YOHANES 1 5:20 - Alkitab Singog In Mongondow Masa In Tanaa

²⁰ Kinotaauan bidon naton kon ki Adí i Allah ain namangoi bo ain nobogoi in pongortian kon i naton, sinbá kotaauan naton in ki Allah inta mobanar. Kita in nobiag notobatú takin i Allah inta mobanar bo umuran nobiag notobatú takin i Adí-Nea ki Yesus Kristus. Naadon in ki Allah inta mobanar, bo naadon in kobiagan inta mopia bo mononoi.

YOHANES 1 5:20 Referans Kwoze

YOHANES 17:3

Nanaa in kobiagan mononoi tua; ibogon tua bayongan intau in monotaau kon i Amá inta tongábí Sia tua in ki Allah inta mobanar, bo monotaau doman kon i Yesus Kristus inta pinotabá i Amá.

LUKAS 24:45

Onda intua ki Yesus nomukat kon raian monia sinbá komangaḻean monia in bayongan inta ain pinais kon Buk Motusi.

YOHANES 14:9

Táe ki Yesus in noguman kon inia, “Noonggotdon in Akuoi noyotakinmai monimu, bo diápa doman kinotaauan-Mu in Akuoi Pilipus? Intau inta ain nokoontong kon i-Nakó, yo sia tua in nokoontong domandon kon i Amá. Yo nongonu sin iko in mogumanpabí, ‘Poontongdon in ki Amá kon inami’?

TIMOTIUS 1 3:16

Diábí tobatúmai in motaau momayow, kon moḷobenbí totok in onu inta noibunipa kon agama naton naa: Sia namangoi in dunia naa sinumon rupa intau, bo inakubí in Roho i Allah, bo inontong in malaekat mita. Habarnea pinowayadon kon sigad in bayongan bangusa, bo Sia in pinirisaya in bayongan intau kon dunia naa poḷat sinintak namonik in soroga.

YESAYA 44:6

Naa in guman i Tuhan Inta Totok in Mokawasa, Datu bo moḷoḷukad in Israel, “Akuoi in Allah inta tongá totobatú, Inta muna-munamai bo inta imbuitnea totok.

YOHANES 1 5:1

Intau inta mopirisaya kon ki Yesus tua in Datu Mopoposaḷamat inta namangoi nongkon i Allah, yo intau tatua ki adí i Allah. Intau inta motabi kon i-Nia inta nopoangoi tua in motabibí doman kon i-Nia inta namangoi nongkon i Allah.

YOHANES 20:28

Ki Tomas in noguman kon i Yesus, “Tuhanku bo Allahku!”

WAHYU 3:7

“Paisdon kon malaekat in jamaat kon Piladelpia nanaa: Naadon in koyow nongkon i-Nia inta Mokudus, Inta Mobanar bo ki Inta nokadai kon kokunsi i Daud; Aka Sia in mobuká yo diábí tobatúmai in mokoḻingkop; bo aka ḻingkopan-Nea, yo diábí doman tobatúmai in mokobuká.

YOHANES 1 4:16

Kita tontaní ain nonotaau bo nopirisaya kon tabi i Allah kon i naton. Ki Allah tua in tabibí. Intau inta umuran kototabi kon tumpaḷa intau, in notobatúdon takin i Allah in Sia, bo ki Allah in notobatúdon takin intau tatua.

SURAT I PAULUS KON JAMAAT RUM 9:5

Mosia in buíbí doman in mogoguyang naton. Awak i Kristus naa in nongkon bangusabí monia tua. Táe Siabí in moḷantu-ḷantud nongkon bayongan in yagi-yagi. Dinayo-dayowdon in ki Allah modapot in kopaḷutannea! Amin.

YOHANES 10:30

Akuoi bo ki Amá in tobatúbí.”

YESAYA 9:6

Sia in momarenta saḷaku datu buí i Daud, kawasaannea totok in moḷoben. Butánea in umuran modame bo mobiag mooyúon; pomarentaannea in pinodoyon kon hukum bo koadilan tanaa mako modapot in mononoi. Ki Tuhan Inta Totok in Mokawasa notantúbí kon mogaid kon tua.

YOHANES 1 4:2

Nanaa in tandanea kon i naton monotaau mongo tua in Roho i Allah andeka deeman: Intau inta mongaku kon ki Yesus Kristus in namangoidon in dunia saḷaku intau, yo intau tatua kinawasa in Roho i Allah.

YOHANES 1 2:6

Ki ine i moguman kon sia in nobiag notobatú takin i Allah, yo sia musti mobiag takin dumudui kon kobobiag i Kristus.

