Yowana 6:27 - Indagano Inyaaya mu-Chijita

²⁷ Mwasiga okukora emirimu inguru ya okubhona ebhiryo bhinu ebhinyamuka, tari mukorega emirimu inguru ya okubhona ebhiryo bhinu bhitakunyamuka, ka wone ebhiyaana abhaanu obhuwanga bhwa akajaanende koone. Anye Omwana wa Omuunu, eniyaana abhaanu ebhiryo ebhyo, kwa okubha Raata Nyamuwanga anaaye obhuturo bhwa okukora kutyo.”

INDAGANO INYA:YA

²⁷ Musige kukorera ebiryo binu ebiwao, nawe ebiryo binu ebi:karao kukinga ku buanga bunu butakuwao, binu Omwana wo mu:nu aribayana. Okuba niwe oyo Rata Nyamuanga amuteeko ecibarikisyo.

Yowana 6:27 Referans Kwoze

Bakolosai 3:2

Mwiganirisye emisango jinu jiri mu‑rwire, musige okwiganirisya jinu jiri ku‑chaaro kunu,

Yowana 6:54

Omuunu woonewoone unu kaarya omubhiri gwani na okunywa isagama yaani, oyo ari na obhuwanga bhwa akajaanende koone, na anye nirimusuurura ku‑rusuku rwa obhuteero.

2 Timoteo 2:19

Nawe abhaanu bhanu bheemereeguuyu bharumateene, bhari rwa orufuka runu ruteeywe‑wo na Nyamuwanga. Orufuka orwo rurumateene ndi. Inguru yaarwo ruri‑ko orunabho runu rukaamirwe ati, “Raatabhugenyi kaamenya abhaanu bhaaye,” ka wone, “Omuunu woonewoone unu kaayika ati, omwene ari rubhaara rwa Raatabhugenyi, asige ebhibhiibhi.”

Yowana 6:40

Omusango gunu Raata waani keenda ni ati, bhuri muunu unu kaasombookerwa ati, anye niri Mwana waaye na okunyikirisya, abhe na obhuwanga bhwa akajaanende koone. Oyo niwe anye nirisuurura ku‑rusuku rwa obhuteero.”

Barumi 6:23

Omuunu woonewoone unu ari mugaya wa echibhiibhi, omuyeero gwaye ni rufu rwa akajaanende koone. Nawe eswe, Nyamuwanga kaachiyaana obhuwanga bhwa akajaanende koone. Obhuwanga obhwo bhutari muyeero, tari ni chiyaanwa chinu echiramira okutura ku‑Kirisito Yeesu, Raatabhugenyi weeswe.

Yowana 10:28

Anye enijiyaana obhuwanga bhwa kajaanende koone, na jitaribhura wuri. Ka wone atari‑wo omuunu unu kaatura okujisaakura okusooka mu‑mabhoko gaani.

Yowana 6:51

Anye naanye ebhiryo bhinu bhiikire okusooka mu‑rwire, bhinu ebhiyaana abhaanu obhuwanga bhwa akajaanende koone. Omuunu woonewoone unu kaarya ebhiryo ebhyo, kaabha na obhuwanga bhwa akajaanende koone. Ebhiryo ebhyo ni mubhiri gwani gunu nirisoosya inguru ya abhaanu bhoone bha ku‑chaaro kunu, korereki bhabhe na obhuwanga bhwa akajaanende koone.”

Ebikorwa 10:38

Ka wone omumenya ati, Nyamuwanga ꞉aasorere Yeesu wa Najareeti kwa okumuyaana Mwoyo Mweru na obhuturo. Yeesu oyo aagendaga enu na erya, aakoraga ja ekisi na okuwosya bhoone bhanu bhaariga nibhanyaasibhwa na amanaga ga Syetaani, kwa okubha Nyamuwanga aariga ari aamwi nage.

Yowana 17:2

Unaaye obhuturo bhwa okutangasya abhaanu bhoone, korereki nibhayaane obhuwanga bhwa akajaanende bhoone bhanu unaaye.

Matayo 6:19

“Mwasiga okwibhiikira ebhibhiikwa ku‑chaaro kunu, anu amayeenje na obhutaretare ebhinyamura na abheefi abhafumura orwigi korereki bheebhe.

Yowana 6:58

Mbe, anye naanye ebhiryo bhinu bhiikire okusooka mu‑rwire. Ebhiryo ebhyo bhitakususana na ebhiryo bhinu bhasaaja weemwe ꞉bhaariiye. Abheene ꞉bhaafuuwe. Nawe omuunu woonewoone unu kaarya ebhiryo bhinu, aribha na obhuwanga bhwa akajaanende koone.”

