Исай 46:7 - Коми Библия 2023

⁷ Найӧ лэптӧны ассьыныс енсӧ пельпом выланыс, нуӧны сійӧс да сувтӧдӧны аслас местаӧ. Сійӧ сулалӧ, оз вешйыв места вывсьыс. Найӧ горзӧмӧн шыасьӧны сы дінӧ, но сійӧ оз вочавидз, оз мезды шогъясысь.

Исай 46:7 Referans Kwoze

Исай 45:20

Чукӧртчӧй да локтӧй, матыстчӧй ставныд, кодъяс ловйӧн колинныд войтыръяс пӧвстысь. Вежӧртӧмӧсь найӧ, кодъяс новлӧдлӧны ассьыныс пу идолъяснысӧ да кевмысьӧны енлы, коді оз мезды.

Еремей 10:5

Бӧлбанъяс – град йӧрын сулалысь повзьӧдчанторъяс кодьӧсь, сёрнитны оз вермыны. Найӧс новлӧдлӧны, ӧд асьныс ветлыны оз вермыны. Энӧ полӧй наысь, ӧд лёксӧ вӧчны найӧ оз вермыны, и бурсӧ вӧчны тшӧтш оз вермыны.

Исай 46:1

Усис Вил, муас усис Нево, тайӧ идолъяссӧ кыскӧны ас выланыс мудзӧм пемӧсъяс, бӧлбанъясныд сьӧктӧдӧны найӧс.

Иона 1:5

Кывтысьяс ёна повзисны. Быдӧн кутіс кевмысьны аслас енлы. Корабльсӧ кокньӧдӧм могысь шыблалісны саридзӧ ставсӧ, мый позис шыбитны. А Иона сійӧ кадас чорыда узис корабль пытшкын.

Даниил 3:1

Навукодоносор ӧксы тшӧктіс вӧчны квайтымын гырддза судта да квайт гырддза пасьта зарни бӧлбанӧс да сувтӧдны сійӧс Вавилон муӧ Дура ласта вылӧ.

Еремей 2:28

Но кӧні тіян киӧн вӧчӧм енъясныд? Вермӧны кӧ, найӧ мед отсаласны тіянлы шог дырйиныд. Ӧд тэнад, Иуда войтыр, сы мында жӧ енмыс, мыйта тэнад карыд.

Ӧксыяслӧн 3 небӧг 18:40

Илля шуис войтырыслы: «Босьтӧй Вааллысь пророкъяссӧ, энӧ лэдзӧй некодлы пышйыны». Вааллысь пророкъяссӧ босьтісны. Сэсся Илля нуӧдіс найӧс Кишон ю дорӧ да сэні ставнысӧ виис.

Ӧксыяслӧн 3 небӧг 18:26

Найӧ босьтісны ӧшкӧс да начкисны сійӧс. Сэсся асывсяньыс луншӧрӧдзыс найӧ горзісны: «Ваал! Кыв миянӧс!» Найӧ весиг чеччалісны висьпуктанін гӧгӧр, но некод эз вочавидз.

Ӧксыяслӧн 1 небӧг 5:3

Водз асывнас азотса олысьяс локтісны юрбитанінӧ да аддзисны, мый Дагон бӧлбан кымынь куйлӧ Господьлӧн куд водзын. Дагонӧс босьтісны да сувтӧдісны бӧр аслас местаӧ.

Исай 37:38

Кор Сеннахирим юрбитіс аслас Нисрох нима енлӧн крамын, сылӧн Адрамелек да Сарецер пияныс виисны сійӧс шыпуртӧн. Сэсся найӧ пышйисны Арарат муӧ. Сеннахирим пыдди ӧксыӧ пуксис сылӧн Асардан пиыс.

1 Коринфӧ 12:2

Кор ті вӧлінныд ентӧдтӧмъясӧн на, тіянӧс ёна кыскис сёрниттӧм идолъяс дінӧ. Ті асьныд тӧданныд та йылысь.

Исай 40:20

А гӧль морт, коді оз вермы тадзи вӧчнысӧ, бӧрйӧ сісьмытӧм пу, корсьӧ аслыс кужысь вӧчасьысьӧс, медым вӧчны зумыда сулалысь бӧлбанӧс.

Исай 41:7

Дорччысь ышӧдӧ кӧрт сывдысьӧс, кӧрт лист мольӧдысь ышӧдӧ дорччысьӧс, шуалӧ, бура пӧ вӧчӧмыд, сэсся тувъялӧ кӧрттувйӧн, медым вӧчӧмторйыс эз вӧр.

Исай 41:28

Ме видзӧді, но тіян пиысь эг аддзы некодӧс, коді эськӧ вермис туйдӧдны, кодлысь эськӧ верми юавны, и коді эськӧ вермис вочавидзны.

Исай 44:12

Дорччысь вӧчӧ кӧрт нӧш, кучкалӧ сыӧн биа ӧгыръяс вылын донӧдӧм вӧчӧмторсӧ, артмӧдӧ бӧлбанӧс аслас вына киӧн. Ачыс сійӧ сёйны кӧсйӧ, вынтӧммӧ, сылӧн горшыс косьмӧ, рудзмунӧ.

Исай 47:15

Татшӧмӧсь найӧ, кодъяскӧд тэ уджалін, кодъяскӧд том кадсяньыд тэ вузасин-ньӧбасин. Найӧ быдӧн мунісны асланыс туйӧд, некод оз мезды тэнӧ.

Ӧксыяслӧн 3 небӧг 18:29

Луншӧр кадсянь рытъя вись ваян кадӧдз найӧ этшсьыс петмӧн горзісны. Но некод эз вочавидз. [Тишбиса Илля шуис Вааллӧн пророкъяслы: «Вешйӧй. Ӧні ме кута вись вайны». Мӧдъясыс ланьтӧмӧн вешйисны.]

Исай 41:29

Войтыръяслӧн енъясыс нинӧм кодьӧсь, бӧлбанъясыс тӧвру кодьӧсь, нинӧм оз вермыны вӧчнысӧ.

Еремей 11:12

Сэки Иуда каръясын да Ерусалимын олысьяс шыасясны енъяс дінӧ, кодъяслы найӧ сотӧны висьяс, но налӧн енъясыс оз мездыны найӧс шог дырйиныс.