YUDAS 1:20 - Alkitab Singog In Mongondow Masa In Tanaa

²⁰ Táe moiko, utatku mita, tompiabí saḷaḷu in kobobiagmu podudui in pirisayamu kon i Yesus Kristus. Pirisaya inta totok in modarit. Bo posambayangdon takin kawasa in Roho i Allah,

YUDAS 1:20 Referans Kwoze

EPESUS 6:18

Aidai intua komintan takin mosambayang mopoigum kon totuḷung i Allah. Posambayangdon pomuḷoi mako podudui ibog in Roho i Allah kon i monimu. Umuran pobasadia in moiko bo dika umundok. Tantú sambayangai in bayongan umat i Allah.

KORINTUS 1 14:15

Dá onubí in musti aidanku? Tanaa in aidanku: Aka rohoku mosambayang yo akuoi in dumudui doman mosambayang kon bonu in raianku. Akuoi in modondong takin rohoku táe akuoi in moibog doman modondong takin raianku.

KOLOSE 2:7

bo monguakat kon bonu i Kristus Yesus. Moiko in musti moposindogdon in kobiaganmu bo ki Kristus in dodoyonanmu. Mustidon modugang in pirisaya monimu kon i Kristus, podudui in onu inta ain sinundú kon i monimu. Bo ginamu in umurandon moibo-ibog mopoyaput in sukur moantó.

TESALONIKA 1 5:11

Tuamai umuranbí positongginaan bo mosirigonan kon gina ná inta biasamai aidan monimu.

KORINTUS 1 14:26

Dá uḻe utat mita, onu in mangaḻe intua komintan? Aka moiko moyosipun sin mosumba kon i Tuhan, oyúon in modondong, oyúon in motundú, oyúon mopoyaput in habar nongkon i Allah, oyúon in mosingog kon bonu in bahasa inta mokoherang bo oyúon doman in moginsilang kon onu inta pinoguman in intau tatua. Táe tua komintan in mustibí aidan sin motundú kon ponompia kon i monia komintan.

SURAT I PAULUS KON JAMAAT RUM 8:15

Sin Roho, inta inogoi i Allah kon i monimu, diábí mopobaḻí kon i monimu ata, sahingga moiko in mobiagdon kon bonu in porasaan moondok. Táe Roho i Allah in mopobaḻíbí kon i monimu ki adí mita i Allah. Bo takin kawasa in Roho tatua kita komintan in monangoi kon i Allah, “Amá, o Amáku!”

GALATIA 4:6

Moiko nion in ki adí mita i Allah, dá pinotabá-Neadon in Roho i Adí-Nea mamangoi kon i naton inta tantú mokuani; Amá, o Amáku.

EPESUS 4:29

Aka mosingog in moiko yo dika mosingog kon inta moraat, singogdon in onu inta mokobaraguna moginropot kon pirisaya bo singog mita tonggina inta motaau potuḷung kon intau ibanea. Sin singog mita inta baraguna in mokopoangoi kon kopiaan kon i monia inta mokodongog.

OUMAN IN RASUL MITA 9:31

Dá bayongan in jamaat kon Yudea, Galilea bo Samaria komintan nopia in gina. Takin totuḷung in Roho i Allah, bo takin doman toguondok kon i Tuhan, bayongan in jamaat koropot-koropotdon bo kodugang-kodugang domandon in kobayongnea.

EPESUS 4:16

Kon bonu in pimpinan-Nea bayongan in anggota in awak tatua nopipid notompia noyotondoḷ in ugat bo buk mita in tuḷan. Bo aka kon batúan in anggota mita tatua in mogaid podudui in oaidannea dá bayongan awak in mobiagbí moguyang bo moropot bo kototabi.

EPESUS 4:12

Mosia naa in inogoi i Allah sinbá umat i Allah tokotompiaan sinbá mosia in motaau mogaid kon oaidan i Tuhan bo moduḷu moposindog in awak i Kristus.

OUMAN IN RASUL MITA 26:18

mobuká kon mata monia, sinbá mobuká in mata monia bo mokoontong kon inta mobayag; bo diádon kopongaruan in Ibilis táe tongádon tantú kon bonu in kawasa i Allah. Sin aka mopirisaya kon i-Nakó, yo dosa mita monia in tokoampunganbí bo mobaḻíbí umat mita inta piniḻí i Allah in mosia.’ ”

ZAKHARIA 12:10

Onda intua buí i Daud takin intau mita inta nogutun kon Yerusalem ogoian-Kudon in gina inta kototabi bo moibog mosambayang. Mosia in imindoibí kon inia inta ain sinumbuk monia bo ombaḷan monia naonda bo intau mongombaḷ kon kinopatoian i adínea tuḷong. Mosia in mongombaḷbí imibo-ibog, naonda bo intau inta ain kinobuḻian i adínea guya-guyang.