2 Petero 1:17

Eswe chaariga chiri aamwi na Yeesu mu‑chiima echeeru, omwanya gunu ꞉aayaaywe echibharo okusooka ku‑Raata Nyamuwanga. Omwanya ogwo, obhuraka bhwa rikusyo rikuru ꞉bhwasookere mu‑rwire ku‑Nyamuwanga omwene, nibhwayikaga ati, “Unu niwe Omwana waani omwendwa, niwe kaankondisya.” Kurwa ejo, eswe abheene chaariga chiri abhabhambaasi bhanu ꞉choonguuwe emisango ejo.

Bafilipi 2:13

Mbe, mukore kutyo kwa okubha Nyamuwanga niwe kaakora emirimu mu‑mitima jeemwe, korereki mwende na okukora emisango jinu kaakena jikorekane.

1 Petero 1:24

Jikaamirwe mu‑Bhikaame Ebhyeru ati, “Abhaanu bhoone bhari rwa amanyaasi, na rikusyo ryebhwe riri rwa obhwaso bhwa amanyaasi. Amanyaasi agawotoka, na obhwaso obhuwunguruka,

Ruuka 3:22

Mwoyo Mweru ˆneeka inguru yaaye rwa echiguuti, obhuraka nibhusooka mu‑rwire, nibhwayika ati, “Awe naawe Omwana waani omwendwa! Naawe owunkondisya!”

1 Batesalonika 1:3

Bhunu echibhasabhirwa ku‑Nyamuwanga Raata weeswe, echiichuka imbere yaaye, emirimu jeemwe jinu omukora mu‑riikirisya. Echiichuka okukomeera kwemwe kunu okuruubhana na eryenda ryemwe, ka wone, okwigumiirisya kwemwe kunu okuruubhana na obhwiyikanyo bhwemwe bhwa okusubha rindi Raatabhugenyi Yeesu Kirisito.

Bakolosai 1:29

Inguru ya omusango ogwo, eniikomeesya na okurwanirira emirimu jinu ku‑managa maafu ganu Kirisito kaanaana.

Yowana 3:33

Omuunu woonewoone unu keekirisya obhubhambaasi bhwaye, keeresya ati jinu Nyamuwanga kaayika ni ja chimari,

Ebikorwa 2:22

Peetero ˆnaagenderera okwayika ati, “Emwe abhaanu bha Yisirayeeri, muntegeresye kisi! Nyamuwanga ꞉eeresiisye abhweru kw‑imwe ati Yeesu Omunajareeti ni wa echimari. ꞉Aakorere kutyo, ku‑njira ya ebhikorwa bhya obhuturo, ebhiruguusyo na ebhibharikisyo bhya mbaga nyafunyafu bhinu Nyamuwanga ꞉aamuyaaye amanaga okukora agati yeemwe. Ejo emwe abheene mujimenyere.

Yowana 6:68

Simooni Peetero ˆnaamusubhya ati, “Raatabhugenyi, chigende ku‑ga? Awe wenyere naawe uri na emisango jinu ejichiyaana obhuwanga bhwa akajaanende koone.

Ruuka 9:35

Nibhoongwa obhuraka okusooka mu‑riire eryo, nibhwayikaga ati, “Unu niwe Omwana waani, omusorwa waani! Mumutegeresyega!”

Baeburania 12:16

Mwiyangarirega, korereki agati yeemwe aasiga okubha‑wo omuunu omuromesi amwi omuunu unu atakuyaana echibharo Nyamuwanga rwa kutyo Esawu aariga atakumuyaana. Omwene Esawu ꞉aagusiisye rirenga rya omwibhurwa wa obhubhere inguru ya riribhire rimwi era.

Bagalatia 5:6

Mbe araabha chiri na obhumwi na Kirisito Yeesu, okutendwa amwi okurema okutendwa kutari na obhugajuro bhwonebhwone. Echiinu cha bhusibhusi ni riikirisya ryeswe rinu erikora emirimu mu‑ryenda.

Baeburania 4:11

Kurwa ejo, chiikomeesye okwingira orubhaara rwa okwisya omwoyo. Chibhega nichikora kutyo korereki aasiga okubha‑wo omuunu woonewoone wa okutaamibhwa okwingira ku‑songa ya okurema okugayuka Nyamuwanga, rwa kutyo bhasaaja weeswe bhaariga nibhakora.

Bakolosai 2:22

Ebhyo bhyone ni ebhiraagiro na ameeyigisyo ga abhaanu era inguru ya ebhiinu bhinu ebhinyamuka ku‑mwanya mufuyi bhikamara okukorerwa emirimu.

1 Bakorinto 9:2

Noorwo araabha abhaanu abhandi abharora ati anye nitari tumwa, nawe kw‑imwe anye niri tumwa. Okubha eriikirisya ryemwe mu‑Kirisito nicho echibharikisyo chinu echeeresya ati anye niri tumwa ya Raatabhugenyi.

