ZAKHARIA 14:5 - Alkitab Singog In Mongondow Masa In Tanaa

⁵ Moiko in moḷaguibí mongin ḷopá inta nomotak kon tombuḷud tatua nobaḻí doyowa. Moiko in moḷaguibí ná mogoguyangmu kon tungkuḷ in ḻinug kon dodai in ki Uzia datu in Yohuda. Bo namangoidon in ki Tuhan Allahku, sinakinan in bayongan in malaekat.

ZAKHARIA 14:5 Referans Kwoze

AMOS 1:1

Ki Amos in gombala tobatú in domba nongkon kotá in Tekoa. Sia in nobaḻí nabi kon tungkuḷ in butá in Yohuda pinarentaan i Datu Uzia, bo Israel in pinarentaan in Datu Yerobeam, ki adí ḷoḷaki i Yoas. Doyowa notaong kon tungkuḷ in diápa nobaḻí in ḻinug, ki Allah in noponiata kon i Amos in inta mobaḻí mita kon Israel.

MATIUS 25:31

“Aka ki Adí Intau mamangoi saḷaku Datu bo sinakinan in malaekat mita, yo Sia in ḻimitú kon tampat pomarentaan-Nea.

MATIUS 16:27

Diádon moonggot bo ki Adí Intau takin malaekat-Nea mita in mamangoi takin kawasa i Amá-Nea. Kon dodai intuata Sia motuḻidon kon pomuḷoi in intau podudui in oaidnea.

TESALONIKA 1 3:13

Aka natua yo irigonan i Tuhan in gina monimu, sahingga in modaritdon totok in kobobiag monimu bo diá bidon in inta diá mopia in aidan monimu kon tayowon i Allah, ki Amá naton, kon wakutu in ki Tuhan naton ki Yesus mamangoi bui moyotakin in bayongan intau inta ain nobaḻí umat-Nea.

YESAYA 29:6

Ki Tuhan Inta Totok in mokawasa mopoḷuatbí in kotá tatua pongin deḷang bo ḻinug inta motoyang totok. Sia in mopoangoibí in deḷang bo tuḷú inta tumagab.

WAHYU 20:4

Bo akuoi in nokoontong kon ḷoḻitúan mita pomomarentaan tatua inogoian in kawasa monantú kon hukuman. Inontongku doman in dimukud in intau mita inta sinokoratá popisí in nopotaau in habar soaḷ ki Yesus, bo lantaran nopoyaput in koyow i Allah. Mosia tua in diábí nosumba kon mahaḷuk tatua andeka patongnea bo doí doman sinandaan kon pogot bo kon ḻima monia; dá mosia in nobiag bui bo nomarenta saḷaku datu moyotakin i Kristus toribu notaong in koonggotnea.

WAHYU 11:13

Dá dodai intua nobaḻídon in ḻinug inta totok in moropot. Bo sepersepulú nongkon kotá tatua norimumud. Pitu noribu intau minatoi wakutu in ḻinug tatua. Intau mita ibanea in totokdon in noondok, dá nodayowdon in mosia kon koḷoḷoben in kawasa i Allah inta kon soroga.

TESALONIKA 2 2:8

bain tua bo koontongandon in intau moraat tatua. Sahingga in aka ki Tuhan Yesus mamangoi yo ḻimodon-Nea in intau moraat tatua takin tompot inta pogirup-Nea, bo yoyangon-Nea wakutu in Sia mamangoi takin kamuliaan-Nea.

MAZMUR 96:13

Sin ki Tuhan in mamangoi momarenta kon butá, Sia in mohakimbí kon bangusa mita takin moadil bo mojujur.

ULANGAN 33:2

“Ki Tuhan namangoi nongkon Buḷud in Sinai; Sia nomuká kon tudu in Edom naonda bo mata in singgai bo nongkon Buḷud in Paran sia nonimbayag kon umat-Nea. Sia sinakinan in mopuḷú noribu in malaekat; tuḷú nodokot kon dotá in koḷanan-Nea.

WAHYU 20:11

Nopaḷut mako kon tua, akuoi in nokoontong kon tobatú tampat pomomarentaan inta nobudó bo inta noḷoben bo Sia in iḻimitú kon tua. Ḷangit bo butá noinggamá nongkon tayowon-Nea, sahingga in diádon bui koontongan.

YAKOBUS 5:8

Moiko in musti mosabar doman bo moḷoben in gina, sin singgai koangoian i Tuhan in nodiugdon.

LUKAS 21:27

Kon dodai in tuata mamangoi in ki Adí Intau kon yua-yuak in goḷom takin kawasa bo kamuliaan inta totok in moḷoben.

MATIUS 24:3

Wakutu in ki Yesus iḻimitú kon tudu in Buḷud Zaitun, murí-Nea mita namangoidon kon i-Nia bo nongonguman-Neamai. Kai monia. “Pogumandon kon inami, mongó toonu in tua komintan mobaḻí bo onu in tanda kon koangoian-Mu bo tanda in kopaḷutan dunia naa?”

MAZMUR 98:9

Sin Sia in mamangoi sin mohakim kon dunia; bangusa mita in hakimon-Neabí podoyon kon inta moadil bo mobanar.

PINOGIAPAN 16:34

Bayongan intau in Israel inta kon tua nokodongog kon karak monia. Bo intau mita in Israel noḷagui, sindaḷan nomaḷú, “Poḷagui! Ḻiomon in butá in kita!”

YOËL 3:11

Igai, ḷagidon angoi, ei bangusa mita nongkon bayongan in tampat! Poyosipundon kon ḷopá tatua.” O, Tuhan, potabádon in tontara-Mu monubu kon i monia!

ZAKHARIA 4:7

Ḷonggai nákabí koḷoben in buḷud yo moigambatbí nongkon tayowonmu. Iko in buibí moposindog in Baḷoi-Ku, bo kon dodai in iko mogukat kon batu dungkuḷ kon tampatnea, intau mita in momaḷúdon, ‘Totuu mopia ah!’ ”

MIKHA 1:11

Moiko intau i Sapir, pobuatdon bayá in poḷumbúan takin diá mogiḷambung bo takin oyá! Intau mita in Zaanan in diá mokobaḻí in ḷumuai nongkon kotá monia. Karak in intau in Bet-Haezel in mopoontong kon inimu kon tua in diádon in oḻiungan bui.