Nshuwau 14:1 - Ibibiliya mu Shimakonde Imbodi Yaambi na dimbande dya Imbodi Yakala

¹ “Hamunaushaushange mitima vyenu. Nkulupile Nnungu; ngukulupila nangu momo.

Nshuwau 14:1 Referans Kwoze

Nshuwau 12:44

Napanelo Yesu andítangola pashanya po aashidoni, “Aijá ángukulupila nangu, hanangukulupila shinu nangu, ankunkulupila aijá ángutumididye.

Nshuwau 6:40

Mwaa malotelo amwe Atata ni ala, kula munu ámwona Mwana na kunkulupila apate shingumi shíkamalilika na nangu nandyuwa muliduva lyamwisho.”

I Patulu 1:21

kwaindila yake nae mwenu munkunkulupila Nnungu ándyuwidye pakati pavakupela kutwala kumupa lishangelo; nadoni likulupililo alyo na lilindilililo lyenu linkupagwa nkati mu Nnungu.

Nshuwau 13:19

Ninkumwaulila kaladavo vikanava kutandeka pakulota pavitandeka po, mwenu mukulupile kenga Nangu ni Nene.

Vaepeshu 1:15

Napavedoni tangu pangwigwite itangaleka pakati penu yalikulupililo kumwe Umu Yesu na yalinagwaledyo kwavakwilimyanga uti,

Nshuwau 12:27

“Napanelo ambi apa ungumi wangu unkwangaikanga. Da ngushi dashi? ‘Atata, muwakati au ngwambola’? Mene, shangwidilile muwakati au ni shosho ashi.

II Vateshalonika 2:2

doni, hamunaangaishangigwe shipajelo muding'anong'ano dyenu na hamunaangaikange ata kwaimumu kwali kwalilove kwali kwaibalugwa yaanéka kuva kenga yaloka kwetu iishidoni, liduva limwe Umu, tayali lindiwika.

II Vakolintu 2:7

Nadoni paikave davo po, indivaikila munnivalive na mumpambadyange munu ajo pakulota hanatitimile mushipalodi shakumamodya.

Nshuwau 11:33

Yesu pangwene Maliya alila na vayuda vamwodíle navanavo momo valila, unímmeta ntima wake na vyakunkodya muntima mwake viníntindinganianga.

Nshuwau 5:23

kwambangidya vanu uti vamwishimu Mwana kenga mwavamwishimila Tatamunu. Ákamwishimu Mwana hanamwishimu shinu Tatamunu, aijá ántumididye.

Nshuwau 16:3

Vinu avi vandatenda mwaa havammanyite Atata na ata nangu momo havangumanyite.

Nshuwau 16:6

Doni, kwoda nimwaulila davo, mmitima myenu mo shinimuumbala shipalodi.

Nshuwau 16:24

Mpaka ambi apa hashipali shamunjugwile palina lyangu nangu. Jugwa mundapata kwambangidya lipuwilo lyenu liwikile popo.