Nshuwau 13:14 - Ibibiliya mu Shimakonde Imbodi Yaambi na dimbande dya Imbodi Yakala

¹⁴ Napane ikava kenga nangu ngúvele Nang'olo na Mwalimu ninnavyanga mwenu medi mmadodo, bai namwenu momo inimmaikila munavyanie.

Nshuwau 13:14 Referans Kwoze

I Patulu 5:5

Nimumo momo mwenu mmanemba livike mwina mwavanang'olo. Mwenu uti gwala kulishapeya pakulota muulule kutumikana mwaa “Nnungu ankuvapinga vakulyona ila ankuvapa umonyo vakulishapeya.”

Vitendo 20:35

Kula shinu shangutandile, ninnodya mwenu kenga kwaindila yashimadengo shikumene shatutenda indituvaikila tuvapwashele vákalyulula tukumbukila malove atangwele jo mwene Umu Yesu aashidoni, ‘Wakwalaligwa ni aijá áing'a kuliko ápwashalela.’ ”

Vagalata 5:13

Mmanung'unumunu, ivele mupagwe muunaiti shitadídye mushamegwe kanji napane unaiti awo haunave nkanidyo wakulota kutandedya malotelo enu ashimunumunu ila inimmaikila mutumikane shivenevene kwaindila yalinagwaledyo.

Valoma 12:16

Kumbukilanila mumo momo. Hamunalyone kanji ava tayali kulyunganianga namu avalá vailudyangíka. Hamunalyone mwemwe mmene kuva mmalimanyilo.

I Patulu 4:1

Napavedoni pakuva Klistu andipata mauvilo mushimunu, namwenu momo lingangashele mumakumbukililo lolo mwaa aijá áuvauvenge nkati mushimunu, nae andyapukananga na lidambi.

I Vakolintu 8:13

Napavedoni, ikava kenga shakulya shinkuntadya nung'unumunu kulikuvala, mwiko hangumamena inyama kwambangidya hangunantadye nung'unumunu kulikuvala.

Vabalaniya 12:2

tunnola Yesu mwene nkútunduvanga na nkúwisha popo walikulupililo lyetu. Nae kwamwaa walipuwilo livikígwe mushu mwake, andilipililila panshalaba ailudyanga dyoni na andiikala kunkanakono pashiteng'u shake Nnungu.

II Vakolintu 10:1

Mwenu, nene nangu Paulu ninkunjugwangila mwenu kwakulishapeya na kwaupole umwe Klistu, nene ngwaneka kuva wakulishapeya pangupagwa namu mwenu kanji ninkali ndikanapagwa.

II Vakolintu 8:9

Mwaa mwenu mundimanya umonyo umwe Umu wetu Yesu Klistu doni, àvele avi ntajili kwakunnagwaledya mwenu nae andilitenda kuva ákave pashinu kwambangidya kwaindila yaungave-pashinu wake, antadye mwenu muke mukave mmatajili.

Valoma 12:10

Nagwaladyania namene kwalinagwaledyo lyashinung'unumunu muuvanavo dukuduku yakwishimana.

Nshuwau 11:2

Avele Maliya aijá ampakénge Umu mauta na ampukuténge mmadodo atumila ugwimbu wake e avénavo numbumunu nnwele, Lashalu.

I Vakolintu 12:3

Nadoni ninkumwaulila mwenu doni, hapali wakutangola alangalalegwa kwa Imumu wake Nnungu aashidoni, “Yesu alaanike,” na hapali wakuulula kushidoni, “Yesu ni Umu,” pakalangalalegwa kwa Imumu Wanashwe.

Vapilipo 2:11

na kula lulimi luvalangange kenga Yesu Klistu ni Umu kwalishangelo lya Nnungu Atata.

I Timoti 5:10

na ámanyike shana kwashimadengo shake shambone: ávaladile vana, ákalibishidye, ánavyenge medi madodo avakwilimyanga, ávapwashaladile vakuvauvanga na álijawile mushimadengo shambone shakula inamuna.