aFilipi 1:14 - Izere New Testament

¹⁴ Ku ni te nitso̱m, sak kukap ároneng afikuus ti barang kuse̱ agap nong á ta taas rife̱ Adakunom be riye̱ rizining dar inyim.

aFilipi 1:14 Referans Kwoze

1 aTasalonika 2:2

Amma kyo̱ndi yin tá ren yin ye yir so̱ yir risam ne á ni kas yir na aFilipi gip be anong Adakunom yir ti tsesek yir nong tá ka tak yin Rife̱ Ritek wu, cei be kuri amaan rishishim á tá shishim yir.

aLuka 1:74

a tin shesh yir nubo̱k ámudo̱n yir, nong a tin sak yir tà ku nye yir itomong dar inyim

aKolosi 4:4

Ni nye yin aduwa nong mi ta kyem i taas rife̱ na gye̱r, kyo̱ndi mi tana kyem i nye.

aFilipi 1:7

I se gye̱r mi ta to̱ natoon yin cice̱r anong, kamok yin se yin riye̱ mi, kamok yin cice̱r gung yin rice be mi kaye̱e̱r ritek Adakunom. Mi ta se nitso̱m ka mi ta sen te̱ne̱ng ne i ti nyeseng ye Rife̱ Ritek'e nye katsak.

aKolosi 4:7

aTikikus ta ka tak yin koakye kuri ike̱ng iya i ta sen tseng natoon'i. A nye agbang aroneng, aya a ta nye itomong be katsak ne a nye asam afudang itomong'i kaye̱e̱r itomong Agwo̱m Ágwo̱m yir.

aFilipi 4:1

Kamok anong, ároneng afe riye̱ mi, aya mi ta min te riye̱ ke mi ka di yin ne mi ni be riye̱ rikan ne mi niya kuka, ye i ra nyeseng yin kpa ni ikuus Agwo̱m Ágwo̱m yir aYeso. Yin áya mi ta shim.

Afisa 3:13

Kamok anong, mi ta nye yin akusuk ye, sang tu ku bun yin kama kamok yin ta di yin kuri risam mi ta so̱ kamok yin baꞌ. Katsak'e, risam'me ta ka be̱e̱n yin kuyiik.

2 aKoranti 3:12

Kamok anong, kum yir ta be yir kute riye̱ anong, iyong ne isak yir be yir agap riye̱ dide̱ng.

2 aKoranti 7:4

Riye̱ mi se agak be yin baꞌ, ko cie̱k baꞌ, mi ti ya kuka be yin dide̱ng. Mi se̱ agap riye̱ dide̱ng, be risam yir ta so̱ yir, riye̱ rikan'i be igak baꞌ.

aFilipi 1:20

Mi min te riye̱ ne i mok ye, Adakunom ti te isum baꞌ, amma mi ta se̱ kutsesek dide̱ng, nong ase̱ kyo̱o̱rna be koakye izen, aKiristi ta se̱ kuyiik kaye̱e̱r koakye mi ta nye, be kutser, ka be riku.

2 aTimoti 2:9

Kamok anong ne mi ti so̱ risam na ma a min te nitso̱m gip kyo̱ndi aner aya a tá nye amaan ike̱ng, amma a ta kyem a ta rosom rife̱ Adakunom baꞌ.

aMarkus 3:3

Ayong aYeso fe̱ be aner kubo̱k'e tá we̱ ame ye, “Dorok tá nyeseng nasho̱o̱n ánerawe.”