ZAKHARIA 9:10 - Alkitab Singog In Mongondow Masa In Tanaa

¹⁰ Ki Tuhan in noguman, “Kereta mita in parang nongkon Epraim in ḷumbúon-Kubí, bayongan in kabaḷo kon Yerusalem in yopúon-Kubí bo bayongan in piot in tokorimumudon-Kubí. Datumu in mopotaaubí in dodamean kon sigad in bangusa mita. Nongkon dagat mopobayá in dagat siabí in mongawasa, nongkon Ongkag in Eprat nodapot in popod in dunia.”

ZAKHARIA 9:10 Referans Kwoze

HOSEA 2:18

Kon dodai intua Akuoi in momia kon dodandian takin bayongan in mahaḷuk sinbá mosia in dika monuyayow kon umat-Ku. Akuoi mopogogaibí in bayongan parang bo moposí in pakakat mita in parang nongkon butá in umat-Ku tatua, bo momaḻí kon i monia mobiag motompia bo moaman.

HOSEA 1:7

Táe bangusa in Yohuda in kotabi-Ku. Akuoi ki Tuhan, Allah monia, in moposaḷamatbí kon i monia, táe deemanbí pongin parang, deeman doman pongin kedang andeka piot andeka kabaḷo bo tumotakoinea.”

WAHYU 11:15

Bo malaekat impitunea in nogirup kon torompetnea, dá kinodongogandon in singog mita inta mongoḷangon totok nongkon soroga noguman, “Kawasa momarenta kon dunia naa, masai naa kinadaiandon i Tuhan naton, bo i Datu mopoposaḷamat inta pinodandi-Nea. Sia bidon in momarenta modapot in mononoi!”

MIKHA 5:4

bo Sia in mobogoi in kobiagan modame. Aka tontara in Asyur monubu kon butá naton bo mondangat kon poḷoḷukadan naton, yo itoi mita naton inta moropot totok in potabádon momarang kon i monia. Itoi mita naton tatua in monaḷowdon kon Asyur podoyon kon ropot in pakakat in parang, bo moposaḷamat kon i naton nongkon kawasa monia.

YESAYA 60:12

Bangusa bo dodatuan inta doí mobantung kon inimu, in moyopúbí bo moinggamádon.

YESAYA 49:6

Ki Tuhan in noguman kon inakó, “Oaidan inta moḷobe-ḷoben in mogoḷat mako kon inimu, ei mogogundoi-Ku; iko in diábí tongá mopobui in ki agat in buí i Yakub bo mopoguḻit kon koḷoḷoben in suku mita in Israel, táe baḻíon-Ku doman bayag in bangusa mita, sinbá sinangkub in dunia posaḷamaton.”

KORINTUS 2 5:20

Dá kami naa in totabábí mita i Kristus inta pinaké doman i Allah mopoyaput in koyow-Nea kon i monimu. Tuamai podoyon nami kon tangoi Kristus, kami in mopoigum sinbá moiko in moibogdon motarima kon totabi i Allah inta mobogoi in kasampatan kon i monimu mopopiaan takin-Nea.

KORINTUS 2 5:18

Tua komintan in inaidanbí i Allah. Ki Kristus tua inta pinaké i Allah nobaḻí tonsigad nopoyodame takin-Nea. Onda intua Sia in nopotabá kon inami sinbá intau mita ibanea motaau doman in mamangoi moyodame takin i Allah.

OUMAN IN RASUL MITA 10:36

Pirman inta pinoki poyaput-Nea kon intau mita Israel, tuata in Habar Mopia inta nopotaau in dodamean inta inaidan i Yesus Kristus, Tuhan in bayongan intau.

HAGAI 2:22

dodatuan mita in umpagon-Ku bo kawasa monia in rimumudon-Ku. Kereta mita in parang takin mododianea in tokokaḻintuangon-Ku; bayongan in kabaḷo in matoi bo tumotakoinea in mosiḻimodandon.

YESAYA 11:10

Moiangoibí in wakutunea datu tobatú buí i Daud in tantú tontongan in bangusa mita. Mosia in mamangoibí kon inia, bo pogogutunannea in tango-tangoionbí.

MAZMUR 72:17

Igumon mako ki datu in umuran tano-tano bo modapot in mononoi, bo sia in modugangdon totok tango-tangoion kon tungkuḷ in mata in singgai tantúpa oyúon. Igumon mako bangusa mita in mopoigum in barakat naonda bo sia, bo bayongan in intau moguman kon mosanang totok in sia.

MAZMUR 72:3

Igumon mako butá nami in motomoman bo mobiag motompia, bo inta moadil oyúon kon bayongan in bangusa.

ULANGAN 11:24

Komintan in butá inta yitakan monimu in mobaḻíbí kapunyaanmu. Butámu in mobendarbí nongkon padang gurun kon dotá in toḷatan modapot kon Buḷud in Libanon kon utuan, bo nongkon Ongkag in Eprat kon pomukaan modapot kon Dagat Toyuak kon toyopan.

DATU MITA IMITÁNEA 4:21

Batúan in motoḷuadí oyúonbí in gobá in anggur bo gobá in ara. Kinoouputbí in kinobiagan i Salomo rayat kon bayongan in Yohuda bo Israel nongkon Dan nodapot in Bersyeba nobiag noaman bo notompia. Sin, bayongan in datu kon dotá in toyopan in Eprat notoguondok kon inia, bo bayongan in bangusa nongkon negara mita inta kon diugmai in dodatuan nea noyobayat takinnea. Butá kon dotá in toyopan kon Ongkag in Eprat nongkon Tipsah kon bingkí in Ongkag in Eprat minayá in toyopan ná kotá in Gaza kon Pilistin nodapot kon pinosigadan in Mesir, komintan kinawasa i Salomo. Bangusa mita kon butá tatua notoguondok kon inia bo moguboḻi kon iba. Bahan mita in kaanon inta paraḷuon i Salomo muḷoi in singgai in 5.000 noliter in topong inta moyimok, 10.000 noliter in topong inta nogoros, 10 in sapi kinobang, 20 in sapi kon popokaannea, bo 100 in domba. Koḻikud intua, rusa doman, rusa koḷakian, menjangan bo biag ḷumoḷayug.

MAZMUR 85:8

Poontongdon kon Iko in tantúbí monotabi, o Tuhan, ogoiaidon in kami in kasaḷamatan nongkon ini-Mu.

YESAYA 2:4

Sia in mohakimbí kon sigad in bangusa mita, bo momontow kon pelekara kon sigad in suku mita in bangusa. Pitow in tontaḷon pomiaan pajeko, bo ginubat aidan roratab. Bangusa mita in diábí mositubuan, diábí domandon mosadia moparang.

MIKHA 4:8

Bo iko Yerusalem, tampat pinoḷukadan i Allah kon umat-Nea naonda bo gombala noḷukad kon paanan in dombanea, iko in buibí mobaḻí ki iná in kotá in dodatuanmu ná dungkuḷmai.

MAZMUR 89:26

Dodatuannea in pooḷadon-Kubí, nongkon Dagat Toyuak nodapot kon Ongkag in Eprat.

HOSEA 2:20

Podudui in dandi-Ku, iko in tonibuḷoion-Kubí. Akuonmubí in Akuoi mobaḻí Tuhanmu tontaní.

MIKHA 5:9

Ki Tuhan in noguman, “Kon tungkuḷ intua Akuoi in monginggamádon kon bayongan in kabaḷomu, bo moyompat kon bayongan in kereta mita in parangmu.