aKolosi 3:16 - Izere New Testament

¹⁶ Won rife̱ aKiristi tu nyeseng be agap dide̱ng kaye̱e̱r aye̱ yin, ne i naka bo̱so̱p yin'e, ne i naka nyesek yin ibo̱ro̱ng, be koakye kuri kukyem, ne i bom yin abom aZabura, ne i kerek yin Adakunom, ne i bom yin abom afe a ta nye afe Kabik, ne i nye yin riye̱ rikan kaye̱e̱r aye̱ yin be Adakunom.

aKolosi 3:16 Referans Kwoze

Afisa 5:19

Ke yin sen fe̱ yin kanu ne i ninye yin itomong be kufumung aZabura ne abom riye̱ rikan ne abom azhe̱l'e. Yiir bom yin abom kaye̱e̱r riye̱ yin kamok Agwo̱m Ágwo̱m.

aYohana 15:7

Ke yin sor kaye̱e̱r'i ne rife̱ mi se kaye̱e̱r yin, yin tà rip yin koakye ike̱ng yin ta shim yin, a tà ka nye yin'e.

aRom 10:17

Kamok anong, a ti no̱o̱k katsak rife̱ ke a fok rife̱'me. A fok rife̱'me nizen iya a ta nye awazi Rife̱ Ritek natoon aKiristi.

1 aYohana 2:24

Kamok anong, mi fe̱ be yin ye i ra yiir yin rife̱ yin tá fok yin kum ni ime̱se̱ng'e. Ke yin nye yin anong, yin ta te yin azining be Igon Adakunom'me ne Adakunom a ta nye Ada'me.

Afisa 1:17

Mi yiir kunye aduwa ye Adakunom afe Agwo̱m Ágwo̱m yir aYeso Kiristi, Ada yir ayiik'e ye a ra ka no̱o̱k yin kabik kafe kukyem ne kafe kuren ike̱ng nong ase̱ yin tù ku ren yin dide̱ng.

aYakub 3:17

Amma kukyem ku ta ne naza, nime̱se̱ng'e cice̱r se jel ne kushim kutek be kuto akak, ne kumees rice, be kuro̱ riye̱ kunye kutek kufe katsak dar kushim rice.

2 aYohana 1:2

Mi ta shim yin kamok yin ren yin katsak kaya yir ta be yir natoon Adakunom, yir ta yiir yir katsak'e ma izen izen.

2 aTimoti 3:15

Yiring, kum izen iya wan tá ru nye igon, wan tsang i ren rife̱ Adakunom rizhe̱l'e, riya ri tana kyem ka bo̱so̱p iren kuse̱ kashesh ke anerawe no̱o̱k katsak na aYeso Kiristi.

aKolosi 1:9

Kamok anong ne isak kum nizen iya yir tá fok yir itak natoon yin, yir won kunye yir aduwa kamok yin baꞌ. Yir nye yir izong ye Adakunom ra ka tonong yin ike̱ng iya wu ta shim dim nong ase̱ yin ta se̱ yin kukyem Kabik, ne i ren yin ike̱ng kunye.

Ike̱ng a ta tonong aYohana 5:9

Iyong á bom abom afas ne á fe̱ ye, “Wan kyem ta sok kufumung'e, wan kyem ta bisik idun'e kamok a tà ka tse̱e̱r. A ta nyosong naso̱k wan nong i tin shan ánerawe a ta te afe Adakunom. Wan shan Adakunom ánerawe cice̱r kaye̱e̱r koakye irem ne koakye izere ne koakye kaben.

1 aYohana 2:27

Amma yin, yin n se̱ yin Kabik Kazhe̱l'e nufe aYeso kaya ka ta sor be yin koakye izen. Kamok anong yin ba tse̱r yin aner akak a tana ka bo̱so̱p yin'e baꞌ. Kabik wu tà ka bo̱so̱p yin ike̱re̱'me ife katsak cei. Kukasa wu tin kasa yir nye katsak, ku nye kufe abo̱o̱s baꞌ. Kyo̱ndi a tá ka bo̱so̱p yin'e ye i ra sor yin kaye̱e̱r aYeso.

aKolosi 4:6

Won rife̱ yin tu sas kufok nong ase̱ yin ta ren yin kuri iren iya yin tana fe̱ yin be koangan aya a tana ka nye yin kurip.

Afisa 5:17

Kamok anong tu te yin áfunam'e baꞌ, amma ren yin ike̱ng iya i ta nye riye̱ Agwo̱m Ágwo̱m.

aYakub 5:13

Akak yin se nudaam a? A ra nye aduwa. Riye̱ akak n kare̱p a? Won a tu bom abom ku tiyiik Adakunom.

aTitus 3:6

Kabik Kazhe̱l yong ne a ti korok natoon yir ne̱k kamok ike̱ng iya aYeso Kiristi Aner Kashesh yir tá nye.