YOHANES 1 5:4

sin bayongan intau inta nobaḻídon ki adí i Allah mokosanggupbí mita in monaḷow kon dunia inta moraat naa. Bo tongábí pirisaya naton kon i Tuhan tua in monaḷow kon in dunia naa.

YAKOBUS 2:22

Nosilangdon kon naa kon pirisaya in musti poniata kon oaid sinbá mosompurna.

TITUS 1:1

Titus adíku! Akuoi, ki Paulus in nomais kon surat tanaa saḷaku mogogaid kon oaidan i Allah bo rasul i Yesus Kristus. Akuoi in piniḻí bo pinotabá sinbá motuḷung kon intau mita inta ain piniḻí i Allah sinbá umuran morigon in pirisaya monia kon i Tuhan Yesus. Bo mustibí umuranku tundúon in mosia sinbá totokdon in monotaau kon onu inta moitutui podudui in agama naton.

KORINTUS 1 10:23

Kain intau, “Kita in motaaubí mogaid kon onukadon in kino ibog naton.” Totuubí doman! Táe onu in aidan naton tua, diábí komintan baraguna. “Kita in motaaubí in mogaid kon onukadon in kinoibog naton” – táe onu in kinoibog naton tua, diábí komintan mokobiag kon i naton.

SURAT I PAULUS KON JAMAAT RUM 15:2

Mustibí in kita moposanang doman in gina i utat naton, sin kopiaan doman monia, bá koyakinan monia in modugang doman moropot.

OUMAN IN RASUL MITA 15:9

Ki Allah tua in diábí mopoyo-poyoposi kon intau. Dinaritan-Nea in gina monia sin mopirisaya in mosia.

TIMOTIUS 2 1:5

Umuran kotoropanku in kopopirisayamu kon i Kristus inta totu-totuu tua naonda bo kopopirisaya i baaymu ki Lois bo ki inámu ki Eunike. Bo moyakinbí totok in akuoi kon kopopirisayamu nion ná bí doman onda bo kopopirisaya monia tua.

TIMOTIUS 1 1:4

Poguman kon i monia kon donaaibí tongá umuran monarukiramai kon ouman mita inta diá totuu bo soaḷ ouman kinobaḻian inta diá in gogainea. Tua komintan in tongábí mokopomuká kon ropatoi inta diá in baragunanea bo deemanbí inta mokobiag motompia podudui in kasaḷamatan inta inogoi i Allah kon intau inta mopirisaya kon i-Nia.

KORINTUS 1 1:8

Bo ki Kristusbí doman tua inta tantú moginrigon kon gina monimu modapot kon singgai pangabisan; sahingga aka mamangoidon bui in Sia yo diá kouḻían-Nea in moiko kon taḷá tobatúmai.

WAHYU 13:10

“Intau inta sinantúdon domokon, mustibí in sia domokon. Bo intau inta ain sinantú matoi sibaton, yo pasti matoibí doman sibaton. Manangka intua umat i Allah musti monahang bo mosatia.”

YUDAS 1:3

Utat mita inta kinotabiku! Totuu kon oyúonbí in makusudku in nomais kon surat tanaa kon i monimu, tuata in soaḷ kasaḷamatan inta ain tumpaḷa kinorasaan naton. Kon soaḷ tanaa totokdon kon ginaku in momais kon surat kon i monimu bo mononggina sinbá moiko in umuran mokoporoton in kumadai kon onu inta ain pinirisaya monimu inta ain pinoyaput kon intau mita inta ain inoiní i Allah.

PETRUS 2 1:1

Utat mita inta totu-totuudon nopirisaya ná doman kami naa! Ki Yesus Kristus, inta Allah bo Datu Mopoposaḷamat naton in nobogoidon in kasampatan kon i naton mopirisaya kon i-Nia, sin Sia ain nogaid kon onu inta mobanar. Surat tanaa in nongkon i Simon Petrus, tobatú mogogundoi bo rasul i Yesus Kristus.

OUMAN IN RASUL MITA 6:7

Natuata inta nobaḻí sahingga pirman i Allah in totokdon noisiar magí mako bo intau mita inta nopirisaya kon i Yesus kon Yerusalem in nodugangdon totok in kobayongnea. Bo noantó domandon in imang in nopirisaya kon i Yesus.