IBRANI 1:8

Táe ki Allah in noguman kon i Adí-Nea nanaa: “Ḷoḻitúan pomomarentaan-Mu, umuranbí mononoi! Moadil totok in pomomarenta-Mu.

TITUS 2:13

Tanaa mako, kita in mogoḷatpa mako kon singgai inta iharap mako naton tua. Kon singgai tatua, dunia naa in mokoontongdon kon kamuliaan i Yesus Kristus, Sia tuata in ki Allah Inta Totok in Momulia bo Datu Mopoposaḷamat naton.

OUMAN IN RASUL MITA 20:28

Manangka intua yo mokopopiadon in moiko bo umuran moḷukad kon awak monimu bo poḷat doman ḷukadai in bayongan umat i Allah inta ain pinosarakan i Allah kon i monimu sinbá ḷukadan. Sin moiko nion ain sinantú in Roho i Allah mobaḻí moḷoḷukad bo mononompia kon umat i Allah inta ain sinobut-Nea in dugú i Adí-Nea tontaní.

YOHANES 17:14

Pinotaau-Kudon kon i monia in Pirman i Amá bo mosia in sinaturu in dunia, sin deemanbí kapunyaan in dunia naa in mosia, ná doman Akuoi inta deemanbí kapunyaan in dunia.

WAHYU 19:11

Noiduduimai kon tua inontongku in soroga nobukat, bo inontongku oyúon in tobatú kabaḷo nobudó. Ki inta sinumakoi kon kabaḷo tatua, tangoinea ki Mosatia bo ki Mobanar. Sia in moadilbí in monantú kon hukuman bo kon parang.

WAHYU 15:3

Bo mosia in nopodondong in dondong i Musa, mogogundoi i Allah, bo dondong i Adí in Domba. Nanaa in dondong tatua, “Tuhan, Allah Inta Totok in Mokawasa, totuu moḷoben bo mokoherang in bayongan inta inaidan-Mu! Datu in bayongan bangusa, totuu moadil bo mobanar in bayongan oaid-Mu!

WAHYU 6:10

Mosia in nomaḷú noropot in noguman, “O Tuhan inta totok in Mokawasa, inta mokudus bo inta mobanar! Naondapa degá in koonggotnea bo adilon-Mu in intau mita kon dunia naa, bo hukumon-Mu in mosia inta noḻimod kon inami?”

WAHYU 3:14

“Paisdon kon malaekat in jamaat Laodikia nanaa: Naadon in koyow nongkon i-Nia inta sinumangoi Amin, sakusi inta mosatia bo mobanar, pangkoi in bayongan yagi-yagi inta pinomia i Allah.

YOHANES 1 4:14

Kami tontaní ain nokoontong kon i Adí i Allah, bo kami in nopohabar kon Sia in pinotabá mangoi i Amá sin mobaḻí Datu Mopoposaḷamat in dunia naa.

PILIPI 3:9

bo akuoi in totu-totuudon notobatú takin-Nea. Hubungan mopia takin i Allah in diábí nouḻíku sin popisí in dinumudui kon hukum in agama, táe tua in nouḻíkubí sin akuoi in nopirisayadon kon i Kristus. Dá tuamai hubungan mopia tua in namangoibí nongkon i Allah sin pinodoyon kon pirisaya kon i Kristus Yesus.

KORINTUS 2 4:6

Sin ki Allah in nogumandon nanaa, “Nongkon sindip momukádon in bayag.” Bo ki Allah doman tatua inta nopomuká in bayag-Nea kon bonu in gina naton, sinbá mobayag domandon in raian naton bo monotaau kon kototarang in bayag i Allah inta nonindar kon pogot i Kristus.

YOHANES 15:4

Umuranbí potobatú-Ku bo Akuoi umuranbí doman motobatú takin i monimu. Tanga in diábí momungai tontaní aka diá in sia moidapoḷpa mako kon pangkoinea. Natua doman in moiko, momungai aka umuran motobatú takin-Ku.

YOHANES 14:23

Ki Yesus in notubag: “Intau inta motabi kon i-Nakó, dumuduibí kon totundú-Ku. Bo ki Amá-Ku in motabibí kon inia. Ki Amá bo Akuoi in mamangoibí kon inia bo mogutun moyotakinnea.

YOHANES 14:20

Aka wakutuneadon, dá kotaauan bidon monimu kon Akuoi in notobatúbí takin i Amá, moiko in notobatú takin-Ku, bo Akuoi in notobatú takin i monimu.

