Baeburania 7:19 - Indagano Inyaaya mu-Chijita

¹⁹ ꞉Aarisoosiisye‑wo, kwa okubha ebhiraagiro bhya Muusa bhyariga bhitari na obhuturo bhwa okukuumisya omusango gwonegwone. Nawe woori, Nyamuwanga achiyaaye obhwiyikanyo obhundi bhwa ekisi muno, bhunu obhuchikora chibhe ayeeyi nage.

INDAGANO INYA:YA

¹⁹ Okuba ebiragiro bitakuku:misya ci:nu co:ne, nawe obwiikanyo bwe kisi muno nibwingisibwa, bunu obucifugesya ku Nyamuanga.

Baeburania 7:19 Referans Kwoze

Ebikorwa 13:39

Okutura ku‑mwene era, bhuri muunu unu kaamwikirisya, kaabharirwa ati ni murengeresi imbere ya Nyamuwanga, omusango gunu gutakuturikana kw‑imwe kwa okuruubha ebhiraagiro bhya Muusa.

Baeburania 4:16

Kurwa ejo chibhe na ribhaasi mu‑kufogera ku‑chitebhe cha ingʼoma cha Nyamuwanga, korereki achiyaane echigongo na obhwitiriranya bhwa okuchisakira omwanya gwa obhukene bhweswe.

Baeburania 9:9

Emisango joone jinu jaariga nijikorekana mw‑iyeema rirya ni chijekekanyo ku‑mwanya gunu gwa woori. Echijekekanyo echo echeeresya ati, echiyaanwa na echoogo bhinu ebhisoosibhwa ku‑Nyamuwanga, bhitakutura okwesya emitima ja abhaanu bhanu abharamya Nyamuwanga.

Barumi 8:3

Ebhiraagiro bhya Muusa bhyariga bhitari na amanaga ga okuchiyaana obhwitaage, ku‑songa ya obhusimukwa bhweswe bhwa echibhiibhi. Nawe chinu ebhiraagiro ebhyo ꞉bhyataamiibhwe okukora, Nyamuwanga ꞉aachikorere. ꞉Aatumire Omwana waaye omwene, aaje kw‑iswe ku‑chaaro anu ari na omubhiri rwa eswe abha ebhibhiibhi, korereki eesoosye rwa echoogo inguru ya ebhibhiibhi bhyeswe. Kwa okukora kutyo, Nyamuwanga ꞉aayaaye Yeesu ebhitiibha inguru ya ebhibhiibhi bhya abhaanu,

Baeburania 11:40

Nyamuwanga ꞉aakorere kutyo, kwa okubha aariga achiiraabhiiye emisango ja ekisi muno, korereki chiramire jinu ꞉aachiragire eswe aamwi na abheene.

Baeburania 10:1

Mbe, ebhiraagiro bhya Muusa ni chijekekanyo era cha emisango ja ekisi jinu ejiija, nawe ebhyene bhitari emisango ejo ejeene. Kurwa ejo ebhyogo bhinu abhaanu abhasoosya bhuri muguuga okuruubhana na ebhiraagiro ebhyo, bhitakutura wuri noorwo na akatyari okwesya abhaanu bhanu abharamya Nyamuwanga.

Baeburania 6:18

Mbe, emisango jibhiri jinu nijo Nyamuwanga ꞉aakorere, okuraga na okurayira. Nyamuwanga atarijiyindura wuri noorwo na akatyari, kwa okubha omwene atari mubheeyi. ꞉Aakorere emisango ebhiri ejo, korereki achisimbiisye eswe bhanu chiirukiiye ku‑mwene, chibhe na obhwiyikanyo ku‑misango jinu ejiija.

Barumi 5:2

Ku‑njira ya okwikirisya Yeesu, Nyamuwanga achiyaaye obhwitiriranya bhwaye. Noorwo woori echigenderera okuramira obhwitiriranya obhwo. Echikonderwa muno, kwa okubha echiiyikanya ati chirisangira aamwi na Nyamuwanga mw‑ikusyo ryaye.

Baeburania 8:6

Nawe Nyamuwanga ayaaye Yeesu omurimu gwa obhugabhisi gunu guri gwa kisi muno okukira gurya gwa abhagabhisi bha okwamba bharya. Yeesu niwe kaagwatanya abhaanu na Nyamuwanga mu‑ndagano inu iri ya ekisi okukira ya okwamba irya. Ka wone indagano eyo, iri rwa echiinu chinu chuumbakirwe ku‑rufuka rwa ekisi, nikwo okwayika ati inguru ya omurago gwa kisi muno okukira omurago gwa indagano ya kara irya.

Baeburania 7:25

Ku‑songa eyo, omwene ari na obhuturo bhwa okuchungura chimwi abhaanu bhoone bhanu abhagenda ku‑Nyamuwanga okutura ku‑mwene. Okubha omwene ni muwanga akajaanende koone, korereki abhasabhirwe ku‑Nyamuwanga omwanya gwone.

Bagalatia 2:16

Nawe eswe echimenya ati, omuunu atakutura okubharwa ati ni murengeresi imbere ya Nyamuwanga kwa okuruubha ebhiraagiro bhya Muusa, tari ni kwa okwikirisya Yeesu Kirisito omwene era. Nikwo kutyo eswe wone chiikirisiisye Kirisito Yeesu korereki chibharwe ati chiri abharengeresi imbere ya Nyamuwanga kwa okwikirisya Kirisito, kutari kwa okuruubha ebhiraagiro bhya Muusa. Chimari atari‑wo omuunu unu kaatura okubharwa ati ni murengeresi imbere ya Nyamuwanga kwa okuruubha ebhiraagiro bhya Muusa.

