Lukashi 10:27 - Ibibiliya mu Shimakonde Imbodi Yaambi na dimbande dya Imbodi Yakala

²⁷ Nae kushidoni, “Nnagwaledye Umu Nnungu wako na ntima wako uti, ungumi wako uti, dimongo dyako uti, ding'anong'ano dyako uti na nnagwaledye mujo kenga mo mwaulinagwaladyedya umwene.”

Lukashi 10:27 Referans Kwoze

Valoma 13:9

Mwaa malamulo ala, “Haunalavalave,” “Haunabyae,” “Haunaive,” “Haunang'unuke,” kwali likapagwa linji lyoelyoe, vandiipiyanga mulilove limo, “Nnagwaledye nshitanonomwavo kenga wako umwene.”

Tiyagu 2:8

Ikava kenga mwenu mwiu munkutandedya lilamulo lyashiumu litangaléka mumaandiko liishidoni, “Nnagwaledye mujo kenga mo mwaulinagwaladyedya umwene,” davo po, munkutenda shana.

I Nshuwau 3:18

Mmanavangu, hatunanagwaledye kwalilove na kwapakanywa kanji muvitendo na muumwiu.

Vabalaniya 8:10

“Doni, ai ni imbodi yangulota kupanga na shipinga shavanaishilaeli ling'oto lyamaduva alo,” atangola Umu. “Ndavika malamulo angu muding'anong'ano dyave, na ndaandika mmitima vyave. Nindava Nnungu wave, vanavo vo, vandava venentete vangu.

Vagalata 5:13

Mmanung'unumunu, ivele mupagwe muunaiti shitadídye mushamegwe kanji napane unaiti awo haunave nkanidyo wakulota kutandedya malotelo enu ashimunumunu ila inimmaikila mutumikane shivenevene kwaindila yalinagwaledyo.

Mateu 19:19

mwishimu tatako na anyoko na nnagwaledye mujo kenga wako umwene.”

Lukashi 10:26

Yesu kushidoni, “Da mu Lilamulo mo, vaandiké nyamani? Paunashomya po wigwa dashi?”