1 Yoana 4:9 - Indagano Inyaaya mu-Chijita

⁹ Nyamuwanga omwene ꞉eeresiisye eryenda ryaye kw‑iswe, kwa okutuma Omwana waaye umwi wenyere era mu‑chaaro, korereki Omwana oyo achiyaane obhuwanga bhwa akajaanende koone.

INDAGANO INYA:YA

⁹ Okwenda kwa Nyamuanga kwabu:risibwe kwiswe ati, Omwana wae unu e:buywe umwi era, Nyamuanga amutumire mu ca:ro, korereki eswe cibe baanga kubwae.

1 Yoana 4:9 Referans Kwoze

Yowana 3:16

Nyamuwanga eendere muno abhaanu bhoone bha ku‑chaaro kunu. Nikwo okukora ꞉aatumire Omwana waaye wenyere aaje ku‑chaaro kunu, korereki bhuri muunu unu keekirisya Omwana oyo aasiga okusimagira, tari abhe na obhuwanga bhwa akajaanende koone.

1 Yoana 5:11

Obhubhambaasi obhwo ni bhunu, Nyamuwanga achiyaanire obhuwanga bhwa akajaanende koone. Obhuwanga obhwo echibhubhona kwa okwikirisya Omwana waaye.

Barumi 8:32

Nyamuwanga ꞉ataafwiriiye echigongo Omwana waaye omwene, tari ꞉aamusoosiisye korereki afwe inguru yeeswe bhoone. Kurwa ejo, araabha ꞉aasoosiisye Omwana waaye inguru yeeswe, chimari arichiyaana amabhando goone okutura ku‑mwene!

Yowana 6:57

Raata omuwanga ꞉aantumire, anye wone enibhona obhuwanga okusooka ku‑mwene. Nyabhuriko, omuunu woonewoone unu kaandya, kaabhona obhuwanga okusooka kw‑anye.

1 Yoana 4:10

Rinu niryo eryenda, jitari ati, eswe ꞉chaatangatire okwenda Nyamuwanga. Tari omwene niwe ꞉aatangatire okucheenda eswe. Nikwo okukora ˆnaatuma Omwana waaye, abhe echoogo cha okusoosya‑wo ebhibhiibhi bhyeswe na okuchigwatanya na Nyamuwanga.

1 Yoana 3:16

Mbe, Kirisito ejire aachifwira ꞉aacheeresiisye kutyo eryenda rya echimari riri. Eswe wone kutyokutyo, echikenwa chiikirisye noorwo okufwira abheejaasu.

Yowana 10:10

Omwifi kaaja mw‑igutu korereki eebhe, eete na okusingaarisya jinaama. Nawe anye niijire korereki jibhe na obhuwanga, ka wone jibhe nabhwo bhwafu.

Yowana 6:51

Anye naanye ebhiryo bhinu bhiikire okusooka mu‑rwire, bhinu ebhiyaana abhaanu obhuwanga bhwa akajaanende koone. Omuunu woonewoone unu kaarya ebhiryo ebhyo, kaabha na obhuwanga bhwa akajaanende koone. Ebhiryo ebhyo ni mubhiri gwani gunu nirisoosya inguru ya abhaanu bhoone bha ku‑chaaro kunu, korereki bhabhe na obhuwanga bhwa akajaanende koone.”

Yowana 3:18

Nyamuwanga atakuramura abhaanu bhanu abheekirisya Omwana waaye. Nawe abhaanu bhanu bhatakumwikirisya, bharamuuywe kwa okubha bhateekirisiisye Omwana eenyere wa Nyamuwanga.

Baeburania 1:5

Okubha atari‑wo maraayika unu Nyamuwanga ꞉aabhwiriiye emisango rwa jinu ꞉aabhwiriiye Yeesu ati, “Awe naawe Omwana waani, reero eniraasya ati anye niri Somwana.” Ka wone Nyamuwanga ꞉ataayikire inguru ya maraayika woonewoone ati, “Anye niribha Esemwene, na omwene aribha Omwana waani.”

Yowana 8:42

Yeesu ˆnaabhasubhya ati, “Araabha Nyamuwanga akabheeye ari Somwana, mwakanyendere, kwa okubha nisookere ku‑mwene, ka woori niri anu. Anye ꞉niteejire ku‑bhuturo bhwani, tari Nyamuwanga niwe ꞉aantumire.

Ruuka 4:18

“Mwoyo Mweru wa Raatabhugenyi Nyamuwanga, ari aamwi na anye. Aansorere, nibhega nindaasisya abhataka Emisango ja Ekisi. Aantumire ku‑bhaanu bhanu bhabhoyerwe, okubharaasisya ati abhaja okwigurirwa, na okubhwira abhawofu ati abhaja okurora, na niwonʼye abhaanu bhoone bhanu abhanyaasibhwa.

Mariko 12:6

Omwene esambu ˆnaasigara na omuunu umwi era wa okutuma, omwana waaye omwendwa. Ku‑bhuteero ˆnaamutuma ku‑bharimi bharya, ˆneetogera ati, ‘Abhaja okuyaana omwana waani echibharo.’

1 Yoana 4:16

Woori, eswe echimenya na echiikirisya ati Nyamuwanga kaacheenda. Nyamuwanga ni ryenda. Omuunu woonewoone unu ari na eryenda, niwe ari na obhumwi na Nyamuwanga, Nyamuwanga wone ari na obhumwi nage.

Yowana 14:6

Yeesu ˆnaamusubhya ati, “Anye naanye injira, echimari, na obhuwanga. Atari‑wo omuunu woonewoone unu kaatura okuuja ku‑Raata araabha ataturire kw‑anye.

Yowana 6:29

Yeesu ˆnaabhasubhya ati, “Omusango gunu Nyamuwanga keenda mukore, ni kunyikirisya anye, unu omwene ꞉aatumire.”

Yowana 8:29

Unu ꞉aantumire ari aamwi na anye. Achaariga okunsiga eenyere, kwa okubha omwanya gwone enikora jinu ejimukondisya.”

Yowana 5:23

Raata ꞉aakorere kutyo, korereki abhaanu bhoone bhayaane Omwana echibharo rwa kutyo abhayaana Esemwene echibharo. Omuunu woonewoone unu atakuyaana Omwana echibharo, oyo atakuyaana echibharo Raata unu ꞉aamutumire.

Yowana 9:3

Yeesu ˆnaabhasubhya ati, “Unu atari muwofu okuruubhana na ebhibhiibhi bhyaye, amwi ebhibhiibhi bhya abheebhusi bhaaye. Tari ꞉eebhuuywe ari muwofu, korereki obhuturo bhwa Nyamuwanga bhubhonekane ku‑bhaanu mu‑bhurame bhwa omuwofu oyo.

1 Yoana 5:13

Enibhakaamira inyarubha inu, emwe bhanu omwikirisya risiina rya Omwana wa Nyamuwanga, korereki mumenye ati muri na obhuwanga bhwa akajaanende koone.