Восьтӧм 18:10 - Коми Библия 2023

¹⁰ Найӧ повзясны сылӧн мучитчӧмысь да ылыстчасны сыысь. Шуасны: – Курыд шог тэныд, Вавилон, ыджыд да вына кар! Ӧти здукӧн суис тэнӧ мыждӧмыс!

Восьтӧм 18:10 Referans Kwoze

Восьтӧм 18:19

Найӧ коялісны юрнысӧ пӧимӧн, шогсисны-бӧрдісны да шуалісны: – Курыд шог тэныд, ыджыд кар! Аслад озырлунӧн тэ озырмӧдін саридз вылын кывтысьясӧс. Ӧти здукӧн тэ воштін ставсӧ!

Восьтӧм 18:8

Та вӧсна ӧти лунӧ суас сійӧс став бырӧданторйыс: кулӧмыс, шогыс да тшыгъялӧмыс. Сійӧс сотасны биын, ӧд Господь Ен, сійӧс Мыждысьыс, – вына!

Восьтӧм 14:8

Тайӧ анделыс бӧрся лэбис мӧд андел да горзіс: «Киссис, киссис ыджыд Вавилон кар! Аслас кырсалӧм вӧсна сійӧ юктӧдіс войтыръясӧс скӧрлуна винаӧн».

Амос 5:16

Господь Ыджыдыс, Ен Саваоф тадзи висьталӧ: – Быд изэрд вылын кутас кывны бӧрдӧм шы, быд туй вылын – ойзӧм. Му вӧдитысьясӧс ӧтвылысь бӧрдӧдчысьяскӧд корасны бӧрдӧдчыны-сьывны.

Йоиль 1:15

Повзьӧдана лун миянӧс виччысьӧ, Господьлӧн луныс матын, Ставсӧвермысьсянь сійӧ локтас, медым бырӧдны.

Восьтӧм 17:12

Дас сюрыс, кодӧс тэ аддзылін, – дас ӧксы, кодъяслы абу на сетӧма ӧксыавны. Но налы лоӧ сетӧма зверыскӧд ӧксыалӧмсӧ, сӧмын оз дыр кад кежлӧ.

Еремей 30:7

Сійӧ луныс лоӧ зэв повзьӧдана, сэтшӧм луныс эз на вӧвлы! Яковсянь чужысьяслы сійӧ луныс лоӧ сьӧкыд, но найӧ мездмасны.

Исай 21:9

Со, верзьӧмаяс кыкӧн-кыкӧн локтӧны вӧвъяс вылын». Сэсся кар видзысь юӧртіс: «Киссис, киссис Вавилон. Сылысь бӧлбанъяссӧ жуглӧма, найӧ куйлӧны му вылын».

Лыд 16:34

Налӧн горзӧмысь матын сулалысь израильсаяс пышйисны сэтысь, ӧд повзисны, мый муыс ньылыштас тшӧтш найӧс.

Исай 47:9

Но ӧти лунӧ, тӧдлытӧг, суас тэнӧ ӧтиыс и мӧдыс: тэ воштан челядьтӧ и колян дӧваӧн. Ставыс тайӧ воас тэ вылӧ ыджыд шыӧн, кӧть тэ ёна туналан-кимӧститчан.

Езекиль 32:9

Ме весьӧпӧрта войтыръясӧс, кор тэнӧ бырӧдӧм йылысь юӧрсӧ паськӧда войтыръяс пӧвстын, тэныд тӧдтӧм муясын.

Восьтӧм 11:8

Налӧн шойясыс кутасны куйлыны ыджыд карлӧн туй вылас. Тайӧ карсӧ позьӧ ӧткодявны Содомкӧд да Египеткӧд, ӧд тайӧ карас вӧлі тувъялӧма налысь Господьӧс.

Восьтӧм 16:19

Сэки ыджыд Вавилон кар киссис куим пельӧ, и мукӧд войтыръяслӧн каръясыс тшӧтш киссисны. Енмыс эз вунӧд ыджыд Вавилон кар йылысь да сетіс сылы юны вина чашаысь, мый вӧлі тырӧма Сылӧн скӧрлунӧн.

Восьтӧм 18:18

Найӧ видзӧдісны сотчысь карлӧн тшыныс вылӧ да горзісны: «Позяс ӧмӧй ӧткодявны тайӧ ыджыд карсӧ кутшӧмкӧ мӧд каркӧд?»

Восьтӧм 18:21

Сэсся вына андел босьтіс изки кодь ыджыд из да шыбитіс сійӧс саридзас. Сійӧ шуис: – Дзик тадзи лоӧ шыбитӧма ыджыд Вавилон карӧс, сійӧ вошас пыр кежлӧ!