Ebikorwa 18:7 - Indagano Inyaaya mu-Chijita

⁷ Neeya Pawuro, ˆnaasooka mu‑nju ya eriikofyanyo rya Abhayawudi, ˆnaagenda mu‑nju ya omuunu umwi risiina ryaye aatogwaga Tiito Yuusito, omuramya wa Nyamuwanga. Inju yaaye yaariga isiijeene na inju eyo ya eriikofyanyo.

INDAGANO INYA:YA

⁷ Naso:kayo nengira mu nyumba yo mu:nu risi:na ryae Tito Yusito, unu ariga naramya Nyamuanga, unu inyumba yae isijene ne rikofyanyisyo.

Ebikorwa 18:7 Referans Kwoze

Ebikorwa 16:14

Mu‑bhanu bhaachitegeresyaga, aariga ari‑mo omugasi umwi, asookere mu‑musi gwa Tiyaatira, risiina ryaye aatogwaga Riidiya. Riidiya oyo, aariga ari omugusi wa emyenda ja ekisi ja ijambarawu na aaramyaga Nyamuwanga. Pawuro ejire aabhabhwira Emisango ja Ekisi, Raatabhugenyi ˆneegura mutima gwa Riidiya, ˆnaategeresya kisi omusango gunu Pawuro aariga ˆnaaraasya.

Bakolosai 4:11

Yeesu wone, unu kaatogwa Yuusito, kaabhakeesya. Agati ya Abhayawudi bhanu bheekirisiisye Kirisito, abho era nibho abhakora emirimu aamwi na anye mu‑bhukama bhwa Nyamuwanga. Abheene abhasimbiisya omwoyo gwani muno.

Ebikorwa 17:4

Jinu Pawuro ꞉aayikire, Abhayawudi abharebhe nibhajiikirisya, aamwi na Abhayunaani abhaafu bhanu bhaaramyaga Nyamuwanga. Nibheekirisya noorwo abhagasi abhaafu bha echibharo. Abho bhoone nibharuubhana na Pawuro na Siira.

Ebikorwa 13:42

Bhunu Pawuro na Bharinaabha, bhaariga nibhasooka mu‑nju ya eriikofyanyo rya Abhayawudi, abhaanu nibhabharemberesya bhasubhe ku‑Sabhaato inu ꞉yaaruubhiiye, korereki bhaayike inguru ya emisango ejo rindi.

Ebikorwa 10:22

Nibhamubhwira ati, “Chaatumwa na omwangarisi umwi wa abhasirikare, risiina ryaye ni Koroneeriyo. Omwene ni muunu wa obhurengeresi na kaagayuka Nyamuwanga, ka wone kaakuuyibhwa na Abhayawudi bhoone ati ni muunu wa ekisi. ꞉Aabhwiriiywe na maraayika omweru ati, akukume iika ewaaye, korereki ategeresye emisango jinu owuja okumubhwira.”

Ebikorwa 10:2

Ka wone, aariga ˆnaagayuka Nyamuwanga, aamwi na abhaanu bhoone bha iika ewaaye. Aariga ˆnaasabhwa Nyamuwanga bhuri omwanya. Aamwi na ejo, aariga ˆnaasakira abhaanu abhanare.

Yowana 9:31

Chimenyere ati, Nyamuwanga atakungwaga risabhwa rya abhakosi bha ebhibhiibhi, tari koongwaga omuunu woonewoone unu kaamuramya na okukora jinu Nyamuwanga keenda.

Ebikorwa 13:43

Omwanya gunu abhaanu abho ꞉bhaanyarambukire, Abhayawudi bhaafu, aamwi na abhaanu abhandi bhanu ꞉bhaagwateene na Abhayawudi bhanu bhaaramyaga Nyamuwanga, nibharuubha Pawuro na Bharinaabha. Abheene wone nibhasimura na abhaanu abho nibhabhakomeeresyaga ati, bhagenderere okwiyikanya obhwitiriranya bhwa Nyamuwanga.

Ebikorwa 13:50

Nawe Abhayawudi nibhakungirisya abhagasi bha echibharo bhanu bhaaramyaga Nyamuwanga aamwi na abhatangasya bha omusi ogwo. Abho nibhaamba okunyaasya Pawuro na Bharinaabha na okubhabhirimya bhasooke mu‑chaaro cheebhwe.