke avi ni avilá vyanishipita nimmalangangila mwenu tùvele shalumo kenga indivaikila vinu uti vyandikígwe mu Lilamulo lyake Musha, mu Vakulava na mu Dimu vingwámba nangu, vitandeke.”

Lukashi 24:27

Bai nae mumaandiko uti andíviigwiniya kutunduvangila kumwe Musha na kwavakulava vinu vimwámba nae.

Lukashi 16:29

Abulaamu kushidoni, ‘Ako apali Musha na Vakulava; valeke vaigwilile vyovyo vyo.’

Lukashi 16:16

Lilamulo na Vakulava vindyaloka vitawala mpaka wakati umwe Nshuwau. Kutunduvangila apo, ntenga wambone wautawala wa Nnungu unkuvalangangigwa na kula munu álikanyilidya ankwinjila.

Lukashi 1:70

kenga mo mwatangaladile kwaindila yavakulava vakwilimyanga vakala

Mateu 22:40

Mumalamulo ala mavila ni mwalipandukanga Lilamulo uti na Vakulava.”

Mateu 10:32

“Napanelo kula munu álota kunguvalanganga nangu pamevo pavanu, nanangu nammalanganga pamevo pake Atata ávele kuwa.

Mateu 7:12

Napavedoni kula shinu shamulota mwenu vavenu vantandele, namwenu vanavo vatandele vyovyo mwaa lyolyo ali ni Lilamulo na Vakulava.

Vitendo 19:23

Mumaduva lolo, pa Epeshu shindíbuka shititimbu shakudimba kumevo kwamwaa wa Indila.

Vitendo 15:5

Kanji vakukulupila vanji vaishama yamapalishayo vandíimila kutwala kutangola doni, “Vamidi indivavaikila vakumuligwe na tuvalamulile vaodedye Lilamulo lyake Musha.”

Vitendo 25:8

Kutwala Paulu kulishililidya aashidoni, “Nangu hashipali shangutagile; ata kwalilamulo lyavayuda, ata kwaing'ande ya Nnungu na ata hanintagadile Shashali.”

Vitendo 26:4

“Vayuda uti vandimanya mwangunamidile nangu kutunduvangila shidyoko shangu shangupitile tangu kunantandi pakati pavenentetemwangu na pa Yelusalemu.

Vitendo 28:22

Nadoni tundilota tukwigwe wako umwene mwawonela. Mwaa tundimanya kenga kula kushinu vanu vankuvangedya ishama yawoda wako.”

Valoma 1:9

Nnungu wanintumika na ntima wangu uti muntenga wambone wa Mwanagwe ni nshuda wangu mwashi mwanintambulangila mwenu ngwengwe