Bakolosai 2:11 - Indagano Inyaaya mu-Chijita

¹¹ Omwanya gunu ꞉mwabheeye na obhumwi na Kirisito, omwene ꞉aabhatendere, nikwo okwayika ati, ꞉aabhafuurire bhumuunu bhwemwe bhwa ebhibhiibhi. Okutenda okwo ꞉kutaakorerwe kwa amabhoko ga abhaanu, tari ku‑njira yaaye omwene.

INDAGANO INYA:YA

¹¹ Mu Mwene mwatendeywe, mu kufu:ra ebyo mubiri gwe minofu mu mtendo rwa Kristo, okutenda kunu kutakorerwe na maboko.

Bakolosai 2:11 Referans Kwoze

Barumi 2:29

Wuri! Omuyawudi wa echimari ni unu kaagayuka Nyamuwanga kwa omwoyo gwaye gwone. Okutendwa kwa echimari okukorwa mu‑mwoyo na Mwoyo Mweru, kutari kwa okuruubha ebhiraagiro bhya Muusa. Omuunu rwa oyo, atakuramira jikuma okusooka ku‑bhaanu, tari arikuuywa na Nyamuwanga omwene.

Bafilipi 3:3

Eswe neeswe chitenderwe echinyamwoyo kwa okubha Mwoyo wa Nyamuwanga kaachisakira kutyo jiiyire chiramye Nyamuwanga. Eswe echikuuyisya Kirisito Yeesu na okumwiyikanya. Ka wone chitakwiyikanya ebhikorwa bhyeswe bhya echinyamubhiri korereki chibhone obhuchungusi,

Baefeso 4:22

꞉Mweeyigisiibhwe okufuura jitungwa jeemwe jimbiibhi ja obhusimukwa, bhumuunu bhwemwe bhwa kara, bhunu obhunyamurwa na obhurigire bhwabho bhwa okujiga.

Barumi 6:6

Echimenya ati bhumuunu bhweswe bhwa kara ꞉bhwafuuwe aamwi na Kirisito ku‑musarabha, korereki amanaga ga echibhiibhi mu‑myoyo jeeswe gaasiga okuchitunga rindi, na okuchikora chibhe abhagaya bha echibhiibhi.

Bagalatia 5:24

Abhaanu bhanu bhari na obhumwi na Kirisito Yeesu, bhatakutungwa na okurigira kwebhwe kwa omubhiri aamwi na obhwiganirisya bhwebhwe obhubhiibhi. Bhaabhambire okurigira okwo, ku‑musarabha gwa Yeesu.

Bagalatia 2:20

Bhumuunu bhwani bhwa kara bhwa ebhibhiibhi, ꞉bhwabhambirwe aamwi na Kirisito ku‑musarabha. Woori niri muwanga, nawe nitari anye unu niri muwanga, tari Kirisito niwe ari muwanga mu‑mwoyo gwani. Obhuwanga bhunu niri nabhwo omwanya gunu, niri nabhwo mu‑kwikirisya Omwana wa Nyamuwanga. Omwene ꞉aanyendere na okusoosya obhurame bhwaye inguru yaani, korereki nichunguke.

2 Bakorinto 5:17

Omuunu woonewoone unu ari na obhumwi na Kirisito, aabha echibhumbwa echiyaaya, emisango ja kara jaayitingʼeene, woori ni miyaaya!

Baeburania 9:24

Kirisito ꞉ateengiiye Ayeeru a Ayeeru anu oombakirwe na omuunu. Orubhaara orwo ni chijekekanyo cha orubhaara rwa echimari runu ruri mu‑rwire. Tari omwene ꞉eengiiye mu‑rwire orwene. Eyo niyo kaachisabhirwa woori imbere ya Nyamuwanga.

Baeburania 9:11

Kirisito ꞉eejire, korereki abhe Omugabhisi Omukuru wa obhutinge obhuyaaya bhunu bhwachireetera emisango ja ekisi. Omwene niwe kaakora emirimu mw‑iyeema erindi rinu riri rya ekisi muno, ka wone rikuumiiye okukira rya okwamba rirya. Riyeema eryo ꞉ritoombakirwe na omuunu, obhugajuro bhwago ni ati, riyeema eryo ritari rya ku‑chaaro kunu.

2 Bakorinto 5:1

Emibhiri jeeswe ja ku‑chaaro anu, jiri rwa ebhiwuuna. Nawe chimenyere ati, bhikakambuka, Nyamuwanga arichiyaana jinju ja akajaanende mu‑rwire jinu jitakumbakwa na abhaanu.

Ebikorwa 17:24

“Nyamuwanga ni Raatabhugenyi wa orwire na owa echaaro, niwe ꞉aabhumbire echaaro na bhyone bhinu bhiri‑mo. Omwene atakwikara mu‑mayekaru ganu goombakirwe na amabhoko ga abhaanu.

Ebikorwa 7:48

“Noorwo kutyo, Nyamuwanga unu ari Inguru ya Bhyone ni mukuru, atakwikara mu‑nju jinu ejuumbakwa na amabhoko ga abhaanu. Rwa kutyo omuragi ꞉aayikire ati,

Ruuka 2:21

Omwana oyo ejire aakingya siku etaanu na esatu okusookerera eebhurwe, nibhamutenda. Nibhamutoga risiina Yeesu, kwa okubha niryo risiina rinu maraayika urya aariga abhabhwiriiye okumutoga, omwanya gunu nyiramwene aariga achaari okugega inda.

Mariko 14:58

“Eswe abheene ꞉choonguuwe omuunu unu ˆnaayikaga ati, ‘Anye nirifumya Riyekaru rya Nyamuwanga rinu ꞉ryombakirwe na abhaanu. Ka wone, niriryumbaka rindi mu‑siku esatu era, eryo ritaryumbakwa na abhaanu.’”

Barumi 7:24

Jirimbona anye! Niga unu arinchungura okusooka mu‑bhusimukwa bhwani bhwa echibhiibhi chinu echindeetera orufu?

Bakolosai 3:5

Mbe woori, mwese kura chimwi emisango joone ja echaaro chinu jinu jiri mu‑myoyo jeemwe, emisango ejo ni bhuromesi, obhujabhi, okurigira okubhiibhi, obhwiganirisya obhubhiibhi, na okwisigombera ebhiinu. Okwisigombera ebhiinu kuri rwa okuramya amasusano na okusiga okuramya Nyamuwanga.