Ibrani 12:2 - Izere New Testament

² Won tin sak yir anyisi na aYeso wu ne a ta nye ritin kuno̱o̱k katsak yir ne a nye aner aya a tana sak kuno̱o̱k katsak yir tanan mumak. A tsesek kaye̱e̱r risam riku wu kamok ike̱ng riye̱ rikan i ta se nasho̱o̱n. A fok isum riku wu natoon kukon baꞌ. Kyo̱o̱rna a se nusonong nubo̱k riya itsik rigwo̱m Adakunom.

Ibrani 12:2 Referans Kwoze

1 aBitrus 3:18

Kamok aKiristi so̱ risam ma a ku kamok rine̱n yir cice̱r kutak kuzining tsek, wu nye azhe̱l'e, amma a ku kamok áya sang á ta nye azhe̱l'e baꞌ nong a tà tseng be yir nufe Adakunom. A tú fe̱r nuro̱m amma Adakunom tú sak a dorok kaye̱e̱r kabik be kutser.

Ibrani 1:3

Igon'e ne ka nye akanang kuyiik Adakunom, a tas Adakunom kyo̱o̱n. A yiir koakye ike̱ng be kukyem rife̱ wu. Nama a tá sak yir ta te yir zhe̱l kaye̱e̱r rine̱n yir, yong a sonong nubo̱k riya Aya a ta nye a yiik'e kaye̱e̱r kaza.

Afisa 5:2

Sor yin kusor ku naka shim kyo̱ndi aKiristi tin shim yir, a tá no̱o̱k rice wu kamok yir, kyo̱ndi asidaka aya a ta be iko̱o̱n itek, aya a ta nye kamok Adakunom.

aFilipi 1:6

Mi no̱o̱k katsak ye Adakunom afe a tan san itomong itek naye̱ yin tà ya kasho̱o̱n anong ma nigang'e nizen aYeso tana bun a be̱.

Ibrani 9:28

anong ne a no̱o̱k aKiristi kutak kuzining gip nong a tá sor asidaka kusok rine̱n ánerawe whe̱re̱. A tà bun a be̱ ife afa nong a tà shesh áya a ta sen ku tor, sang kamok nong a tà sok rine̱n baba baꞌ.

aYohana 6:40

Kamok kushim Ada mi nye ye, koangan afe a tin sak anyisi na Igon'e ne a ni no̱o̱k katsak, a tà se̱ kutser kufe izen izen, ne mi ku dorok katuk igang'e.”

1 aBitrus 3:22

aKiristi tseng kaye̱e̱r kaza, a se nubo̱k riya Adakunom, ámaleka cice̱r ne ribir áya a tin nye rigwo̱m natoon kaza se nubo̱k wu.

Itomong Ámanzo 5:31

Adakunom tu no̱o̱k kuyiik a tu ku sak nubo̱k riya wu nong a ta sor áko̱k kasho̱o̱n ne a sor aner kashesh nong a ta sak áner Isarela ta shishing kuse ba ne a ka re̱ng ba rine̱n ba.

aLuka 24:26

Aser, sang ma aKiristi so̱ risam ike̱re̱ na cice̱r, a ta ra se̱ kuyiik wu aꞌa?”

aZhud 1:21

Sor yin kaye̱e̱r kushim Adakunom ne i tor yin Agwo̱m Ágwo̱m yir aYeso Kiristi aya kamok kuro̱ riye̱ a ta tseng be yir kaye̱e̱r kutser kufe izen izen.

Ibrani 8:1

Rice rife̱ yir tin fe̱ yir se ye, yir be yir agbang atsi akak kyo̱ndi ayong afe a tá sonong nubo̱k riya itsik rigwo̱m Adakunom ayiik'e kaye̱e̱r kaza.

