I Vakolintu 1:7 - Ibibiliya mu Shimakonde Imbodi Yaambi na dimbande dya Imbodi Yakala

⁷ Nadoni mwenu hashipali shajo sha Imumu shimwóva pamupagwa mukulindila kulilodya kumwe Umu wetu Yesu Klistu.

I Vakolintu 1:7 Referans Kwoze

Vapilipo 3:20

Kanji wenentete wetu wetu uvelé kuwa akulá kwatunnindila na dukuduku mwamboli, Umu Yesu Klistu.

II Patulu 3:12

mulindila liduva lyake Nnungu mutadya liduva alyo lide shipajelo. Muliduva alyo kuwa kundatikinyuka kwamoto na mili vyakuwa vindanyang'anyuka kwalitukuta.

Vabalaniya 9:28

Nimumo momo Klistu andilyumya shadaka mwanda umo tu bai alitika madambi avanu voe na nae andauja mwanda wambili i kwalidambi kanji pakulota kuvaambola avalá vannindíla na mweshe.

Yudashi 1:21

nanopa nkati mulinagwaledyo lyake Nnungu akuno mulindila shididi shake Umu wetu Yesu Klistu pakulota shintwale muke kushingumi shíkamalilika.

I Nshuwau 3:2

Mmakunagwaleka, wetu napanelo ni tuvanavake Nnungu na mwatulota kuvalela mo hamunava kulilodya; napane palota kwida po, tundava kenga nae mwaa tundamwona kenga mo mwavalalele.

I Patulu 4:13

Kanji puwangila shipimo shamauvilo shamuliinjidyanga pamo namu Klistu kwambangidya palilota kuunukuligwa lishangelo lyake, namwenu momo mulitamange na mupuwange.

Titu 2:13

akuno tulindila lilindilililo lyakutumbyangilika, kuumilila kwalishangelo lyake Nnungu nkumene Mwamboli wetu Yesu Klistu

Valoma 8:19

Doni, shuumbígwe uti shinkulindila na mweshe kulilodya kwavanavake Nnungu.

Lukashi 17:30

Muliduva lyalota kulilodya Mwana Wamunu ilota kutandakela momo.

I Patulu 5:4

Doni, palota kulilodya Nkúshunga nang'olo, mwenu mundapata lidaka lyalishangelo líkadingala.

I Patulu 1:13

Napavedoni mulingangashela muding'anong'ano dyenu, muva mevo vika lilindilililo lyenu muumonyo aulá wavalota kunyukatila mwenu muwakati walota kulilodya Yesu Klistu.

II Timoti 4:8

Kutunduvangila apa, vaningukandyedya lidaka lyaishaliya lyalota kungupa Umu, nkúukumu waishaliya muliduva alyo na i gweka nangu kanji namomo uti avalá vanagwalédya kuumilila kwake.

II Vateshalonika 1:7

kutwala kumupa mwenu múuvauvanga kupumula pamo namu wetu. Ashi shindatandeka paaneka Umu Yesu aumilila kuwa pamo na vanjelo vake vadimongo

I Vateshalonika 1:10

na pakulota munnindile Mwanagwe aaloka kuwa, aijá wandyuwidye pakati pavakupela, Yesu átuposha mushitundi shída.

Vakoloshu 3:4

Napane palota kwaneka Klistu ávele shingumi shenu, namwenu momo mundaaneka namu nae mulishangelo.

I Vakolintu 4:5

Nadoni hamunaukumu wakati ukanava, do Umu akanava kwida. Nae andavika palangele vilipiídye mushii na kulyumilidya ngala makumbukililo ammitima. Bai apo kula munu andapata lutumbyango lwake kwa Nnungu.

Lukashi 12:36

Tenda kenga mwavanatandela vanu vánaikala mevo vannindila nang'olo wave áukile kushikukulu shashitamo pakulota pauja ako kutaa kwene odi, vanavo vanshimulilinneu.

Mateu 25:1

“Napanelo kuwika kwautawala wakuwa ko kulota kuva mwavali kumi vatwéte dikalaboi dyave kuka nannindila nkúlomba.

II Vakolintu 12:13

Da mushakwashi shamutanananigwe mwenu padyoko kuliko maganisha anji pandikavele nangu nimwene kuva ligogo kwenu? Likosha kenga ali ngulivaliva!

Valoma 8:23

i gweka shanavo kanji nawetu momo túpatile vyepo vitandi vya Imumu, tunkukuta shintimatima tulindila na mweshe yakutandegwa kuva tuvanavake Nnungu, kwambolegwa kwamili vyetu.

Vagalata 5:5

Mwaa kwa Imumu na kwaindila yalikulupililo wetu tunkulindila na mweshe lilindilililo lyakupata ishaliya.