Yowana 14:6

Yeesu ˆnaamusubhya ati, “Anye naanye injira, echimari, na obhuwanga. Atari‑wo omuunu woonewoone unu kaatura okuuja ku‑Raata araabha ataturire kw‑anye.

Baeburania 7:11

Abhayisirayeeri ꞉bhaayaaywe ebhiraagiro bhya Muusa bhinu bhyariga nibhiruubhana na obhugabhisi bhwa Abharaawi. Nawe obhukuumiiye bhutakutura okubhonekana ku‑njira ya obhugabhisi obhwo. Ku‑songa eyo, omugabhisi owundi ꞉eenderwe, unu aariga ari rwa Meerikijedeki, unu atakusooka mu‑ruganda rwa Abharaawi rwa Aruuni.

1 Timoteo 1:1

Inyarubha inu, niikaamire anye Pawuro, itumwa ya Yeesu Kirisito. Anye nitumirwe okubha itumwa ya Kirisito Yeesu ku‑chiragiriro cha Nyamuwanga Omuchungusi weeswe na Kirisito Yeesu niwe obhwiyikanyo bhweswe.

Bakolosai 1:27

Nyamuwanga ꞉eendere okubhaswerurira bhwa ekisi bhwa obhutinge bhwa imbisike ya okuruguusya, noorwo inguru ya abhaanu bhanu bhatari Bhayawudi. Obhutinge obhwo ni ati Kirisito ari mu‑myoyo jeemwe, ka wone, omwene niwe kaabhayaana obhwiyikanyo ati murisangira rikusyo rya Nyamuwanga.

Baefeso 3:12

Mbe, mu‑kubha na obhumwi na Kirisito na ku‑njira ya eriikirisya ryeswe ku‑mwene, chiri na obhuturo, obhwitaage na ribhaasi rya okufogerera Nyamuwanga.

Bagalatia 3:24

Ebhiraagiro bhya Muusa bhyariga nibhichitangasya rwa omuresi weeswe, okukingira omwanya gunu Kirisito ꞉eejire. Kurwa ejo woori, ni ku‑njira ya okwikirisya Kirisito era echitura okubharwa ati chiri bharengeresi imbere ya Nyamuwanga.

Yowana 1:17

Okubha, Nyamuwanga ꞉aasoosiisye ebhiraagiro bhyaye okutura ku‑Muusa, na woori asoosiisye obhwitiriranya bhwaye na echimari chaaye okutura ku‑Yeesu Kirisito.

Barumi 7:7

Woori chaayike ki? Chaayike ati, ebhiraagiro ni bhibhiibhi? Wuri, noorwo na akatyari! Nawe araabha ebhiraagiro bhitaakabheeye‑wo, nitaakamenyere ati ebhibhiibhi ni bhiinu ki. Araabha chitaakabheeye‑wo echiraagiro chinu echaayika ati, “Waasiga okurigira echiinu cha oweejaanyu,” nitaakamenyere ati okurigira echiinu cha omuunu owundi, ni kukora echibhiibhi.

Bagalatia 3:21

Woori angu, jitari ati ebhiraagiro ebhiyaajana na emirago jinu Nyamuwanga ꞉aaragire? Wuri, noorwo na akatyari! Araabha bhwakabheye‑wo obhuturo bhwa ebhiraagiro okuyaana abhaanu obhuwanga, mbe chaakaturire okubharwa ati chiri bharengeresi imbere ya Nyamuwanga kwa okuruubha ebhiraagiro.

Baeburania 3:6

Nawe Kirisito ni mwiyikanyibhwa rwa Omwana unu keemereegururu abhaanu bha mu‑nju ya Nyamuwanga. Abhaanu abho niiswe araabha chikagenderera okukingira ku‑bhuteero chiri na ribhaasi na okwikuuyisya jinu echiiyikanya.

Baeburania 7:20

Omwanya gunu Abharaawi bhaatuurwaga‑ko okubha abhagabhisi, Nyamuwanga ꞉ataarayiiye echiinu choonechoone inguru yeebhwe. Nawe omwanya gunu Yeesu ꞉aakorerwe okubha Omugabhisi, Nyamuwanga ꞉aarayiiye, rwa kutyo jikaamirwe mu‑Bhikaame Ebhyeru ati, “Raatabhugenyi aarayira, ka wone, atariyindura obhwiganirisya bhwaye wuri. ‘Awe naawe Omugabhisi akajaanende koone.’”

Baeburania 11:6

Atari‑wo omuunu unu kaatura okukondisya Nyamuwanga araabha atakumwikirisya. Bhuri muunu unu keenda okufogera ku‑Nyamuwanga, eenderwe okwikirisya ati Nyamuwanga ari‑wo, ka wone niwe kaayaana echiyaanwa bhanu abheenda okumusombookerwa.

Yakobo 4:8

Mufogererega Nyamuwanga, niwo omwene wone aribhafogerera. Emwe abha ebhibhiibhi, musige ebhibhiibhi bhyemwe na mukore ja ekisi. Emwe abha emitima ebhiri, muruubhe Nyamuwanga kwa emyoyo jeemwe joone.