Obhusweruro 5:8 - Indagano Inyaaya mu-Chijita

⁸ Ejire aaramira echitabho echo, ebhibhumbwa bhirya na abhakaruka bharya nibhagwa bhwifumbike imbere yaaye. Bhuri umwi weebhwe aariga ari na indono na amabhakuri ga inaaryo geejuuywe obhubhaani. Obhubhaani obhwo niryo risabhwa rya abheeru bha Nyamuwanga.

INDAGANO INYA:YA

⁸ Wejire agega ecitabo, jintyanyi ejo na bakaruka amakumi agabiri na:bana nibe:nama imbere yo Mwana wa Ina:ma, buri umwi ariga:ri na ritungu, ne bibiga bya jijaabu binu bi:juye emigaju, nikwo okusabwa kwa be:ru.

Obhusweruro 5:8 Referans Kwoze

Obhusweruro 4:10

Bhuri omwanya Nyamuwanga aariga ˆnaakuuyibhwa na ebhibhumbwa bhirya, abhakaruka makumi gabhiri na bhana bharya, bhaariga nibhagwa bhwifumbike imbere ya unu eenyanjire ku‑chitebhe cha ingʼoma na okumuramya. Omwene oyo, niwe omuwanga akajaanende koone. Wone bhaariga nibhafuura jitengya jeebhwe, nibhajituura imbere ya echitebhe cha ingʼoma, nibhaayikaga ati,

Obhusweruro 5:14

Ebhibhumbwa bhina bhirya nibhiitabhirisya, nibhyayikaga ati, “Jibhe kutyo!” Abhakaruka bharya wone nibhagwa bhwifumbike, nibharamya Nyamuwanga na Omwana wa Inaama.

Obhusweruro 4:4

Ka wone, echitebhe cha ingʼoma echo chaariga chisingiywe na ebhitebhe ebhindi makumi gabhiri na bhina bhya obhutungi. Ku‑bhitebhe ebhyo, bhaariga bheenyanjire‑ko abhakaruka makumi gabhiri na bhana. Abhakaruka abho, bhaariga bhafwaye emyenda emyeru na ku‑mitwe jeebhwe bhaariga bhafwaye jitengya ja inaaryo.

Obhusweruro 19:4

Abhakaruka makumi gabhiri na bhana bharya, aamwi na ebhibhumbwa bhina bhirya, nibhagwa bhwifumbike, nibharamya Nyamuwanga unu aariga eenyanjire ku‑chitebhe cha ingʼoma, nibhaayikaga ati, “Jibhe kutyo! Nyamuwanga akusibhwe!”

Obhusweruro 5:6

Niwo nindora Omwana wa Inaama eemereeguuyu ayeeyi na echitebhe cha ingʼoma. Wone aariga eyindirwe na ebhibhumbwa bhina bhirya na abhakaruka makumi gabhiri na bhana bharya. Omwana wa Inaama oyo, aariga ˆnaabhonekana wuti atemerwe omutwe. Ka wone aariga ari na amayembe gataanu na gabhiri na ameeso gataanu na gabhiri. Ameeso ago ni emyoyo etaanu na ebhiri ja Nyamuwanga jinu jaariga jitumirwe bhuri orubhaara ku‑chaaro choone.

Obhusweruro 4:8

Ebhibhumbwa ebhina ebhyo, bhuri chimwi chaariga chiri na amabhabha gataanu na rimwi. Bhyone kutyo, bhyariga bhiswirire ameeso bhuri orubhaara, noorwo ku‑mabhabha. Ebhibhumbwa ebhyo bhyariga nibhiimba mu‑ngeta na mu‑mwisi okujibhira wuri. Orwimbo runu bhyembaga ni runu, “Mweru, Mweru, Mweru ni Raatabhugenyi Nyamuwanga owa obhuturo bhwone, aariga ari‑wo, ari‑wo na aribha‑wo.”

