Малакий 1:4 - Коми Библия 2023

⁴ Эдом войтыр кӧ шуас, миянлысь каръяснымӧс пӧ жугӧдӧма-пазӧдӧма, но ми пӧ выльысь лэптам найӧс, Господь Саваоф сэки воча шуас: – Мед найӧ выльысь лэптасны, а Ме жугӧда. Налысь мусӧ нимтасны пеж муӧн, найӧс шуасны войтырӧн, кодӧс Господь ёрӧма пыр кежлӧ.

Малакий 1:4 Referans Kwoze

Езекиль 25:14

Аслам Израиль войтыр отсӧгӧн Ме водзӧс перъя эдом войтырлысь. Найӧ вӧчасны эдом войтырлы Менам скӧрлун да ярлун серти. Сэки эдомсаяс тӧдмаласны Менсьым водзӧс перйӧмӧс, – висьталӧ Господь Ыджыдыс.

Езекиль 35:9

Тэнӧ, Сеир керӧсвыв му, Ме пыр кежлӧ вӧча овтӧминӧн, тэнсьыд каръястӧ некод выльысь оз овмӧд. Сэки ті тӧдмаланныд, мый Ме – Господь.

Еремей 31:17

Тэнад эм лача локтанаыс вылӧ, – висьталӧ Господь, – тэнад челядьыд бӧр бергӧдчасны асланыс муӧ.

Исай 34:10

Сійӧ пондас сотчыны лун и вой, сылӧн тшыныс пондас кыпӧдчыны дугдывтӧг. Нэмъяссянь нэмъясӧдз некод оз кут овны сэні, мортлӧн кокыс оз тувччыв сэтчӧ нэмъяс чӧж.

Исай 34:5

– Енэжысь коланасӧ бырӧдӧм бӧрын Менам шыпуртӧй усяс Эдом вылӧ, медым дзикӧдз бырӧдны войтырӧс, кодӧс Ме мыжді.

Исай 11:14

Рытыввылын найӧ уськӧдчасны филистимсаяс вылӧ, асыввывса олысьяслысь куштасны озырлунсӧ. Эдом да Моав лоӧны налӧн кипод улынӧсь, аммон войтыр сетчас налы.

Малакий 1:3

а Исавӧс Ме мустӧмті. Исавлысь керӧсвыв мусӧ Ме вӧчи овтӧминӧн, сеті сійӧс шакалъяслы.

Амос 6:2

Мунӧй Калне карӧ да видзӧдлӧй, сэтысянь мунӧй ыджыд Хамат карӧ, лэччӧй филистимса Геф карӧ. Ті ӧд наысь абу ёнджыкӧсь. Налӧн ӧмӧй муныс тіянысь ыджыдджык?

Езекиль 11:10

и ті куланныд шыпурт помысь. Ме мыжда тіянӧс Израиль керӧсъяс вылын, и ті тӧдмаланныд, мый Ме – Господь.

Бӧрданкыв 3:37

Кодлӧн шуӧмыс инӧ? Оз-ӧ Господьлӧн, коді тшӧктӧ иннысӧ?

Исай 10:4

Пленӧ босьтӧмаяс пӧвстын ті сувтанныд пидзӧс выланыд, кулӧмаяс моз усянныд. Но тайӧн Господьлӧн скӧралӧмыс эз на помась, Сылӧн киыс пыр на нюжӧдӧма, медым мыждыны.

Шусьӧгъяс 21:30

Господьтӧгыд мывкыдлуныс абу, вежӧрыс абу, и туйдӧдӧмыс абу.

Псалтыр 137:7

Кор ме пикӧ воа, Тэ ловзьӧдан менӧ, Тэ нюжӧдан китӧ да доръян менӧ мустӧмтысьяслӧн скӧрлунысь, веськыд кинад Тэ мездан менӧ.

Псалтыр 127:1

Крамӧ мунігӧн сьылӧм. Шуда сійӧ, коді полӧ Господьысь, ветлӧ Сылӧн туйясӧд.

Иов 34:29

Енмыс кӧ чӧв ланьтас, коді вермас мыжавны Сійӧс? Енмыс кӧ вевттяс чужӧмбансӧ, коді вермас аддзыны Сійӧс? Сійӧ ыджыдалӧ войтыр вылын и торъя морт вылын,

Иов 12:14

Сійӧ кӧ жугӧдас, выльысь он лэпты, пуксьӧдас кӧ мортсӧ иган сайӧ, сэтысь сійӧ оз пет.

