ZAKHARIA 5:9 - Alkitab Singog In Mongondow Masa In Tanaa

⁹ Akuoi in iḷumangag monik bo nokoontong kon bobay doyowa iḷumayug mangoi kon inakó. Mosia in kokoḻikipan moroton naonda bo koḻikip in bangow. Karansi koina in ginamá monia bo dinia iḷumayug.

ZAKHARIA 5:9 Referans Kwoze

HOSEA 8:1

Ki Tuhan in noguman, “Posingogdon in tomponuot in anib! Musung in nonubu kon butá-Ku naonda bo boniá nonampí kon kaanonnea! Umat-Ku in iḻimimpat kon dodandian-Ku takin i monia, bo noḷawang kon totundú-Ku mita.

ULANGAN 28:49

Bangusa tobatú inta diá komangaḻean monimu in tosingogon monia popoangoi i Tuhan nongkon toḷosimai sin moḷawang kon i monimu. Ná ḷagapan boniá in mosia monampí kon i monimu.

MATIUS 24:28

Kon onda oyúon mahaḷuk minatoi, kon tua doman in ḷagapan mokokaan kon mahaḷuk minatoi moyosipun.”

IMAMAT 11:13

Kon sigad in ḷagapan mita, inta moiduduimai naa inta diá motaau kaanon sin monajis in: ḷagapan boniá, ḷagapan monikuḷu, bayongan ḷagapan boniá, ḷagapan nasar, kawag, ḷagapan unta, camar, blekok bo ḷagapan mita bangow, undan, ḷagapan kasa bo poniki.

MAZMUR 104:17

Kon tua monompugadon in ḷagapan mita, ḷagapan ranggung nonompugad kon ḷuntungnea totok.

YEREMIA 8:7

Ḷagapanpa bangow in kotaauanneabí in wakutunea mobui; tarangkuku, ḷagapan tansibí bo murai in monotaau doman kon wakutunea momamping kon tampat. Táe moiko, umat-Ku, in diábí nonotaau in hukum mita inta inogoi-Ku kon inimu.

ZAKHARIA 5:10

Akuoi in noḻibó kon malaekat tatua, “Dinia monia pinobayá in onda in karansi tatua?”