ZAKHARIA 4:7 - Alkitab Singog In Mongondow Masa In Tanaa

⁷ Ḷonggai nákabí koḷoben in buḷud yo moigambatbí nongkon tayowonmu. Iko in buibí moposindog in Baḷoi-Ku, bo kon dodai in iko mogukat kon batu dungkuḷ kon tampatnea, intau mita in momaḷúdon, ‘Totuu mopia ah!’ ”

ZAKHARIA 4:7 Referans Kwoze

YEREMIA 51:25

Ei Babel, iko in naonda bo buḷud inta nokorimumud kon sinangkub in dunia. Táe Akuoi, ki Tuhan, in moḷawangbí kon inimu. Iko in uguton-Kubí bo ḻitoion-Ku bo pomayá-Kudon mako mopokak mobaḻí ḷobud.

ZAKHARIA 4:9

Kai-nia, “Ki Zerubabel ain nogukat kon dodatoḷan in Baḷoi-Ku, bo sia in moginḷapatbí kon bayongan in bangunan tatua. Aka tua bo mobaḻí, yo kotaauandon in umat-Ku kon Akuoibí inta ain nopotabá kon inimu Zakharia kon i monia.

MIKHA 4:1

Kon singgai mita moiduduimai tombuḷud, tampat in Baḷoi Tuhan, in moisindogbí motorindog moipagor moḷantud moiḻiu kon buḷud mita bo tombuḷud mita. Bayongan in bangusa diá moobo-obot in mayá intua

MAZMUR 118:22

Batu inta iḷumbú in mogogaid mita kon baḷoi, ain nobaḻí batu tongguḷunea.

MAZMUR 114:4

Buḷud mita in mosimbanan naonda bo bembé, tombuḷud mita in morotayok naonda bo ki adí in domba.

PETRUS 1 2:7

Moḷoben totok mangaḻe in batu tatua kon i monimu inta mopirisaya. Táe aka kon i monia inta diá mopirisaya, mobaḻíbí in onu inta ain pinais kon Buk Motusi nanaa, “Batu inta diá pinaké in intau mita inta mogogaid kon bangunan tua noniata magí yo nobaḻídon batu inta totok in moponting,”

OUMAN IN RASUL MITA 4:11

Ki Yesusbí tua inta imakusud in tontagá kon Buk Motusi nanaa, ‘Batu inta iḷumbú in intau mita mogogaid kon bangunan, naanta nobaḻíbí batu inta totok in baraguna.’

YESAYA 41:15

Indoiaidon, iko in baḻíon-Ku naonda bo dopí poḷoḻintog, inta nobagu, moḷanit bo matanea in doyowa notundug. Iko in moḻintogbí kon buḷud mita bo morimumud kon tua; tombuḷudnea mita baḻíonmu naonda bo baḻeká.

MAZMUR 114:6

Nongonu sin mosimbananbí in moiko ei buḷud mita, bo morotayok in moiko ei tombuḷud mita?

SURAT I PAULUS KON JAMAAT RUM 11:6

Ki Allah in nomiḻí kon i monia sin pinodoyon kon tabi-Nea, deemanbí pinodoyon kon aid monia. Sin aka Sia nomiḻí kon i monia pinodoyon kon aid in intau, dá tabi tatua in deeman bidon totu-totuu tabi.

MIKHA 1:4

Buḷud mita ḷumoḷayat kon paḷad in sioḷ-Nea naonda bo lilin kon bonu in tuḷú inta modokot; butánea in moḻitu moibonu kon oyuknea mita, naonda bo tubig kon tudu in tombuḷud inta moiḻig monag.

YESAYA 28:16

Tuamai, ki Tuhan Inta Totok in moḷantud noguman nanaa, “Akuoi in mogukat kon dodoyonan inta moropot bo motorindog kon Sion; batu orotan tobatú inta moḷoben in mangaḻenea inta pinaisan: ‘Ki ine in morigon in pirisayanea, diábí umundok popisí in taḷowon.’

