1 Petero 1:15 - Indagano Inyaaya mu-Chijita

¹⁵ Nyamuwanga unu ꞉aabhabhirikiiye ni mweru. Woori emwe wone omukenwa mubhe abheeru mu‑katungiiywe keemwe,

INDAGANO INYA:YA

¹⁵ Nawe mubega be:ru mu ntungwa jo:ne rwa kutyo Oyo ababirikiye ni mweru.

1 Petero 1:15 Referans Kwoze

Matayo 5:48

Mbe, mukuumirega rwa Esomwana unu ari mu‑rwire kutyo akuumiiye.

2 Bakorinto 7:1

Woori, abheendwa bhaani, Nyamuwanga ꞉aaragire okuchiyaana ejo joone. Kurwa ejo, chiiyesye kwa okusigana na obhujabhi bhwone, bhwa echinyamubhiri na obhwa echinyamwoyo. Chibhe abheeru ku‑misango joone, ku‑njira ya okuramya Nyamuwanga.

Baeburania 12:14

Mbe, mwikomeesyega okwikara kwa omurembe na abhaanu bhoone. Ka wone mwikomeesyega okubha abheeru mu‑bhurame bhwemwe, kwa okubha atari‑wo omuunu unu kaatura okurora Raatabhugenyi akabha atari mweru.

Yakobo 3:13

Niga mw‑imwe unu ari na obhwengeeso na okusombookerwa? Mbe, eeresye obhwengeeso bhwaye na okusombookerwa kwaye mu‑kukora ebhikorwa bhya ekisi, mu‑bhworooro bhunu obhusooka mu‑bhwengeeso.

1 Yoana 3:3

Kurwa ejo, omuunu woonewoone unu ari na obhwiyikanyo obhwo, keendwa asigane na ebhibhiibhi, rwa kutyo Kirisito atakukora ebhibhiibhi.

1 Petero 2:12

Mubhe na jitungwa ja ekisi agatigati ya abhaanu bhanu bhatakwikirisya Nyamuwanga, korereki araabha abhabhakuurisya ati, muri bhajabhi, bhaakarora ebhikorwa bhyemwe bhya ekisi, bhakusye Nyamuwanga ku‑songa yeemwe, orusuku rwa okusubha kwaye.

Bafilipi 1:27

Mbe, omusango gwa bhusibhusi ni ati jitungwa jeemwe jingane na Emisango ja Ekisi ja Kirisito. Aribha naaja okubharora, amwi nikarema okuuja, eneenda okuungwa ati omugenderera okurumatana na okubha na obhumwi, ka wone ati muri aamwi mu‑kurwanirira eriikirisya rinu erisookana na Emisango ja Ekisi.

1 Petero 2:9

Nawe emwe muri rwibhuro orusorwa, muri bhugabhisi bhwa echikama, echise cha abheeru, abhaanu bhanu mwawuuywe na Nyamuwanga, korereki muraasye ebhikorwa bhyaye ebhikuru. Omwene ꞉aabhabhirikiiye okusooka mu‑chisuute, mwingire mu‑bhweru bhwaye bhwa okuruguusya.

Baeburania 13:5

Mwasiga okubha na jitungwa ja okwenda jipirya, tari mwiywega na ebhiinu bhinu muri nabhyo, okubha Nyamuwanga omwene ꞉aayikire ati, “Nitarikusiga noorwo nitari kurabhirwa wuri.”

Tiito 3:14

Abheejaasu bhoone, bheeyigire okwikomeesye okukora ebhikorwa bhya ekisi, korereki bhabhe na obhuturo bhwa okusakira abhaanu bha obhukene bhwa bhusibhusi. Bhaakakora kutyo obhurame bhwebhwe bhutaribhurwa amatwasyo.

Obhusweruro 3:7

“Ukaamire maraayika wa mw‑ikanisa rya Firadeefiya kutya, Anye niwe omweru na owa echimari. Ka wone, niri na orwiguriro rwa omukama Dawudi. Nikeegara orwigi, atari‑wo owundi unu kaatura okurwigura. Nikarwigura, atari‑wo owundi unu kaatura okurwigara. Mutegeresye jinu enibhabhwira!

