Afisa 4:12 - Izere New Testament

¹² A nye anong, nong a tá nye kanye̱k áner Adakunom tu ku nye itomong ne a no̱k kuro̱m aKiristi.

Afisa 4:12 Referans Kwoze

Afisa 4:16

Wu ne a gung ikap kuro̱m'e cei, kuro̱m'e sor nagung kamok koakye ifun be ikap kuro̱m'e rasak ne i no̱k rice wu kaye̱e̱r kushim kamok koakye ikap kuro̱m'e ta nye itomong wu.

1 aKoranti 12:27

Kyo̱o̱rna, yin ne i nye yin kuro̱m aKiristi cice̱r yin, koangan kaye̱e̱r yin nye abas akak.

aRom 15:14

Ároneng, mi be rice mi ren ye yin be rice yin, yin be yin kuse kutek dide̱ng ne i ren yin ike̱ng dide̱ng ma i kyem i naka bo̱so̱p yin'e.

1 aKoranti 14:26

Ároneng, ike̱ng mi tin fe̱ natoon'e se ye, nizen iya yin nyim yin, ke akak se be abom kukerek Adakunom, ne akak sen bo̱so̱p ánerawe'me, ne akak fe̱ ike̱ng iya Adakunom tu ku tonong, ne akak sen fe̱ ni írem iduk, ne akak kirik ike̱ng iya a ta fe̱. A ra nye koakye nong a tin no̱k áfikuus kaye̱e̱r kabik.

aRom 14:19

Kamok anong, won i tu nye yir koakye ike̱ng i tana kyem i nye yir i tana be̱e̱n kusor caang be anong i tana ka tsesek yir.

1 aTimoti 1:12

Mi be riye̱ rikan be aYeso Kiristi Agwo̱m Ágwo̱m yir, aya a tin no̱o̱k agap. A di ye mi be katsak iyong a ti sak nong ta nye itomong wu.

1 aKoranti 14:12

Anong ne i se be yin, kum yin ta min te yin riye̱ ni itse̱r ike̱re̱ Kabik ta nyesek, ni no̱o̱k yin agap ni itse̱r kuno̱o̱k kuya ku tana no̱k áfikuus nabik.

Ibrani 13:17

Kuus yin ike̱ng iya áko̱k kasho̱o̱n yin ta fe̱, ne i nye yin ike̱ng a ta fe̱ be yin, kamok ba ne a ti sak riye̱ natoon yin kamok a ta tak kuto̱ itomong ba katuk kakak. Ka fok yin ba kuto nong itomong ba ta ka be ba ifeng sang kyo̱ndi acer baꞌ. Ke itomong'e ta sor ba acer, iyong ta ka barang mo yin ike̱ng ikak baꞌ.

Ibrani 6:1

Kamok anong, tu bun i beseng yir izen yir natoon ike̱re̱ izhizhe̱k'e natoon aYeso baꞌ, nong ta ya yir kasho̱o̱n, ta te yir ánerawe. Sang tu bun i kubun yir kama ta nye yir kubo̱so̱p itak kushishing kuse natoon ike̱re̱ i tana be̱e̱n riku be itak ku nino̱o̱k katsak na Adakunom baꞌ,

2 aKoranti 6:3

Yir shim yir akak tin turuk kutak natoon yir baꞌ, fan itomong yir bu se̱ narik.

2 aKoranti 5:18

Ike̱re̱ na cice̱r nye kunye Adakunom, iya kamok aYeso, a tin shishing yir i tá tsang i nye yir amudo̱n wu nong yir ta te yir áferime̱ wu, ne a ni no̱o̱k yir itomong kube̱s be ákak nong á ta te áferime̱ wu.

aLuka 22:32

Amma mi ma ka nye aduwa, fan wan bu won kuno̱o̱k katsak wan. Nizen iya wan tu bun nunaan ne i tsesek áfudang wan.”

2 aTimoti 4:5

Amma wan sak riye̱ be ike̱re̱ kuri iyong, naka tsesek kaye̱e̱r risam wan, ya kasho̱o̱n be kunye itomong aner awazi Rife̱ Ritek ne i ni sak riye̱ ni itomong iya a tá ka sak'e ye wan ra nye cice̱r.

aKolosi 4:17

Tak yin Akipus ye a ra sak riye̱ nong a ta gang itomong'ong Agwo̱m Ágwo̱m tú ku no̱o̱k.

aKolosi 1:28

Iyong ne i sak yir ta taas yir itak aKiristi, yir kpam yir koangan ne ibo̱so̱p yir ánerawe'me be koakye kuri kukyem yir nong ta tseng yir be koangan mumak kaye̱e̱r aKiristi.

aKolosi 1:24

Mi be riye̱ rikan kyo̱o̱rna be risam mi ta so̱ natoon yin, nong kamok risam'me mi tà shining ike̱ng iya i tà rusek kaye̱e̱r risam aKiristi tá so̱ kamok kuro̱m wu ku ta nye ikilisiya.

Afisa 1:23

Áfikuus'e nye kuro̱m aKiristi. Kaye̱e̱r áfikuus'e ne aKiristi shining, kyo̱ndi wu be rice wu ta shining koakye kuri ike̱ng kaye̱e̱r koakye kuri iren.