WAHYU 16:20

Komintan pulau nobuḻi bo komintan buḷud diádon koontongan.

EPESUS 2:20

inta pinosindog kon tudu in pondasi inta inaidan in rasul mita bo nabi, bo ki Kristus Yesus in nobaḻí batu inta totok moponting.

LUKAS 20:17

Bo nobobui in ki Yesus kon i monia bo noḻibó, “Aka natua yo onubí in mangaḻe inta ain pinais kon Buk Motusi nanaa? ‘Batu inta iḷumbúdon in intau mita inta mogogaid kon bangunan nobaḻídon batu inta baraguna totok.’

LUKAS 3:5

Toko bumbunai in ḻembong mita, bo pomuḷoi in buḷud bo inta notombuḷud in tokotondodaidon. Daḷan inta nongobelung tokotuḻidon, bo inta nongotontudu tokotondodaion.

MATIUS 21:42

Ki Yesus in noḻibó kon i monia, “Diápa kon dodai in onda degá in moiko nokobaca kon bonu in Buk Motusi inta pinais nanaa? ‘Batu inta iḷumbú in mogogaid mita kon bangunan ain nobaḻí batu inta baraguna totok. Oaidan mita inta mokoherang kon mata naton tatua; aindon inaidan i Tuhan!’ ”

YEREMIA 33:11

Táe kon tampat mita tatua in kodongoganbí bui in singog ḷunganga bo pia in gina takin dowawá in ponikaan. Kodongoganbí doman in dondong in intau mita inta nodia kon kuruban sukur kon Baḷoi-Ku. Mosia in mogumanbí, ‘Posukurdon kon i Tuhan Inta Totok in mokawasa, sin mopia in Sia bo tabi-Nea in mononoi.’ Butá tanaa in baḻíon-Kubí mobiag motompia ná dungkuḷ. Akuoi, ki Tuhan, ain noguman.”

MARKUS 12:10

Bo tantú kinobacaan bidon monimu in tontagá tanaa kon bonu in Buk Motusi, ‘Batu inta diá pinaké in mogogaid kon bangunan nobaḻídon batu inta totok in moponting.

MATIUS 21:21

Ki Yesus notubag kon i monia, “Poguman-Ku kon i monimu, aka moiko bo totu-totuu mopirisaya bo diá mohawatir, yo moiko in deemanbí tongá motaau mogaid kon ná inta pinomia-Ku kon pangkoi in ara tatua, táe moiko motaaubí doman moguman kon buḷud tanaa, ‘Pobuatdon nongkon tampatmu tanion bo koḷabúdon kon bonu in dagat’; yo mobaḻíbí doman intua.

HABAKUK 3:6

Aka Iko tumogon, moḷundan in butá; aka Iko mobobui, yo modoḻiok in bangusa mita. Buḷud mita inta mononoi in mobota-botak; tombuḷudpa mita inta mononoi in umompábí doman, kon tombuḷud mita tatuata Iko in mayá nongkon dungkuḷpabímai.

EZRA 3:10

Kon dodai in nomangkoidon nogukat kon pondasi in Baḷoi Tuhan, imang mita nogijubah bo kokada-kadai in torompet nogamádon kon tampat monia tontaní. Intau mita in Lewi nongkon inanakan i Asap in sinimindog doman kon tua kokada-kadai in goḷantung mongointok. Mosia in nodayow kon i Tuhan podudui in atorang inta ain sinantú kon tungkuḷ in ki Datu Daud.

MAZMUR 84:11

Mopia-piabí kon tosinggai in kon Baḷoi-Mu dika in toribu nosinggai kon tampat ibanea. Piniḻíku in mobaḻí moḷoḷukad kon ngara in Baḷoi i Allahku dika in mogutun kon baḷoi in intau moraat.

ZAKHARIA 4:8

Bo namangoi doman in koyow ibanea nongkon i Tuhan.