Иов 9:4

Енмыс – ыджыд мывкыдлуна, вынасьыс-вына, Сылы паныд кыпӧдчӧмысь мортлы бурыс оз ло.

Матвей 12:30

Коді абу Мекӧд, сійӧ Меным паныд, коді оз чукӧрт Мекӧд, сійӧ разӧдӧ.

Еремей 5:17

Найӧ сёясны тэнсьыд кӧдзастӧ и няньтӧ, виасны тэнсьыд пиянтӧ и нывъястӧ, сёясны тэнсьыд ыжъястӧ и ӧшъястӧ, виноградтӧ и инжиртӧ. Шыпуртӧн найӧ бырӧдасны изкаръяснытӧ, мый вылӧ ті лача кутанныд.

Еремей 49:8

Деданын олысьяс, бӧр бергӧдчӧй, пышйӧй, дзебсьӧй изкыртаӧ, ӧд Ме мӧдӧда Исавсянь чужысьяслы бырӧдӧм, инда найӧс мыждан кад.

Еремей 49:20

Кывзӧй, мый Господь шуис Эдом йылысь, мый шуис вӧчны Теманын олысьяслы. Весиг налысь медічӧтъяссӧ пышйӧдасны, налысь оланінъяссӧ куштасны.

Езекиль 25:13

Та вӧсна Господь Ыджыдыс тадзи висьталӧ: Ме лэпта киӧс Эдом вылӧ да ӧтитӧг бырӧда сэтысь йӧзӧс да ыж-мӧскӧс, вӧча Эдом муысь овтӧмин. Теман карсянь Дедан карӧдз ставныс куласны шыпурт помысь.

Езекиль 26:14

Ме вӧча тэысь изкырта, кӧні чери кыйысьяс пондасны тӧлӧдны тывъяснысӧ. Тэнӧ некод выльысь оз лэпты. Тайӧс шуи Ме, Господь, – висьталӧ Господь Ыджыдыс.

Езекиль 35:4

Каръяссьыд вӧча из чукӧръяс, а тэ лоан овтӧминӧн. Сэки тэ тӧдмалан, мый Ме – Господь.

Амос 3:15

Ме бырӧда тӧвся и гожся керкаяс, слӧн лыӧн мичмӧдӧм керкаяс киссясны. Уна керка жмуткысяс, – висьталӧ Господь.

Амос 5:11

Ті дзескӧданныд гӧльясӧс, босьтанныд налысь няньсӧ. Та вӧсна лоас тадзи: ті лэптанныд керкаяс кералӧм ыджыд изъясысь, но сэтчӧ онӧ овмӧдчӧй, ті пуктанныд бур виноград йӧръяс, но сэтчӧс вотӧсысь пычкӧм винасӧ онӧ юӧй.

Амос 6:11

Ӧд Господь тшӧктас пазӧдны ыджыд керкаяс, дзикӧдз жуглыны ичӧт керкаяс.

Авдий 1:1

Авдийлы Енсянь восьтӧм. Ми кывлім Господь Ыджыдсянь, Сійӧ Эдом йылысь висьталіс, мый войтыръяс дінӧ мӧдӧдӧма юӧртысьӧс, сійӧс мӧдӧдӧма шуны: «Чеччӧй, петамӧй тышӧ Эдомлы паныд!»

Авдий 1:10

Ассьыд Яков воктӧ дзескӧдӧм вӧсна тэнӧ лоӧ янӧдӧма, Исав, тэнӧ лоӧ пыр кежлӧ бырӧдӧма.

Псалтыр 33:10

Полӧй Господьысь, Сылӧн вежа войтыр! Сыысь полысьяслӧн ставыс лоӧ тырмымӧн.

Еремей 49:7

Эдом войтыр йылысь Господь Саваоф тадзи висьталӧ: – Теманын ӧмӧй абу мывкыдлуныс? Вежӧра йӧз ӧмӧй оз вермыны туйдӧдны? Найӧ ӧмӧй воштісны мывкыдлунсӧ?

Амос 1:11

Господь тадзи висьталӧ: – Эдом войтыр мыж бӧрся мыж вӧчисны, та вӧсна Ме ог веж Ассьым мыждана шуӧмӧс. Найӧ ӧд шыпуртӧн дзескӧдісны вокъяснысӧ, эз жалитны найӧс, налӧн ыпъялан скӧрлуныс эз дугдыв, лӧгалӧмыс эз куслы.