Obhusweruro 15:7

Owumwi wa ebhibhumbwa ebhina bhya obhuwanga bhirya, ˆnaayaana bhuri owumwi wa bhamaraayika bhataanu na bhabhiri abho, ribhakuri rya inaaryo rinu riijuuye risungu rya Nyamuwanga, omuwanga akajaanende koone.

Obhusweruro 15:2

Ka wone, nindora echiinu chinu chaariga chiri rwa inyanja ya rirore, inu isasikeene na omuriro. Ku‑mbarimbari awo, bhaariga bheemereeguuyu‑wo abhaanu bhanu ꞉bhaayigire rityanyi rirya, risusano ryaryo, aamwi na obhukumi bhwa risiina ryaryo. Abhaanu abho bhaariga bhagwatiriiye jindono mu‑mabhoko geebhwe ganu bhaariga bhayaaywe na Nyamuwanga korereki bhamuramye.

Yowana 5:23

Raata ꞉aakorere kutyo, korereki abhaanu bhoone bhayaane Omwana echibharo rwa kutyo abhayaana Esemwene echibharo. Omuunu woonewoone unu atakuyaana Omwana echibharo, oyo atakuyaana echibharo Raata unu ꞉aamutumire.

Baeburania 1:6

Ka wone, omwanya gunu Nyamuwanga ꞉aatumire Omwana waaye wenyere ku‑chaaro anu, ꞉aayikire ati, “Bhamaraayika bhoone bha Nyamuwanga bharamye Omwana oyo.”

Yowana 1:29

Mwejo yende‑ko, Yowana ˆnaarora Yeesu ˆnaamuuja‑ko. ˆNaabhwira abhaanu bhanu bhaariga bhari awo ati, “Ringira, oyo niwe Omwana wa Inaama wa Nyamuwanga, unu kaasoosya‑wo ebhibhiibhi bhya abhaanu bhoone bha echaaro chinu!

Obhusweruro 4:6

Ka wone, imbere ya echitebhe cha ingʼoma chaariga chiri‑wo echiinu wuti inyanja ya rirore. Inyanja eyo, yaariga iri rwa ribhuyi rinu eringʼarabhya muno. Agati ya echitebhe cha ingʼoma na abhakaruka bharya, bhyariga bhiri‑wo ebhibhumbwa bhina ebhya obhuwanga. Ebhibhumbwa ebhyo bhyariga bhisingiiye echitebhe cha ingʼoma mbaara joone. Ka wone, bhyariga bhiswirire ameeso bhuri orubhaara ku‑mibhiri jabhyo.

Obhusweruro 5:11

Niwo nindora na okuungwa bhamaraayika bhaafu muno, ebhiwumbi na ebhiwumbi, bhaariga bhari bhanyatabharwa. Bhamaraayika abho bhaariga bheeyindire echitebhe chirya cha ingʼoma, ebhibhumbwa bhirya na abhakaruka bharya.

Obhusweruro 5:12

Ninuungwa nibhaamura obhuraka, nibheemba ati, “Omwana wa Inaama unu ꞉aatemerwe omutwe, eeyire okuramira obhuturo, obhuniibhi na obhwengeeso. Amanaga, echibharo, rikusyo na jikuma ni bhyaye!”

Obhusweruro 6:1

Nejire neeya, nindora Omwana wa Inaama ˆnaasuruumuraga imboyero irya ya okwamba ya obhurimbo ku‑mboyero jirya etaanu na ebhiri. Ka wone, ninuungwa echibhumbwa echimwi ku‑bhina bhirya, nichaamura obhuraka rwa bhwa ribharuka, nichaayikaga ati, “Iija!”

Obhusweruro 13:8

Abhaanu bhoone ku‑chaaro choone bhariramya rityanyi eryo, nawe abhaanu bhoone bhanu amasiina geebhwe gakaamirwe mu‑chitabho cha obhuwanga, okusookerera echaaro chichaari okubhumbwa bhataririramya. Echitabho echo ni cha Omwana wa Inaama unu ꞉aatemerwe omutwe.