YOSUA 8:10 - Alkitab Singog In Mongondow Masa In Tanaa

¹⁰ Subupa totok ki Yosua nobangon bo nomarenta kon tontaranea mita sinbá moyosipun. Onda intua sia bo itoi mita in umat in Israel nodia kon tontara tatua minayá in Ai.

YOSUA 8:10 Referans Kwoze

MAZMUR 119:60

Akuoi in ḻimikatbí bo diábí mogoḷat sin mopobayá in parenta-Mu.

YOSUA 7:16

Nopoikoḷomai kon singgai, subupa totok, ki Yosua nopotabádon kon umat in Israel namangoi in muna, tumongo suku, dá sukudon i Yohuda in kinotugatan.

YOSUA 6:12

Nopoikoḷomai kon singgai, subupa totok, ki Yosua nobangon bo kon induaneadon in imang mita takin tontaranea mita nopipid noḻibu kon kotá tatua kon bonu in pipidan ná singgai dungkuḷ: Kon dungkuḷ totok in pipidan pongawal kon muna, dinuduian in imang pitu inta mogogirup kon torompet, bo dinuduian in imang mita inta nomotaan kon Poti Dodandian, bo sinimpodan in pipidan pongawal kon tumi. Bo torompet umuran inirup.

YOSUA 3:1

Nopoikoḷomai kon singgai, ki Yosua bo bayongan umat in Israel nobangon subupa totok, bo nonaḷámai kon pinononḷoḷaigan monia kon Sitim, bo minayá in Ongkag in Yordan. Kon tua in mosia nononḷoḷaigan sin mogoḷat kon wakutu monia ḷumoḷan.

KINOBAḺIAN 22:3

Nobangon monik doḷo-doḷompa, ki Abraham noniai kon kayu sin pakéon potubaan kon kuruban, kayu tatua sinogotnea mako bo pinopobaba kon keledainea. Sia in minayá takin i Ishak bo bobantungnea doyowa, mosia nopobayá in tampat inta pinoguman i Tuhan kon inia.

YOSUA 8:9

Onda intua ki Yosua nopotabádon kon i monia, bo mosia minayá nogadop kon dotá in toyopan kotá in Ai kon sigad in Ai bo Betel, bo nogoḷat kon tua. Táe ki Yosua in nosiugpa kon pinononḷoḷaigan in umat Israel.

YOSUA 8:11

Tontara mita tatua in noyotakin i Yosua minayá nopobayá ná ḷoḻingkop moḷoben in kotá in Ai, bo nononḷoḷaigan kon dotá in utuan, kon ḷopá tobatú inta kon sigad monia bo kotá tatua.