2 aKoranti 12:19

Sang tu to̱ yin kyo̱ndi nizen iyong cei, yir fe̱ yir nong tin te̱ne̱ng yir rice yir nasho̱o̱n yin baꞌ. Adakunom ren, yir fe̱ yir katsak kyo̱ndi áya a ta se kaye̱e̱r aKiristi. Ároneng áfe riye̱ mi, koakye ike̱ng yir ta nye yir, i nye yir nong yin tin se̱ yin agap.

2 aKoranti 7:1

Ároneng afe riye̱ mi, kum yir tan se̱ yir rife̱ Adakunom anong. Kamok anong, won i tu kam yir be ike̱ng i tana sak kuro̱m yir ne kabik yir tana won dar se zhe̱l, won i tu sor yir zhe̱l dar rizik kamok inyim Adakunom.

2 aKoranti 4:1

Kamok anong, kum yir ta nye yir itomong na kaye̱e̱r kuro̱ riye̱ Adakunom, yir min tun yir riye̱ baꞌ.

2 aKoranti 3:8

to̱, kuyiik itomong Kabik ta se ane̱ e̱?

1 aKoranti 14:14

Ke mi nye aduwa ni írem iduk, kabik'i ne ka nye, amma riye̱ mi se̱ ike̱ng ikak baꞌ.

aRom 15:29

Mi ren nizen iya mi tana be̱ nufe yin, mi tà be̱ be agbang ritek Kiristi.

aRom 15:2

Won koangan kaye̱e̱r yir tu kare̱p afegbak wu riye̱ kamok i se gye̱r anong be wu ne i ku barang mo agap kaye̱e̱r kuno̱o̱k katsak.

aRom 12:7

Ke kunang'e nye kunye ánerawe itomong, a ra nye itomong'e gye̱r, ke kunye kubo̱so̱p ánerawe'me, a ra bo̱so̱p gye̱r.

Itomong Ámanzo 20:28

Ni sak yin riye̱ rice yin, ne kukpara kuya Kabik Kazhe̱l'e ta ka sak yin'e nong ta sor yin áko̱k kasho̱o̱n. Ya yin kasho̱o̱n be kufek áfikuus Adakunom áya wu tá shan be naso̱k Igon wu.

Itomong Ámanzo 20:24

Amma gip be anong, mi sok ye kutser'i nye ike̱ng ikak baꞌ. Kum ke mi kyem i gang ike̱ng iya mi tan sak nasho̱o̱n ne i gang itomong iya Agwo̱m Ágwo̱m yir aYeso ta min no̱o̱k (itomong kutaas ánerawe ritek Adakunom) iwe̱r'e yong.

Itomong Ámanzo 11:23

Nizen iya a tá se no̱, a di ritek Adakunom ta se mak be ba ne riye̱ wu kare̱p. Ayong a fe̱ be ba ye á ra yiir iren Agwo̱m Ágwo̱m be katsak be riye̱ rizining.

Itomong Ámanzo 9:31

Be anong áfikuus aya a tá se niben aYahuda ne aGalili be aSamariya tá ra ma fok kusas kusor. Afikuus ti barang kukpa agap, ne Kabik Kazhe̱l'e ka no̱o̱k ba ifeng ma a nye ne á ni barang kute whe̱re̱, nizen iya á sor kaye̱e̱r inyim Agwo̱m Ágwo̱m.

Itomong Ámanzo 1:25

nong a ta te amanzo, aya a tana sok itomong iya aYahuza tá won nong a tá tseng a ko̱n wu.”

Itomong Ámanzo 1:17

aYahuza tsang a nye akak kaye̱e̱r yir, a nye itomong na mak be yir.”

2 aTimoti 4:11

aLuka wu ze̱r tsek ne a se mak be mi. Tse̱r aMarkus nong tà be̱ yin mak be wu, kamok wu tin se̱ mo ni itomong'e.

Afisa 4:29

Sang akpe̱de̱ng rife̱ tu wuruk kaye̱e̱r kanu yin baꞌ, amma fe̱ yin rife̱ ritek riya ri tana no̱o̱k ákak kuya kasho̱o̱n natoon ike̱ng ba ta sen tse̱r'e nong áfe a ta ka foos'e ta se̱ kutobok.

Afisa 4:4

Yir se yir kyo̱ndi kuro̱m kuzining ne Kabik Kazhe̱l'e se kazining. Anong ne yin be yin ku ni te riye̱ kuzining kuya a tá ka yis mo yin.

2 aKoranti 13:9

Yir nye yir riye̱ rikan ke yir se yir gbe̱re̱k, amma ne yin se yin gbugbong. Yir nye yir aduwa ye yin ta shining yin.

1 aKoranti 12:7

Ike̱re̱ iya Kabik Kazhe̱l'e ta no̱o̱k koangan, nye ife i ta naka tosok mo yir.

aRom 12:5

anong ne i se kaye̱e̱r aKiristi, i se yir whe̱re̱ kaye̱e̱r kuro̱m kuzining be afudang yir áfikuus.

2 aKoranti 13:11

Ni igang'e, ároneng, ma yin katuk kakak. Naka tsesek yin nong ta shining, fok yin izong'i, sor yin be riye̱ rizining, sor yin caang. Be anong ne kushim Adakunom ne kameneng riye̱ ta se mak be yin.