Езекиль 39:10 - Коми Библия 2023

¹⁰ Видз-муяс вылысь да вӧрысь налы оз ковмы ваявны пес, ӧд вӧрӧглӧн тышкасянторъясыс лоӧны налы пес пыдди. Израиль войтыр куштас найӧс, кодъяс сійӧс куштісны, мырддяс мырддялысьяслысь эмбурсӧ, – висьталӧ Господь Ыджыдыс.

Езекиль 39:10 Referans Kwoze

Исай 33:1

Курыд шог тэныд, бырӧдысь, кодӧс эз на бырӧдны. Курыд шог тэныд, ылӧдчысь, кодӧс эз на ылӧдлыны. Кор тэ дугдан бырӧднытӧ, тэнӧ асьтӧ бырӧдасны. Кор тэ дугдан ылӧдчынытӧ, тэнӧ асьтӧ ылӧдласны.

Исай 14:2

да вайӧдасны найӧс Израиль муӧ. Сэні, Господьлӧн му вылын, Израиль войтыр босьтас тайӧ йӧзсӧ аслыс кесйӧгӧ. Израиль войтыр босьтас пленӧ дзескӧдысьясӧс да кутас ыджыдавны нартитысьяс вылын.

Микей 5:8

Войтыръяс пӧвстын Яков рӧдлӧн колясыс лоӧ вӧрса зверъяс пӧвстын олысь лев кодь, ыж чукӧр вылӧ уськӧдчысь том лев кодь. Сійӧ уськӧдчӧ, талялӧ-косявлӧ, и сыысь мездысьны некод оз вермы.

Восьтӧм 18:6

Мынтысьӧй сылы сійӧн жӧ, мыйӧн ачыс мынтысис тіянлы. Кык пӧвстӧн мынтысьӧй сылӧн уджъяссьыс. Чашаас, кытысь сійӧ юкталіс тіянӧс, дасьтӧй сылы винасӧ кык пӧв курыдджыкӧс на.

Восьтӧм 13:10

Коді мӧдӧс дзескыдінӧ пуксьӧдас, ачыс сэтчӧ веськалас. Коді шыпуртӧн виас, сійӧс асьсӧ шыпуртӧн виасны. Татшӧм кадас вежа войтырлы колӧ зумыдлун да эскӧм.

Матвей 7:2

Ӧд тіян мыждӧмныд ас выланыд бӧр воас. Асланыд мурталӧм серти тіянлы мурталасны.

Аввакум 3:8

Господьӧй, Тэ пуксин Аслад вӧвъяс вылӧ, Аслад тарантасъясӧн петін, медым вермыны. Юяс вылӧ ӧмӧй Тэ скӧралан, шоръяс вылӧ ӧмӧй лӧглуныд петӧ, саридз вылӧ ӧмӧй скӧрлуныд киссьӧ?

Аввакум 2:8

Кыдзи тэ куштін войтыръясӧс, тадзи жӧ войтыръяс пӧвстысь колясыс вӧчас тэкӧд. Йӧзлысь вирсӧ кисьтӧмысь, муяссӧ, каръяссӧ да сэтчӧс олысьяссӧ бырӧдӧмысь найӧ тэнӧ асьтӧ куштасны.

Петӧм 12:36

Господь небзьӧдіс египетсалысь сьӧлӧмсӧ Израиль войтыр дінӧ, и египетсаяс сетісны налы став корӧмторсӧ. Тадзи Израиль войтыр петкӧдіс египетсалысь озырлунсӧ.

Петӧм 3:22

Быд ань мед корас орччӧн олысь да ас ордас олысь аньяслысь эзысь, зарни да паськӧм. Наӧн мичмӧдӧй ныв-пинытӧ. Тадзи ті петкӧданныд египетсалысь озырлунсӧ».

Езекиль 39:11

Сійӧ лунӧ Ме сета Гоглы дзебанін Израиль муысь, Ветлысь-мунысьяслӧн ковтысысь, саридзсянь асыввылысь. Ковтыссӧ кутасны нимтыны Гог тышкайӧзлӧн ковтысӧн, ӧд найӧс дзебасны сэтчӧ. Налӧн шойнаыс тупкас ветлысь-мунысьяслысь туйсӧ.

Закар 14:14

Иуда войтыр тшӧтш петас тышӧ Ерусалимлы паныд. Ерусалимын олысьяс босьтасны на гӧгӧр олысь войтыръяслысь став озырлунсӧ: зэв уна эзысь, зарни да паськӧм.