Бӧрданкыв 1:10 - Коми Библия 2023

¹⁰ Дзескӧдысьяс нюжӧдісны кинысӧ, медым петкӧдны Ерусалимысь став донаторсӧ. Сійӧ аддзис, кыдзи ентӧдтӧмъяс пырисны вежаинӧ, а Тэ ӧд шулін на йылысь, мый налы оз позь лоны Тэнад чукӧртчӧм войтыр пӧвстын.

Бӧрданкыв 1:10 Referans Kwoze

Индӧд 23:3

Аммон да моав войтыръясысь некод оз вермы лоны Господь войтырлӧн чукӧртчӧмын, весиг дасӧд чужанвужйӧдз насянь чужысьяс.

Еремей 51:51

– Миянӧс янӧдісны, ми кылім лёкӧдӧм, миянлы лои юръяндзим, ӧд йӧз муысь локтысьяс пырисны Господьлӧн крамса вежаинъясӧ.

Бӧрданкыв 1:7

Коньӧр туйын олігӧн да оланінтӧг колигӧн Ерусалимлы тӧд вылас уси став бурыс, мый сылӧн водзынсӧ вӧлі. Войтырыс кулӧ дзескӧдысьлӧн киысь, Ерусалимлы некод оз отсав. Дзескӧдысьяс сералӧмӧн видзӧдӧны, кыдзи сійӧс бырӧдӧны.

Неемий 13:1

Сійӧ лунӧ Израиль войтырлы лыддисны Мӧисейлысь небӧг. Сэні вӧлі гижӧма, мый аммон да моав войтыръясысь некод оз вермы лоны Ен войтырлӧн чукӧртчӧмын.

Марк 13:14

«Кор ті аддзанныд пеж зывӧксӧ сэтысь, кӧні сылы оз позь лоны, сэки Иудея муын олысьяс мед пышъясны керӧсъясӧ. Тайӧ пеж зывӧкыс йылысь Даниил пророк на висьтавліс – лыддьысьысь мед гӧгӧрвоӧ!

Езекиль 44:7

Ті вайӧданныд Менам вежаинӧ йӧз муысь локтысьясӧс, сьӧлӧмнас да вир-яйнас вундыштчытӧмъясӧс. На дырйи Меным гос да вир вайӧмӧн ті пежаланныд Менсьым крамӧс. Асланыд пеж уджъясӧн ті торканныд йитӧдӧс, мый Ме кӧрталі тіянкӧд.

Езекиль 9:7

Сэсся Господь шуис квайт мортыслы: «Тыртӧй крам йӧрсӧ шойясӧн, тадзи пежалӧй крамсӧ, а сэсся петӧй сэтысь». Найӧ петісны да пондісны виавны карса олысьясӧс.

Езекиль 7:22

Ме бергӧда Израиль войтырысь чужӧмӧс, и найӧ пежаласны Менсьым дона керкаӧс, мырддялысьяс пырасны сэтчӧ да пежаласны сійӧс.

Еремей 52:13

Сійӧ сотіс Ерусалимысь Господьлысь крамсӧ, ӧксылысь керкасӧ да став ыджыд керкасӧ.

Еремей 20:5

Тайӧ карыслысь озырлунсӧ да эмбурсӧ – ставсӧ, мый могысь тані олысьяс уджалісны, тшӧтш иудаса ӧксыяслысь став донаторсӧ Ме сета вӧрӧг киӧ. Вӧрӧг ставсӧ куштас-мырддялас да нуас аскӧдыс Вавилонӧ.

Еремей 15:13

Став тэнад мыжысь, мый тэ, Иуда войтыр, вӧчин аслад му пасьтала, тэнсьыд эмбуртӧ да озырлунтӧ Ме сета мырддявны, некод оз вештысь сыысь.

Исай 63:18

Сӧмын дженьыдик кад Тэнад вежа войтырыд ыджыдаліс аслас му вылын, а ӧні Тэнсьыд вежаинтӧ талялӧны миянӧс дзескӧдысьяс.

Еремей 50:28

Кылӧ пышйӧмаяслӧн гӧлӧс шыныс, найӧ мездмӧмаӧсь Вавилонысь. Сионын найӧ висьталӧны, мый Господь, миян Енным, водзӧс перйис Аслас крамыс вӧсна.

Индӧд 23:4

Ӧд Египетысь петӧм бӧраныд, кор ті матыстчинныд на дінӧ, найӧ эз вочаавны тіянӧс ваӧн да няньӧн, а мӧдарӧ, медалісны месопотамияса Петор карысь Веорлысь Валаам писӧ, мед ёрны тіянӧс.

2 Каднебӧг 36:18

Господь Енлӧн крамысь став дозмук-кӧлуйсӧ, ыджыдӧс и ичӧтӧс, крамысь став озырлунсӧ, ӧксылысь да сылӧн киподувса юралысьяслысь озырлунсӧ – ставсӧ вайисны Вавилонӧ.

Еремей 27:19

Кор вавилонса Навукодоносор ӧксы нуӧдіс Ерусалимысь Вавилонӧ пленӧ иудаса Еконей ӧксыӧс, Ехоякимлысь писӧ, тшӧтш Иудаысь да Ерусалимысь став тӧдчана йӧзсӧ, сійӧ эз босьт аскӧдыс сюръяяс, вайӧртӧд, джекъяс да став дозмук-кӧлуйсӧ. А мый колис Господьлӧн крамын, иудаса ӧксылӧн керкаын да Ерусалимын, сы йылысь Господь Саваоф, Израильлӧн Ен, тадзи висьталӧ: