YUNUS 2:6 - Alkitab Singog In Mongondow Masa In Tanaa

^6-7 Akuoi in iḷumanduk noidapot kon apad in tombuḷud, kon dunia inta bonawangnea kinunsían modapot in singgai tumi. Dimukudku in moḷopídon totok kon bonu in awakku, bo kinotoropankudon bo nokuani kon ini-Mu. Dá noiyaputdon in sambayangku kon ini-Mu, kon bonu in Baḷoi-Mu inta mokudus. Bo pinopoponik-Mudon in akuoi nongkon bonu in dagat, o Tuhan Allahku!

YUNUS 2:6 Referans Kwoze

MAZMUR 30:3

Tuhan Allahku, akuoi in mokuani kon ini-Mu mokituḷung, bo Iko in nongundam kon inakó.

MAZMUR 16:10

Sin diábí pinomayá-Mu mako matoi in akuoi; intau inta kinotabi-Mu diábí pinomayá-Mu mako in moyopú.

YESAYA 38:17

Robonoḷ in ginaku in mobaḷuibí mobaḻí ḷunganga in gina, Iko in moposaḷamat kon inakó nongkon anib; dosaku mita inampungan-Mudon komintan.

HABAKUK 3:10

Nokoontongmai kon ini-Mu, buḷud mita in nodandú nongkon ḷangit noḷabú in uyan naonda bo pinopobutak. Tubig kon ḻimonag in butá moboḷontung in singognea, bokoḷnea in molitodanmai bo monomburá.

HABAKUK 3:6

Aka Iko tumogon, moḷundan in butá; aka Iko mobobui, yo modoḻiok in bangusa mita. Buḷud mita inta mononoi in mobota-botak; tombuḷudpa mita inta mononoi in umompábí doman, kon tombuḷud mita tatuata Iko in mayá nongkon dungkuḷpabímai.

YESAYA 40:12

Ki ine in mogukur kon baḷangon takin mopomaké in ḷogú in ḻimanea, andeka mogukur kon ḷokutoi momaké in yangow? Ki ine in mogukur kon butá in dunia naa takin simbangan andeka monimbang kon buḷud bo tombuḷudnea mopomaké in simbangan bambéon?

MAZMUR 143:7

Ḷagidon kaasí tubagai in akuoi, o Tuhan, sin diádon in kamangku. Dika mogadop kon inakó, sinbá akuoi in diá ná intau inta ain noponag kon dunia in intau minatoi.

MAZMUR 104:8

Tubig in noiḻig nongin buḷud mita noituot kon ḷopá, kon tampat inta sinadia-Mu kon inia.

MAZMUR 104:6

Kinoḷubungan-Mu in baḷangon intua, tubignea in nonagom kon tudu mita in buḷud.

MAZMUR 65:6

Iko in notubag kon inami pinongin nopountung kon inami, inaidan-Mu in soaḷ mita inta mokoherang sin moposaḷamat kon inami! Ikobí in pinongamangan in bayongan in bangusa nodapot in dagat inta moyayú.

MAZMUR 55:23

Posarakaidon in inta mokoḻia-ḻiaw kon ginamu kon i Tuhan, dá Sia in moduḷu kon inimu; sin intau mojujur in diábí pomayá-Nea mako in taḷowon.

MAZMUR 30:9

Kon ini-Mu, o Tuhan, pokuanianku, kon i Tuhan in poigumanku,

AYUB 33:28

Inimaḷowan i Allah in akuoi in mayá kon dunia in intau minatoi, dá nobiagpa in akuoi in tanaa.

AYUB 33:24

Takin tabi in malaekat tatua in moguman, ‘Buḻiaidon in sia, diábí motaau in sia moponag kon dunia in intau minatoi. Naa in doit potobut, sinbá moiḷuatdon bui in sia.’

ULANGAN 32:22

Torú-Ku in moborambangdon naonda bo tuḷú inta momokak modapot kon dunia in intau minatoi. Tuḷú tatua in momokak kon bayongan in butá takin tombonunea, bo buḷud mita modapot in kon uakatnea mita.

MATIUS 16:18

Bo Akuoi in moguman doman kon inimu, iko in ki Petrus, kon tudu in batu karang tanaa posindogon-Ku in jamaat-Ku; bo diábí in mokotaḷow umpakabí popatoi!

MAZMUR 18:5

Akuoi in iḻibudon in bodito mokopatoi, bo sinaḷomdon in ḷunud poyopú.

MAZMUR 116:3

Akuoi in inindoyó in anib in popatoi; popatoi inta mokoondok ain nodomok kon inakó, dá akuoi in inangoian in ḻia-ḻiaw in gina bo moondok.

YESAYA 38:10

“Gumanku, bagu notombotak in umur akuoi in mustidon mayá, monimpod kon ki agat in kobiaganku kon dunia in intau minatoi.

YEHEZKIEL 26:20

Bo iko in pokidia-Kudon kon dunia in intau minatoi sin moyodugang in intau mita inta dungkuḷmai. Pomayá-Ku mako in iko in mogutun kon dunia in intau minatoi tua, kon yua-yuak in apug mononoi, moyotakin in intau minatoi. Dá butámu in diádon utunan bui, bo iko in diá bidon kotangoian kon sigad in intau nobiag.

YEHEZKIEL 31:14

Tua mita in nobaḻí sinbá pinangkoi kon tanaa, diá bidon in pangkoi in kayu in mobiag ná tatua in koḷantudnea; diá bidon in ḷuntung in kayu inta moitunduḷ in goḷom umpakabí mokouḻí kon tubig inta mobarong. Komintanbí musti matoi ná intau inta ilo-ilow, bo noyosipun in intau mita inta ain noponag kon dunia in intau minatoi.”

MAZMUR 69:2

Posaḷamatpa in akuoi, o Allah, sin tubig in noidapotdon in sigogowku.