1 aKoranti 14:26

Ároneng, ike̱ng mi tin fe̱ natoon'e se ye, nizen iya yin nyim yin, ke akak se be abom kukerek Adakunom, ne akak sen bo̱so̱p ánerawe'me, ne akak fe̱ ike̱ng iya Adakunom tu ku tonong, ne akak sen fe̱ ni írem iduk, ne akak kirik ike̱ng iya a ta fe̱. A ra nye koakye nong a tin no̱k áfikuus kaye̱e̱r kabik.

aYakub 1:5

Ke akak yin be kukyem kuren ikeng baꞌ, a ra rip Adakunom, afe a ta no̱o̱k koangan washak. A tu ku no̱o̱k be riye̱ rizining sang be aye̱ afa baꞌ.

aKolosi 1:28

Iyong ne i sak yir ta taas yir itak aKiristi, yir kpam yir koangan ne ibo̱so̱p yir ánerawe'me be koakye kuri kukyem yir nong ta tseng yir be koangan mumak kaye̱e̱r aKiristi.

Ike̱ng a ta tonong aYohana 15:3

Á bom abom aMusa asam Adakunom be abom a ta bom Aturuk'e ame ye, “Kunye wan se yiik ne ku nye ike̱ng azhing Adakunom agbang Agwo̱m Ágwo̱m afe kukyem cei. Iren wan nye iren itek be ife katsak. Wan ne i nye agbang Agwo̱m Ágwo̱m afe ánerawe kazatse cice̱r.

1 aYohana 2:14

Mi ta zibir yin'e, aya i tan kyem yin ánerawe nabik kamok yin ren yin aKiristi'me aya a tá se kum ni ime̱se̱ng'e. Mi ta zibir yin'e, aya i ta ru nye yin acam nabik kamok yin be yin agap nikuus Adakunom ne rife̱ Adakunom'me kuse naye̱ yin. Yin n canang yin Ishetan a ta nye Amaan Aner.

1 aTimoti 6:17

Tak áya a ta be kurum kaye̱e̱r kazatse na be agbang kuto̱ ye sang á tu ya kuka be kurum ba baꞌ, ka á tin te aye̱ natoon kurum ba baꞌ, kuya ku tana gang koakye izen. Amma á rin te aye̱ na Adakunom aya a tin nyesek yir koakye ike̱ng kpe̱ iya yir tanin fok yir kusas'e.

2 aTasalonika 3:15

Sang tu nye yin be wu kyo̱ndi amudo̱n yin baꞌ, amma ku no̱o̱k yin ibo̱ro̱ng kyo̱ndi aronyining yin.

1 aTasalonika 4:18

Kamok anong na tsesek yin be rife̱ na.

1 aKoranti 14:15

To̱, akye̱ ne mi ta nye e̱? Mi tà nye aduwa nabik'i, ne i bun i nye be riye̱ mi. Mi tà bom abom kukerek Adakunom be kabik'i, ne i bun i bom be riye̱ mi.

aMatiyu 26:30

aYeso be álimazhiri wu tá fa bom abom ne á wuruk á ta se ngarak natoon Kawhanang Nafar.

aRom 15:14

Ároneng, mi be rice mi ren ye yin be rice yin, yin be yin kuse kutek dide̱ng ne i ren yin ike̱ng dide̱ng ma i kyem i naka bo̱so̱p yin'e.

aLuka 2:51

Ayong a tseng na aNazaret mak be ba ne a kuus ike̱ng iya ba tá fe̱. Ango̱ wu saas ike̱re̱'me kaye̱e̱r riye̱ wu cei.

Ike̱ng a ta tonong aYohana 19:10

A tá fa fe̱ anong ne mi kpa kaben nong i tú ku ya iben. Ayong a fe̱ be mi ye, “Sang tu nye anong baꞌ, mi gip mi nye asam afudang wan, wan be ribir áfudang wan, áya a tá yiir rife̱ aYeso. Adakunom ne wan tu ku ya iben tsek, kamok Rife̱ Ritek aYeso tá taas ne ri no̱o̱k kukyem kunye kuzarap.”

Ike̱ng a ta tonong aYohana 14:3

Á se be abom afas nasho̱o̱n itsik rigwo̱m ame be nasho̱o̱n ike̱re̱ inaas ame ne áko̱k kasho̱o̱n. Aner akak kyem a bom abom'e baꞌ, igak awan áner izungu kuso̱k inyak be iso̱k inaas be anaas 144,000 á tu ku shesh ba kaye̱e̱r kazatse ame tsek.

Afisa 5:26

nong a tá sak a tá te zhe̱l be ku ka taas ba rife̱ Adakunom riya ri tá ka kusu ba kyo̱ndi ashi nong a ta forop.

1 aTasalonika 1:8

Yin sak yin rife̱ Agwo̱m Ágwo̱m tá no̱ koake̱ sang kaye̱e̱r iben aMakidoniya ne Akaya tsek baꞌ, amma koake̱ ren kuri kuno̱o̱k katsak yin ta be yin kaye̱e̱r Adakunom sang ma yir ba bun i fe̱ yir ike̱ng ikak natoon'e baꞌ.