2 Timoteo 1:9

Omwene ꞉aachichunguuye, ˆnaachibhirikira chibhe abhaana bhaaye abheeru. ꞉Ataakorere kutyo kwa okubha ati ebhikorwa bhyeswe ni bhya ekisi, tari ꞉aakorere kutyo mu‑kwenda kwaye na obhwitiriranya bhwaye. ꞉Aachiyaaye obhwitiriranya obhwo inguru ya Kirisito Yeesu, noorwo achaari okubhumba echaaro.

1 Timoteo 4:12

Omuunu woonewoone asige okukugaya, kwa okubha ati uchaari musigaji, tari wiikomeesye okubha echijekekanyo cha ekisi ku‑bheekirisya mu‑nyaayika, mu‑tungwa, mu‑ryenda, mu‑riikirisya na mu‑bhwima.

Bafilipi 3:20

Nawe, eswe obhwikaro bhweswe ni mu‑rwire na echitegerera kwa obhwira obhunene Omuchungusi na Raatabhugenyi weeswe Yeesu Kirisito, aaje okusooka eyo.

Bafilipi 3:14

Eniikomeesya okubhirima korereki ku‑bhuteero nibhone obhuyigi na okuyaanwa echiyaanwa. Echiyaanwa echo nibhwo obhubhirikisi bhwa Nyamuwanga bhwa okwingira mu‑rwire ku‑njira ya Kirisito Yeesu.

Obhusweruro 6:10

Niwo, nibhaamura obhuraka nibharira, nibhaayika ati, “Raatabhugenyi awe, Nyamuwanga owa obhuturo bhwone, unu uri mweru na owa echimari, mbawo owukoora! Uriramura ri abhaanu bha ku‑chaaro na okuchisubhisya orusiima ku‑bhanu ꞉bhaachiitire?”

1 Petero 5:10

Nyamuwanga wa obhwitiriranya bhwone, ꞉aabhabhirikiiye korereki musangire aamwi nage mw‑ikusyo ryaye rya akajaanende koone, aamwi na Kirisito. Omunyaaka kwa omwanya mutooto era, nawe Nyamuwanga omwene aribhakomeesya, aribhayaana amanaga na okubhakuumisya.

1 Petero 3:16

Mubhega na emitima emyeru, korereki bhanu abhabhakuurisya amabhiibhi bhaakarora akatungiiywe keemwe ka ekisi ku‑Kirisito, bheesware.

Tiito 3:8

Inyaayika eyo ni ya echimari. Woori enikusabhwa awe ukomeeresye muno inguru ya emisango ejo ku‑bhaanu, korereki abhaanu bhanu abheekirisya Nyamuwanga, bhakabhuke na okukomeera okukora ebhikorwa bhya ekisi. Emisango ejo nijo ja ekisi, ka wone ejireeta omuriiro ku‑bhaanu bhoone.

1 Batesalonika 2:12

korereki murame rwa kutyo Nyamuwanga keenda. Nyamuwanga niwe kaabhabhirikira korereki mwingire mu‑bhukama na mw‑ikusyo ryaye.

Obhusweruro 4:8

Ebhibhumbwa ebhina ebhyo, bhuri chimwi chaariga chiri na amabhabha gataanu na rimwi. Bhyone kutyo, bhyariga bhiswirire ameeso bhuri orubhaara, noorwo ku‑mabhabha. Ebhibhumbwa ebhyo bhyariga nibhiimba mu‑ngeta na mu‑mwisi okujibhira wuri. Orwimbo runu bhyembaga ni runu, “Mweru, Mweru, Mweru ni Raatabhugenyi Nyamuwanga owa obhuturo bhwone, aariga ari‑wo, ari‑wo na aribha‑wo.”

Barumi 9:24

Abhaanu abho neeswe, bhanu ꞉aabhirikiiye. ꞉Ataabhirikiiye Abhayawudi era, tari noorwo bhanu bhatari Bhayawudi.