YOHANES 14:6

Ki Yesus in notubag, “Akuoibí naa in daḷan kon monotaau kon i Allah bo mokouḻí kon kobiagan. Diábí in tobatúmai intau in mokoyaput kon i Amá, aka diá mongin i-Nakó.

YOHANES 1:18

Diábí in nokoimontanmai in nokoontong kon i Allah, koḻikudbí in ki Adí tuḷong i Amá, inta notongkai i Amá bo modagin totok kon i-Nia. Kon i-Nia tuata moniata kon i naton in ki Amá.

LUKAS 21:15

Bá kotaauan monimu kon Akuoibí in moguman kon onu inta musti potubag monimu, sahingga saturu mita monimu tua, diá mokoḷawang ande mokobayow kon onu in singogon monimu.

MATIUS 13:11

Ki Yesus notubag, “Moiko aindon inogoian in totabi monotaau kon rahasia kon naonda in ki Allah momarenta, táe mosia tua in diábí.

YEREMIA 10:10

Táe Iko, Tuhan, Allah inta mobanar, Ki Allah in mobobogoi in kobiagan, datu mononoi. Aka Iko tumorú, modandú in dunia, aka Iko rumogi yo bangusa mita in diábí mokotongod. (

YESAYA 54:5

Inta nomaḻí kon inimu in naonda bo ki buḷoimu ḷoḷaki, ki Allah mokudus in Israel in mopoposaḷamatmu. Ki Tuhan Inta Totok in mokawasa, tuata in tangoi-Nea, Sia in Allah inta nongawasa kon sinangkub in dunia.

YOHANES 1 2:24

Sin tuamai, habar inta ain dinongog monimu, wakutu in moiko bagupa nopirisaya, mustibí tagúon monimu kon bonu in gina. Sin aka habar inta ain dinongog monimu tua umuran kon gina-gina mako monimu, yo moiko in umuranbí mobiag motobatú takin i Adí bo i Amá.

EPESUS 3:18

Akuoi in umuran mosambayang, sinbá moiko takin bayongan in umat i Allah in monotaaudon kon kobobarakat, koḷoḷanggó, koḷoḷantud bo kododaḷom in tabi i Kristus,

KORINTUS 2 5:17

Intau inta notobatúdon i Kristus in totu-totuu bidon sinoimbagu. Inta ain nokoyongan in diá bidon, komintan bidon sinoimbagu.

KORINTUS 1 1:30

Sin lantaranbí ki Allah, dá notobatúdon in moiko i Kristus. Bo lantaran doman kita nopirisayadon kon i Kristus dá kita in nonotaaudon kon bayongan in yagi-yagi. Siabí doman tua in nopoyotutui, nomiḻí bo notobut kon bayongan oaid naton inta diá mopia.

YOHANES 17:25

Amá inta moadil! Diá kinotaauan in dunia naa in ki Amá, táe Akuoi in nonotaaubí kon i Amá bo intau mita tanaa in nonotaau bidon kon ki Amábí in nopotabá kon i-Nakó.

YEREMIA 23:6

Aka momarenta in sia, intau in Yohuda in mosaḷamatbí, bo intau in Israel in mobiagbí moaman. Datu tatua in tangoionbí ‘Tuhan kasaḷamatan naton’.

YOHANES 8:42

Dá ki Yesus in noguman kon i monia, “Aka ki Allah tua ki Amámu, yo motabibí in moiko kon i-Nakó, sin Akuoi in namangoibí nongkon i Allah. Bo deemanbí ibog-Ku tontaní in namangoi, táe ibogbí i-Nia inta nopotabá mangoi kon i-Nakó.

YOHANES 1 2:23

Intau inta diá motarima kon i Adí, dá mangaḻenea sia in diá doman motarima kon i Amá.

YOHANES 1 5:5

Ki ine degá in mokotaḷow kon dunia naa? Tongábí intau inta mopirisaya kon ki Yesus tua in ki Adí i Allah.

YOHANES 1 5:15

Sin kinotaauandon naton kon indongogan-Neabí in kita aka mopoigum kon i-Nia, dá kinotaauan domandon naton kon ogoi-Neabí in onu inta ain pinoigum kon i-Nia.

YOHANES 1 5:18

Kinotaauan naton kon bayongan intau inta ain nobaḻí ki adí mita i Allah, in diábí umuran mogaid kon dosa, sin ki Adí i Allah in umuran moḷukad kon inia, bo ki Inta Moraat in diá mokopongonu kon inia.