1 Bakorinto 6:13

Abhandi agati yeemwe abhaayika ati, “Ebhiryo ni inguru ya inda, na inda ni inguru ya ebhiryo.” Nikwo kutyo jiri, nawe Nyamuwanga arinyamura bhyone bhibhiri. Omubhiri ꞉gutaabhumbirwe inguru ya okukora obhuromesi, tari inguru ya okukorera Raatabhugenyi emirimu, Raatabhugenyi omwene niwe kaangarira omubhiri.

Barumi 4:11

Okutendwa kwaye ꞉kwabheeye echibharikisyo, ka wone ꞉kwabheeye orunabho runu ꞉rweresiisye ati Nyamuwanga ꞉aamubharire okubha omurengeresi okuruubhana na eriikirisya ryaye rinu aariga ari naryo achaari okutendwa. Ku‑njira eyo, Bhurayimu ꞉aakorerwe okubha esemwene abheekirisya bhanu bhachaari okutendwa, korereki noorwo abheene bhabharwe okubha abharengeresi imbere ya Nyamuwanga.

Yowana 15:24

Nikorere ebhiruguusyo ebhinene bhinu omuunu owundi achaariga okukora. Araabha bhakabheeye bhatabhirorere, bhatakabheeye na echibhiibhi. Nawe woori, bharorere joone jinu ꞉naakorere, noorwo kutyo bhachaansokere na Raata waani wone bhamusokere.

Yowana 14:6

Yeesu ˆnaamusubhya ati, “Anye naanye injira, echimari, na obhuwanga. Atari‑wo omuunu woonewoone unu kaatura okuuja ku‑Raata araabha ataturire kw‑anye.

Yowana 11:42

Nimenyere ati owunyungwaga omwanya gwone, nawe enaayika jinu inguru ya echise cha abhaanu bhanu, korereki bheekirisye ati awe naawe untumire.”

Yowana 8:18

Mbe, anye eniisoosisya obhubhambaasi omwene, na Raata unu ꞉aantumire wone kaansoosisya obhubhambaasi.”

Mariko 9:7

Niwo eriire niriija, niribhafundikira. Nibhoongwa obhuraka okusooka mu‑riire eryo, nibhwayika ati, “Unu niwe Omwana waani omwendwa. Mumutegeresyega!”

Mariko 1:11

Obhuraka okusooka mu‑rwire nibhwayika ati, “Awe naawe Omwana waani omwendwa! Naawe owunkondisya!”

Matayo 17:5

Omwanya gunu Peetero aariga achaaroma, awoawo eriire rinu ryariga niringʼarabhya niriija na okubhafundikira. Nibheeya nibhoongwa obhuraka okusooka mu‑riire eryo nibhwayika ati, “Unu niwe Omwana waani omwendwa, niwe kaankondisya. Mumutegeresyega!”

Matayo 3:17

Niwo, obhuraka okusooka mu‑rwire nibhwayika ati, “Unu niwe Omwana waani omwendwa, niwe kaankondisya.”

Yakobo 1:11

Risuubha eriwuruka, omuumwi mwafu oguwotosya ebhiimesya, obhwaso bhwende‑ko nibhunogoka na obhureesi bhwabhyo obhuwaawo. Nikwo kutyo jiribha noorwo ku‑muniibhi. Aribhaga naakora emirimu jaaye na arifwira ku‑mirimu ejo.

2 Bakorinto 4:18

Kutyo, chitakuringira ebhiinu bhinu ebhibhonekana, tari bhinu bhitakubhonekana, kwa okubha bhinu ebhibhonekana ni bhya kasinjeeke era, nawe bhinu bhitakubhonekana, ni bhya akajaanende.

Matayo 8:20

Yeesu ˆnaamusubhya ati, “Ganyamubhwe gari na jisenga, na jinyonyi jiri na amooswi, nawe anye Omwana wa Omuunu, nitari na omusi anu enitura okumaama!”

Matayo 25:46

“Kurwa ejo, abhakosi bha ebhibhiibhi abho, bharigenda okuramira jimbuma ja akajaanende koone. Nawe abharengeresi imbere ya Nyamuwanga, abho bhariingira mu‑bhuwanga bhwa akajaanende koone.”

Yowana 3:15

korereki bhuri muunu unu kaanyikirisya, abhe na obhuwanga bhwa akajaanende koone.”

Yowana 6:47

“Ni chimari enibhabhwira ati, omuunu woonewoone unu kaanyikirisya, oyo ari na obhuwanga bhwa akajaanende koone.

Yowana 6:53

Okuruubhana na ejo, Yeesu ˆnaabhabhwira ati, “Ni chimari enibhabhwira ati, aribha mwarema okurya omubhiri gwani, na okunywa isagama yaani, anye Omwana wa Omuunu, mutaribhona obhuwanga bhwa akajaanende koone.

Yowana 6:62

Woori, jiribha kutiki aribha mwandora anye Omwana wa Omuunu, nindiinya okugenda mu‑rwire anu naariga niri ku‑bhwambiro?