2 aTimoti 4:8

Kyo̱o̱rna makong, a min sak ishorong ife ku se gye̱r'e nasho̱o̱n Adakunom, iya Agwo̱m Ágwo̱m, aner kuto̱ amok afe katsak tanin no̱o̱k Katuk'ong. Sang awan mi ne a tin no̱o̱k tsek baꞌ, amma be cice̱r áner aya a ta min te riye̱ nube̱ wu gip.

aFilipi 3:20

Amma yir, yir nye yir áfe kaza, azong ne yir min sak yir anyisi ye, aner kashesh tà ne, a ta nye aYeso Kiristi Agwo̱m Ágwo̱m yir.

aMarkus 14:36

Ne aYeso nye aduwa ye, “Abba, Ada, wan kyem i nye koakye ike̱ng. Sok ako̱p risam na. To̱, nye ike̱ng iya wan ta shim sang iya mi ta shim baꞌ.”

Ike̱ng a ta tonong aYohana 2:8

“Zibir amaleka ikilisiya aSamirna'me ye: Rife̱ na ne nufe aner aya a ta nye Ime̱se̱ng'e ne a nye Igang'e, wu ne a ku a tá bun a dorok be kutser.

Ibrani 13:13

kamok anong i wuruk yir nong ta be yir nufe nama kuwo̱p, nong ta fok yir isum kyo̱ndi wu tá fok.

Ibrani 5:9

Nizen iya a tá ma shining gye̱r, ne a ma sor iren kutser kufe izen izen nufe koangan aya a ta kuus ike̱ng iya a ta fe̱.

aYohana 13:3

aYeso ren ye Ada'me n won ike̱re̱ cice̱r nubo̱k wu ne a ren ye wu ne nufe Adakunom, nufu Adakunom'me ne wu tù ku bun.

aLuka 17:5

Ámanzo fe̱ be Agwo̱m Ágwo̱m'me ye, “Ni barang mo yir kuno̱o̱k katsak.”

aMarkus 9:24

Zirik atek igon ame fe̱ ye, “Mi no̱o̱k katsak, ni se̱ mo be kudun no̱o̱k katsak'i.”

Ibrani 12:3

Ye̱re̱k yin tá di yin kuri risam riya a tá so̱ nubo̱k ánerawe a ta nye áfe rine̱n fan a ba ka te yin gbe̱re̱k ne yin ni tun yin riye̱.

Afisa 2:16

Kyo̱ndi kuro̱m kuzining a tu bun be ba cice̱r afa'ong nufe Adakunom. A nye anong be riku wu natoon kukon nong a tà tun rifub ri ta se natite ba.

Itomong Ámanzo 5:41

Ámanzo dorok azong be riye̱ rikan kamok a tá di ba kyem a ta ka no̱o̱k ba risam kamok riyerek aYeso.

aYohana 12:32

Amma mi, izen iya a ti sok naza, mi tà ko̱ro̱k ánerawe cei nunaan.”

1 aBitrus 1:11

Ba shim nong á ta ren izen'e be kuri iren kashesh'e Kabik aKiristi ka ta se kaye̱e̱r ba tu ku tak ba natoon'e nizen a tá fe̱ itak natoon risam aKiristi be kuyiik wu tana se̱ nama risam'me.

Ibrani 10:14

Kamok a tá nye asidaka kutak kuzining, a sak áfe a ta te zhe̱l tà shining ma izen izen.

aYohana 12:24

Katsak'e ne mi ta ka tak yin, sang ke a te ica naya kaben nong i ta bus baꞌ, i ta sor ica'me izining tsek. Amma ke i bus, to̱, ne i no̱o̱k íca whe̱re̱.

aYohana 8:56

Ada yin Ibrahim nye riye̱ rikan kamok a tá izam mi, ayong a di, a nye riye̱ rikan.”

aYohana 1:29

Katuk afe afa aYohana di aYeso saase nufu, yong a fe̱ ye, “Di yin, Aturuk Adakunom, aya a tan n sok rine̱n kazatse!

aLuka 23:11

aHiridus be ásozha wu te̱n be wu fe̱re̱, ne á ku kok ko'me. Á tú te kukpiin ágwo̱m ta tes, á tá bun á tseng be wu nufe aBilatus.

aMatiyu 20:28

Anong ne Igon Anerawe be̱ nong a tu ku nye itomong baꞌ, amma nong a ta nye anerawe'me, ne a no̱o̱k kutser wu kamok kashesh ánerawe whe̱re̱.”

aMatiyu 16:21

Kum be izen iyong, aYeso san kufe̱ be álimazhiri wu kanang ye ma wu tseng na aUshalima nong a ta se so̱ iriri risam dide̱ng nibo̱k asho̱n be ágbang atsi ne áner kubo̱so̱p itsi ma a tà ku fe̱r. Nama inom itaar a tà ku dorok be kutser.

