Ап. уджъяс 20:7 - Коми Библия 2023

⁷ Вежонса медводдза лунӧ сэтчӧс велӧдчысьяс чукӧртчисны нянь чегны. Павеллы аскинас колӧ вӧлі петны туйӧ, та вӧсна сійӧ дыркодь сёрнитіс накӧд. Сёрниыс нюжаліс войшӧрӧдз.

Ап. уджъяс 20:7 Referans Kwoze

1 Коринфӧ 16:2

вежонса медводдза лунӧ быдӧн торйӧдӧй сьӧмнытӧ мыйта верманныд да видзӧй сійӧс ас орданыд. Сэки менам локтігкежлӧ тіян лоӧ чукӧртӧма нин.

Ап. уджъяс 2:42

Эскысьяс став сьӧлӧмнас кутчысисны апостолъяслӧн велӧдӧмӧ. Найӧ пыр ӧтлаын чукӧртчывлісны, нянь чегисны да кевмысисны.

Иоан 20:19

Шойччан лун бӧрын рытнас велӧдчысьяс чукӧртчисны ӧтлаӧ. Иудейяслӧн веськӧдлысьясысь полӧм вӧсна найӧ йигналісны ӧдзӧсъяссӧ. Виччысьтӧг локтіс Исус, сувтіс на шӧрӧ да шуис: «Лӧнь олӧм тіянлы!»

Иоан 20:1

Шойччан лун бӧрын асъя рӧмыднас Магдала Марья локтіс дзебанінӧ. Сійӧ аддзис, мый изсӧ пыранінсьыс вӧлі вештӧма.

Восьтӧм 1:10

Господьлӧн лунӧ ме вӧлі тырӧма Лолӧн. Сэки мыш сайсянь ме кылі гора шы, тайӧ вӧлі труба шы кодь. Сійӧ шуис: «Ме эм Альфа и Омега, Медводдзаыс и Медбӧръяыс.

Ап. уджъяс 20:11

Сэсся Павел бӧр кайис вылі судтаас. Нянь чегӧм бӧрын сійӧ сёйыштіс да бура дыр на, югдытӧдзыс, сёрнитіс велӧдчысьяскӧд, сэсся муніс.

Ап. уджъяс 28:23

Урчитӧм лунӧ локтіс Павел ордӧ зэв уна йӧз. Павел асывсяньыс рытӧдзыс висьтавліс налы Енлӧн Юралӧм йылысь. Мӧисей Индӧд да пророк гижӧдъяс вылӧ мыджсьӧмӧн эскӧдіс найӧс Исус йылысь.

Ап. уджъяс 20:9

Ӧшинь вылас пукаліс Евтик нима том морт. Павеллӧн дыр сёрнитӧмысь сійӧ чорыда унмовсис да ун йывсьыс усис коймӧд судтасяньыс. Муысь лэптігӧн аддзисны, мый сійӧ кулӧма.

Лука 24:35

Тайӧ кыкыс висьталісны, мый лои туйын, да кыдзи тӧдісны Исусӧс нянь чегигас.

1 Коринфӧ 15:10

Но Енлӧн буралӧмыс вӧсна ме сэтшӧм, кутшӧм эм. Сылӧн буралӧмыс ме дінӧ эз вӧв весьшӧрӧ, ӧд ме уджалі мукӧд апостол дорысь ёнджыка на. Дерт, ме эг ачым уджав, а ме пытшкын олысь Енлӧн буралӧмыс уджаліс.

1 Коринфӧ 10:16

Ми бурсиам чашасӧ да чегъялам няньсӧ. Оз-ӧ тайӧ чашаыс йит миянӧс Кристос виркӧд? Оз-ӧ тайӧ няньыс йит миянӧс Кристос вир-яйкӧд?

Ап. уджъяс 20:31

Та вӧсна лоӧй дасьӧсь да энӧ вунӧдӧй, кыдзи ме куим во чӧж лун и вой синва сорӧн дугдывтӧг велӧді быдӧнӧс тіянӧс.

Ап. уджъяс 2:46

Быд лун найӧ ӧти сьӧлӧмӧн чукӧртчывлісны крамӧ, а гортаныс нянь чегисны, сёйисны нимкодьпырысь да восьса сьӧлӧмӧн.

Иоан 20:26

Вежон мысти Исуслӧн велӧдчысьясыс бара вӧліны керкаынӧсь, Фома тшӧтш вӧлі накӧд. Ӧдзӧсъясыс вӧліны йиганаӧсь, но Исус сувтіс на шӧрӧ да шуис: «Лӧнь олӧм тіянлы!»

Лука 22:19

Сэсся Исус босьтіс нянь, Енмӧс аттьӧалӧмӧн чегъяліс няньсӧ да велӧдчысьяслы сетігас шуис: «Тайӧ Менам яй, сійӧс лоӧ сетӧма тіян вӧсна. Вӧчӧй тайӧс Менӧ казьтывлӧм могысь».

Неемий 9:3

Найӧ сулалісны куим час чӧж, кор налы лыддисны Господь Енлысь Индӧдсӧ. Сэсся найӧ куим час чӧж копыртчӧмӧн висьтасисны мыжъяссьыныс Господьлы, асланыс Енлы.

Неемий 8:3

Ва дзиръя дорын изэрд вылын шонді петӧмсянь луншӧр кадӧдз Ездра лыддис Индӧдсӧ айуловлы да аньяслы – ставныслы, кодъяс сяммисны гӧгӧрвоны. Став войтырыс сюся кывзіс.

2 Тимофейлы 4:2

ло дась висьтавны Енлысь кывсӧ лӧсялан и лӧсявтӧм кадӧ. Бур велӧдысь моз терпитӧмӧн янӧд, ӧлӧд да туйдӧд.

Марк 16:9

Шойччан лун бӧрын водз асывнас ловзьӧм Исус медводз петкӧдчис Магдала Марьялы, код пытшкысь Сійӧ вӧтліс коркӧ сизим пеж лолӧс.

Ап. уджъяс 16:10

Тайӧ петкӧдчылӧм бӧрас ми дзик пыр шуим мунны сэтчӧ. Ми гӧгӧрвоим, мый Господь корӧ миянӧс висьтавны сэні Бур Юӧр.

Ап. уджъяс 20:5

Найӧ водзджык мунісны Троадаӧ да сэні виччысисны миянӧс.