Еремей 33:9 - Коми Библия 2023

⁹ Мувывса став войтыръяс водзын тайӧ карыс ваяс Меным нимкодьлун, ошкӧм да нималӧм. Кор войтыръяс кыласны бурыс да лӧньлуныс йылысь, мый Ме сета тайӧ карас олысьяслы, найӧс полӧм-дзӧрӧм босьтас.

Еремей 33:9 Referans Kwoze

Исай 60:5

Тэ аддзан тайӧс да пондан нимкодясьны, тэнад сьӧлӧмыд пондас чеччыны нимкодьысла, ӧд саридзса озырлун ваясны тэныд, войтыръяслысь озырлунсӧ козьналасны тэныд.

Еремей 13:11

Кыдзи мортлӧн вӧньыс вир-яй бердас, сідзи Ме босьті Ас бердӧ Израиль да Иуда войтыръясӧс, медым найӧ вӧліны Менам войтырӧн да ошкисны-нимӧдісны Менӧ, – висьталӧ Господь. – Но найӧ эз кывзыны Менӧ.

Исай 62:7

Дугдывтӧг кевмысьӧй Господьлы, кытчӧдз Сійӧ выльысь оз сувтӧд Ерусалим, кытчӧдз Сійӧ оз нимӧд Ерусалим карсӧ став му пасьталаыс.

Неемий 6:16

Кор миянӧс дзескӧдысьяс да миян гӧгӧр олысь войтыръяс кылісны та йылысь, повзисны. Налы яндзим лои, ӧд гӧгӧрвоисны, мый тайӧ уджсӧ вӧчны миянлы отсаліс миян Енным.

Осий 3:5

Но сэсся Израиль войтыр бӧр бергӧдчас да корсяс ассьыс Господь Енсӧ да Давид ӧксысӧ. Бӧръя лунъясӧ найӧ пондасны полӧмӧн пыдди пуктыны Господьӧс да Сылысь бурлунсӧ.

Еремей 31:4

Ме выльысь кыпӧда тэнӧ, и тэнӧ лоӧ кыпӧдӧма, Израиль ныв. Тэ бара босьтан киад тимпан, кутан йӧктыны гажӧдчысьяскӧд.

Исай 62:12

Найӧс шуасны Вежа войтырӧн, Господьлӧн мездмӧм йӧзӧн, а тэнӧ шуасны Мусаӧн, Карӧн, мый оз ло эновтӧма.

Псалтыр 40:3

дорйӧ сійӧс да видзӧ сылысь олӧмсӧ. Аслас муас сійӧс шуӧны майбырӧн, Господь оз сет сійӧс мустӧмтысьяслӧн киӧ.

Закар 12:2

«Ме вӧча Ерусалимӧс сы гӧгӧр олысь войтыръяслы вина тыра дозйӧн. Найӧ пондасны юны сэтысь да кодавны. Иуда тшӧтш кутас юны-кодавны, кор Ерусалимӧс лоӧ кытшалӧма.

Еремей 44:8

Ті дӧзмӧданныд Менӧ асланыд киӧн вӧчӧмторъясӧн. Ті сотанныд висьяс мукӧд енъяслы Египет муын, кытчӧ ті овмӧдчинныд. Тадзи ті асьнытӧ бырӧданныд. Мувывса став войтыръяс кутасны ёрны да лёкӧдны тіянӧс.

Еремей 29:1

Еремей пророк мӧдӧдіс Ерусалимысь гижӧд пленӧ нуӧдӧм войтырлӧн юрнуӧдысьяслы, попъяслы, пророкъяслы да став войтырыслы, кодъясӧс Навукодоносор нуӧдіс Ерусалимысь Вавилонӧ.

Еремей 3:17

Сійӧ кадас Ерусалим карсӧ шуасны Господьлӧн юралан пуклӧсӧн. Став войтыръясыс чукӧртчасны Ерусалимӧ, медым ыдждӧдлыны Господьлысь нимсӧ. Найӧ оз нин кутны овны асланыс лёк да чорыд сьӧлӧмныс серти.

Эсфир 8:17

Быд муын да быд карын – быдлаын, кӧні юӧртісны ӧксылысь тшӧктӧмсӧ, иудейяслӧн вӧлі нимкодьлун да долыдлун, найӧ сёйисны-юисны да гажӧдчисны. Мукӧд войтыръясысь унаӧн лоисны иудейясӧн, ӧд полісны наысь.

2 Каднебӧг 20:29

Став муясын олысьяс кутісны повны Енсьыс, кор найӧ кылісны, мый Ачыс Господь тышкасис Израильлӧн вӧрӧгкӧд.

Исай 55:13

Йӧн пыдди кутас быдмыны кипарис, петшӧр пыдди – мирт. Ставыс тайӧ лоӧ Господьӧс нимӧдӧм вылӧ, лоӧ нэмъяс кежлӧ индысьпасӧн.

