Ebikorwa 20:17 - Indagano Inyaaya mu-Chijita

¹⁷ Omwanya gunu Pawuro aariga ari Mireeto awo, ˆnaabhirikira abhakaruka bha rikanisa rya Yefeeso bhabhugane nage.

INDAGANO INYA:YA

¹⁷ Anu ariga:ri mu Mileto natuma aba:nu okuja Efeso, nabirikira abakaruka ba ikanisa.

Ebikorwa 20:17 Referans Kwoze

Tiito 1:5

꞉Naakusigire Kireete awo, korereki utuure‑wo obhwisombooro bhwa ekisi ku‑misango ejindi jinu jisigaaye, aamwi na okusora abhakaruka bha rikanisa mu‑bhuri rara, rwa kutyo ꞉naakweresiisye.

Ebikorwa 11:30

Nibhakora kutyo, nibhayaana Bharinaabha na Saawuri ebhiyaanwa bhyebhwe, korereki bhabhisire ku‑bhakaruka bha rikanisa rya Yerusareemu.

1 Timoteo 5:17

Abhakaruka bhanu abhaangarira rikanisa kisi, bhayaanwe echibharo na okukorerwa eja ekisi, chimwichimwi bhanu abheesoosya okuraasya na okwiyigisya.

Yakobo 5:14

Angu ari‑wo omurwaye mw‑imwe? Oyo kaakenwa abhirikire abhakaruka bha rikanisa, bhaaje bhamusabhirwe na okumubhambaga amafuta kw‑isiina rya Raatabhugenyi Yeesu.

Ebikorwa 20:28

Woori, mubhega mwiyangariiye na murinde ebhise bhyone bhya abheekirisya, kwa okubha Mwoyo Mweru, abhateeye‑wo mubhe abhaangarisi. Mwangarire abheekirisya abho, kwa okubha Nyamuwanga ꞉aabhagurire kwa isagama ya omwana waaye.

Ebikorwa 14:23

Pawuro na Bharinaabha nibhasora abhakaruka mu‑bhuri rikanisa. Mu‑kwiyima okurya na okubhasabhirwa, nibhabhatuura mu‑mabhoko ga Raatabhugenyi Yeesu, unu ꞉bheekirisiisye.

3 Yoana 1:1

Anye omukaruka waawo mu‑riikirisya, enikukaamira awe Gaayo omwendwa waani. Chimari nikwendere.

2 Yoana 1:1

Anye omukaruka weemwe mu‑riikirisya, enikukaamira awe omusubhaati omwendwa unu usorerwe na Nyamuwanga, aamwi na abhaana bhaawo. Ni chimari nibheendere bhoone. Nitari anye omwene era unu nibheendere, tari na abhaanu bhoone bhanu abhamenya echimari.

1 Petero 5:1

Woori, enaayika na emwe abhakaruka bha rikanisa. Anye niri omukaruka oweejaanyu, unu ꞉neeroreeye omwene kutyo Kirisito ꞉aanyaasiibhwe. Ka wone, anye niri omusangisi oweejaanyu wa rikusyo rinu riri yeeyi okuswerurwa. Kurwa ejo, enibheerembeeresya emwe,

Ebikorwa 16:4

Pawuro na abheejaabho abho, nibhagenda nibhaturaga mu‑misi ja ende‑yo, nibhabhwiraga abheekirisya amaragiriro ganu gateeywe‑wo na jitumwa ja Yeesu na abhakaruka bha Yerusareemu. ꞉Bhaakorere kutyo korereki abheekirisya bheende‑yo wone bhabhe nibhagayuka amaragiriro ago.

Ebikorwa 15:23

“Eswe jitumwa aamwi na abhakaruka bha rikanisa, echibhakeesya emwe abheekirisya bhanu mutari Bhayawudi, bhanu muri mu‑musi gwa Atiyookiya, na emikoowa ja Siiriya na Kiriikiya.

Ebikorwa 15:6

Mbe, jitumwa ja Yeesu ejo na abhakaruka abho, nibhakora echiina korereki bhatatirisye kisi omusango ogwo.

Ebikorwa 15:4

Pawuro na abheejaabho abho, omwanya gunu ꞉bhaakingire Yerusareemu, nibhakumwa kisi na jitumwa ja Yeesu, aamwi na abhakaruka na abheekirisya bha rikanisa. Pawuro na abheejaabho nibhabhabhwira joone jinu Nyamuwanga ꞉aakorere, okutura ku‑bheene.

Ebikorwa 18:19

Mu‑njira, bhejire bhaakinga mu‑musi gwa Yefeeso, Pawuro ˆnaasiga abheejaabho erya. Omwene ˆneengira mu‑nju ya eriikofyanyo, ˆnaayikana na Abhayawudi.

Ebikorwa 20:15

Bhwejire bhwacha, nichigenderera na orugendo rwa mu‑nyanja, nichikinga ku‑mbarimbari ya risinga rya Kiiyo. Mwejo yende‑ko, nichaambuka inyanja nichikinga kw‑isinga rya Samoosi. Nichiikara mu‑musi gwa Turogiriyo. Orusuku runu ꞉rwaruubhiiye, nichikinga mu‑musi gwa Mireeto.