Ike̱ng a ta tonong aYohana 1:17

Mi ta fa ku di ne mi kpa nasho̱o̱n wu kyo̱ndi kukom. Ayong a ti sak kubo̱k riya wu ni mi, a tá fe̱ ye, “Sang tu fok inyim baꞌ. Mi ne i nye Ime̱se̱ng'e ne i nye Igang'e.

Ike̱ng a ta tonong aYohana 1:11

ye, “Zibir ike̱re̱ iya wan ta di kaye̱e̱r kufumung ta tom ikilisiya kanataar'e. Ikilisiya Afisa ne aSamirna, ne aPagamum be aTiyatira be aSardis ne aFiladefiya ne áfe aLaudikiya.”

Ibrani 7:19

Itsi aMusa kyem i ta sak ike̱ng ikak ta te zhe̱l baꞌ, iyong ne i sak yir nye yir kanye̱k ike̱ng itek iya yir tin te yir riye̱ natoon'e nong ta se yir bubarak be Adakunom.

Ibrani 1:13

Ámaleka anyaka ne Adakunom kun fe̱ be wu ye, “Sonong nubo̱k riya mi, ma mi sak ámudo̱n wan te ike̱ng kusak atak wan e̱?”

Itomong Ámanzo 2:36

“Kamok anong, won yin áner Isarela cice̱r tu ren yin ye, aYeso aya yin tú ku tigak yin nukon ame ne Adakunom mu ku sak an te Agwo̱m Ágwo̱m ne a nye aKiristi.”

aMarkus 9:12

Ne aYeso fe̱ be ba ye, “Katsak'e, Iliya ne a ta san kube̱ ni ime̱se̱ng'e nong a ta sak ike̱re̱ cei tu ku bun kyo̱ndi i ta se nizham, akye̱ sak a ta zibir ye Igon Anerawe ta so̱ iriri risam dide̱ng dim ne anerawe ku rawu e̱?

Ike̱ng a ta tonong aYohana 1:8

Agwo̱m Ágwo̱m yir Adakunom fe̱ ye, “Mi ne i nye Alfa ne aOmega. Wu tu se gbugbang, wu ne a kuse kyo̱o̱rna, wu ne a tà bun a be̱. Mi ne i nye afe kukyem cice̱r.”

Ibrani 11:36

Á nye kye̱re̱ be ákak ne a ka whereng ba, á rosom ákak a tá ka te ba nitso̱m.

Ibrani 10:33

Izen ikak a ta te yin nisum nasho̱o̱n ánerawe ne a ka tabak yin. Izen ikak, yin shim a ta ka nye yin ike̱re̱ iyong mak be áya a ta sen ku tabak ba gip.

aMarkus 16:19

Nama aYeso tá fe̱ anong be ba, a tú sok a tá tseng'e kaye̱e̱r kaza nong a ta se sonong nubo̱k riya Adakunom.

Itomong Ámanzo 3:15

Yin fe̱r yin aner aya wu ne a ta Ritin kutser amma Adakunom tú ku dorok nure̱k. Yir tú ku di yir be anyisi yir.

1 aKoranti 1:18

Rife̱ riku aKiristi nukon nye rifunam nufe áner aya a ta se niren kuwei, i nye kukyem Adakunom nufe yir aya i ta se̱ yir kashesh.

1 aKoranti 1:23

Yir taas yir itak riku aYeso be kutigak wu, iyong sor ike̱ng áner aYahuda ta wor a shim kufok'e baꞌ, ne i sor rifunam nufe aner aya a ta nye aner aYahuda baꞌ.

aYakub 2:1

Aroneng'i kyo̱ndi afe kuno̱o̱k katsak na aYeso Kiristi Agwo̱m Agwo̱m yir, afe kuyiik, tu tonong yin kushim rice baꞌ.

aMarkus 15:28

Be anong ne rife̱ Adakunom riya ri tá fe̱ ye, “A tú ku fa mak be amaan aner,” shining.