Vaepeshu 5:5 - Ibibiliya mu Shimakonde Imbodi Yaambi na dimbande dya Imbodi Yakala

⁵ Mwaa mumanya ngala doni, nkúlauka, nshapu kwali walung'unuku, jo wakulipudya vyakushang'apa, aju have maleko muutawala umwe Klistu namu Nnungu.

Vaepeshu 5:5 Referans Kwoze

Vagalata 5:21

ing'ou, kwambalwa, kululuka na vinji vilinganána na avyo. Ninkumwaulila kala davo kenga mwanimwaulidile kunantandi doni, vaténda vinu avyo, mwiko havapata maleko autawala wa Nnungu.

Maono 22:15

Vandaikala panda vang'avanga, vavi, vakulavalava, vakubyaa, valipúdya kwavannungu pamo namu avalá vanagwalédya na vatandédya vyakushang'apa.

Vakoloshu 3:5

Nadoni nkati mwenu, pedya uti avilá vyashimunumunu; kulavalava, ushapu, ditamaa, malotelo aukalau na ing'ou, ako ni kulipudya kwavyakushang'apa.

Vaepeshu 5:3

Kulauka, ushapu kwali lung'unuku; pakati penu hanapagwe wakwambangila mwaa kenga mwaivalalele kwavakwilimyanga

Maono 21:8

Kanji vakujopa, vákakulupila, vakalau, vakubyaa, vakulavalava, vavi, valipúdya kwavannungu na vakushang'apa uti, vanavo maleko ave, lilota kuva alilá litanda lyamoto likaléla na ipataki; aku ni kupela kwambili.”

Vagalata 5:19

Napanelo vitendo vyashimunumunu vinkuva ngala; kulavalava, ushapu, njeje,

Vabalaniya 13:4

Shitamo shindivaikila shishimike na vanu uti, aki yake itandeke kwaungave-udagwa mwaa Nnungu andavaukumu avalá vakulauka na vakulavalava.

I Timoti 6:10

Mwaa kunnagwaledya njuluku ni lushija lwavyakunyata uti. Kwakuvikila liu njuluku, vanji vandyashalanga mulikulupililo na kulitalalanga kwavipalodi vyoe.

I Timoti 6:17

Kwavatajili vawakati au, valaililile havanalyone, havanavike lilindilililo lyave mumali ákakulupilika kanji vavike lilindilililo lyave kumwe Nnungu átupa uti kwabila kulakalela kwalipuwilo lyetu.

Vitendo 8:21

Wako haunapagwa shinu ata padyoko nkati mushimadengo ashi mwaa ntima wako haunava shinu washalowa pamevo pake Nnungu.

Vitendo 20:32

“Napanelo nangu ninkunkamudya kwa Nnungu na kwalilove lyaumonyo wake lyulúla kunkulumuwa na kumupa maleko pakati pa avalá vailimyangígwa.

Vakoloshu 1:13

Nae ni átuposhidye muutawala wamushii kutuukanavo muutawala wamwanagwe wakunagwaleka,