aYohana 8:26 - Izere New Testament

²⁶ Ike̱re̱ kuse dide̱ng mi tana kyem i fe̱ ife amok natoon yin, amma wu aya afe a tin tom nye afe katsak. Ike̱re̱ mi tá fok nufu ne mi taas kazatse.”

aYohana 8:26 Referans Kwoze

aYohana 15:15

Mi tà ba ka yis yin ye ásam baꞌ, kamok asam ren kuto̱ro̱ng atekasa wu baꞌ. Mi ta ka yis yin ye áferime̱ mi makong, kamok koakye ike̱ng iya mi tá bo̱so̱p nufe Ada mi, mi ma ka taas yin.

aYohana 8:40

Mi nye aner aya mi ta fe̱ katsak kaya mi tá fok nufe Adakunom. amma yin shim tin fe̱r yin. To̱, Ibrahim'me nye ike̱re̱ kuri iyong baꞌ.

aYohana 17:8

Kamok rife̱, wan tin no̱o̱k ne mi tú ku taas ba ne ba shan, ne á ren be katsak ye mi ne nufuan, ne ba ni no̱o̱k katsak ye wan ne i ti tom.

aYohana 7:28

aYeso ta sen bo̱so̱p ánerawe'me kaye̱e̱r kubang agbang kutu kuya Adakunom iben'e, a tá kuto̱ naza ye, “Ei, yin ti ren yin, ne i ren yin karo̱ afe mi tú ku ne, mi be̱ kube̱ rice mi baꞌ. Amma aya a tin tom nye afe katsak, yin tu ku ren yin baꞌ.

2 aKoranti 1:18

Kyo̱ndi yin ta ren yin ye, Adakunom nye aner a ta fe̱ ike̱ng ne a nye, anong ne rife̱ yir ta fe̱ yir be yin nye, “Ei ne ri bun nye Wayo” baꞌ.

aYohana 16:12

“Mi be rife̱ dide̱ng tana ka tak yin, amma yin ta kyem i na tsesek yin ta fok yin kyo̱o̱rna baꞌ.

aYohana 7:16

aYeso fe̱ be ba ye, “Ike̱re̱ iya mi ta ka bo̱so̱p yin'e nye ife rice mi baꞌ, amma ife aya a tin tom.

aYohana 3:11

Katsak'e ne mi ta ka tak, yir fe̱ yir natoon ike̱re̱ yir ta ren yir, ne iya yir ta di yir, gip be anong yin ti no̱o̱k yin katsak nike̱ng ife yir ta fe̱ yir baꞌ.

aYohana 8:25

Ayong á rip aYeso ye, “Wu wan nye angan nigaan'e e̱?” Ne aYeso fe̱ be ba ye, “Mi ne i nye aya mi tá ka tak yin kum ni ime̱se̱ng'e.

aYohana 8:27

Ánerawe'me ren ye wu sen ku taas ba itak natoon Ada wu baꞌ.

aYohana 18:20

aYeso fe̱ be wu ye, “Ei, mi fe̱ koakye ike̱ng kanang nasho̱o̱n koangan. Mi bun ibo̱so̱p ánerawe'me kaye̱e̱r atu aduwa ne kaye̱e̱r agbang kutu kuya Adakunom iben naro̱ kaya áner aYahuda tú ku nyiis cice̱r. Mi kun i fe̱ ike̱ng ikak ni nune̱re̱ng baꞌ.