Исай 62:4

Тэнӧ оз нин шуны Эновтӧмаӧн, тэнсьыд мутӧ оз шуны Кушинӧн, но тэнӧ нимтасны Господьлӧн олан гажӧн, тэнсьыд мутӧ шуасны Гӧтырӧн, ӧд тэ муса Господьлы, и тэнад муыд оз коль верӧстӧг.

Исай 64:2

биын сотчысь ув моз, би вылын пузьысь ва моз. Лэччы, Господьӧй, медым Тэнӧ мустӧмтысьяс тӧдісны Тэнсьыд нимтӧ! Тэ водзын мед дзӧрӧны-тіралӧны войтыръяс.

Еремей 3:19

– Ме, Господь, мӧвпышті, мый войтыръяс пӧвстысь Ме бӧръя тэнӧ, сета тэныд бур му, вичмӧда войтыръяслысь мича мусӧ. Ме чайті, тэ пондан шуны Менӧ Батьӧн да он бергӧдчы Меысь.

Еремей 4:2

Тэ кӧ ловъя Господь водзын кыв сетан, сідзкӧ, веськыда да збыльыс серти тайӧс вӧчан, сэки войтыръяслы лоӧ бурсиӧмыс Господьсянь, и найӧ пондасны ошкыны Сійӧс.

Еремей 16:19

– Господьӧй, Тэ – менам выныс, Тэ – менам изкарыс, менам шог дырйи сайӧдчаніныс. Му помсяньыс локтасны Тэ дінӧ войтыръяс, найӧ шуасны: «Миян батьяслы вичмис сӧмын ылӧгыс – вичмисны идолъяс, кодъяслы весьшӧрӧ юрбитӧны, ӧд таысь нинӧм бурыс абу».

Еремей 24:6

Налы бур вылӧ Ме веськӧда Ассьым синмӧс налань да бӧр бергӧда найӧс тайӧ муас. Ме ёнмӧда найӧс, ог пазӧд, Ме вужйӧда найӧс, ог нетшышт.

Еремей 32:42

Господь тадзи висьталӧ: Тайӧ войтырыслы Ме мӧдӧді уна лёксӧ, но тадзи жӧ Ме мӧдӧда налы бурсӧ, мый Ме кӧсйыси налы.

Еремей 33:14

«Воасны лунъяс, – висьталӧ Господь, – кор Ме збыльмӧда Ассьым кӧсйысьӧмӧс, мый шулі Израиль войтырлы да Иуда войтырлы.

Еремей 49:25

Эновтӧма нималана карӧс, мыйӧн ме нимкодяси.

Езекиль 26:20

Ме шыбита тэнӧ пыдӧстӧминӧ, мӧдӧда важӧн нин кулӧмаяс пӧвстӧ, овмӧда му пыдӧсӧ, важӧн нин пазӧдӧм каръяс пӧвстӧ. Тэнад керкаясыд кушмасны, но ловъяяслысь мусӧ Ме мичмӧда.

Езекиль 39:13

Став войтырыс кутас дзебны найӧс. Сійӧ лунӧ, кор Ме петкӧдла Ассьым вынӧс, Израиль войтырлы лоӧ нималӧм, – висьталӧ Господь Ыджыдыс.

Индӧд 30:5

да вайӧдас батьясныдлӧн муӧ, и ті бара босьтанныд сійӧс аслыныд. Сійӧ вӧчас тіянлы бурсӧ, батьясныдлы дорысь тіянлы унджык чужысьӧс сетас.

Исай 43:21

Тайӧ войтырсӧ Ме Аслым вӧчи, сійӧ кутас кыпӧдны Меным ошкӧмсӧ.

Исай 62:1

Сион вӧсна ог кут чӧв овны, Ерусалим ради ог дугды висьтавлыны, кытчӧдз сылӧн веськыдлуныс оз воссьы югыд моз, сылӧн мездмӧмыс оз тыдовтчы ӧзъялысь би моз.

Еремей 31:14

Попъясӧс Ме верда чӧскыд сёянӧн, Менам войтырӧй пӧтас Менам бур сетӧмторъясӧн, – висьталӧ Господь.

Езекиль 36:35

Сэки шуасны, тайӧ овтӧм муыс пӧ Эдэм сад кодь лоӧма, тайӧ кушмӧм-киссьӧм каръяссӧ пӧ зумыдмӧдӧма да овмӧдӧма.

Закар 1:17

Нӧшта юӧрт, мый Господь Саваоф тадзи висьталӧ: – Менам каръясын бара пуксяс бур олӧм. Господь бара бурӧдас Сионӧс, выльысь бӧръяс Ерусалим кар».