YOHANES 7:28 - Alkitab Singog In Mongondow Masa In Tanaa

²⁸ Wakutu in ki Yesus koyogot mobogoimai in totundú kon bonu in Baḷoi Tuhan, Sia in nosingog noropot, kai-Nia, “Dá kinotaauan bidon monimu mongo ki ine in Akuoi naa bo kinotaauan bidon monimu in asaḷ usuḷ-Ku? Tongá bá kotaauan monimu, kon deemanbí ibog-Ku tontaní in namangoi. Akuoi naa in pinotabábí i-Nia inta Mobanar, táe diá kinotaauan monimu in Sia.

YOHANES 7:28 Referans Kwoze

YOHANES 8:42

Dá ki Yesus in noguman kon i monia, “Aka ki Allah tua ki Amámu, yo motabibí in moiko kon i-Nakó, sin Akuoi in namangoibí nongkon i Allah. Bo deemanbí ibog-Ku tontaní in namangoi, táe ibogbí i-Nia inta nopotabá mangoi kon i-Nakó.

YOHANES 8:19

Dá iḻibó monia, “Kon onda in ki Amá-Mu tua?” Ki Yesus in notubag: “Akuoi ande ki Amá-Ku in tumpaḷa diá kinotaauan monimu. Aka kuma bo kinotaauan monimu in Akuoi, yo tantú kotaauan bidon monimu in ki Amá-Ku.”

YOHANES 8:26

Mobayongpabí in musti poguman-Ku bo hakimon-Ku soaḷ moiko nion. Táe Sia inta nopotabá kon i-Nakó in diábí mouboḷ. Bo Akuoi in mopotaau kon dunia naa onu inta dinongog-Ku nongkon i-Nia.”

YOHANES 8:14

Ki Yesus in notubag, “Umpakabí in Akuoi mongonguman kon soaḷ kaadaan-Ku tontaní, táe totuubí onu inouman-Ku tua, sin kinotaauan-Kubí kon nongkon onda in Akuoi namangoi bo kon onda in bayáan-Ku.

YOHANES 17:3

Nanaa in kobiagan mononoi tua; ibogon tua bayongan intau in monotaau kon i Amá inta tongábí Sia tua in ki Allah inta mobanar, bo monotaau doman kon i Yesus Kristus inta pinotabá i Amá.

YOHANES 12:49

Sin Akuoi in mosingog deemanbí podudui in ibog-Ku tontaní; Táe ibogbí i Amá inta nopotabá kon i-Nakó. Siabí tua in nomarenta kon i-Nakó kon onu i musti singogon-Ku bo potaau-Ku.

YOHANES 5:43

Akuoi namangoi takin kawasa i Amá-Ku, táe moiko in doí motarima kon i-Nakó. Táe aka intau ibanea in mamangoi kon i monimu takin kawasanea tontaní yo tarimaan monimu in sia.

MATIUS 11:27

Bo ki Yesus in noguman, “Bayongan yagi-yagi inogoi i Amá kon i-Nakó, bo diá doman tobatúmai in nonotaau kon Adí koḻikudbí in ki Amá, bo diá doman tobatúmai intau in nonotaau kon i Amá kuḻikudbí in Adí bo intau inta kinoibog in Adí popoontongan.

YOHANES 1 5:10

Tuamai, intau inta mopirisaya kon i Adí i Allah ain notarima kon kosakusian tatua kon bonu in ginanea; táe intau inta diá mopirisaya kon i Allah, inanggapnea in ki Allah tua in mouboḷ, sin diá in sia mopirisaya kon onu inta pinoguman i Allah soaḷ ki Adí-Nea.

IBRANI 6:18

Doyowa nopasaḷ tatua in diábí mobaḷu-baḷui: Totuuonbí i Allah in dandi bo ibot-Nea tatua. Sia in diábí monguboḷ. Manangka intua kita inta umuran umoḻiung kon i-Nia, umuran-Nea inogoian in ropot bá umuran kumadai kon onu inta i harap mako kon tayowon naton.

TITUS 1:2

Totundú tatua in pinodoyonbí kon harapan kon kita in motarimabí kon kobiagan inta mopia bo mononoi. Kobiagan tatua in pinodandi bidon i Allah kon tungkuḷ in dunia naa diápa pinomia. Ki Allah in diábí monguboḷ.

KORINTUS 2 4:6

Sin ki Allah in nogumandon nanaa, “Nongkon sindip momukádon in bayag.” Bo ki Allah doman tatua inta nopomuká in bayag-Nea kon bonu in gina naton, sinbá mobayag domandon in raian naton bo monotaau kon kototarang in bayag i Allah inta nonindar kon pogot i Kristus.

KORINTUS 2 1:18

Totuu uḻe! Podoyon kon i Allah inta motaau pirisayaan, dandiku kon i monimu in deemanbí soaḷ “Oo” andeka “Diá”.

SURAT I PAULUS KON JAMAAT RUM 3:4

Tantú diábí natua! Sin notarang bidon kon ki Allah in tantúbí mobanar, umpakabí bayongan intau monguboḷ. Kon bonu in Buk motusi ain pinais nanaa, “Musti moiniata kon inimu kon totuu in onu inta siningogmu, bo iko in mountung kon dodai in iko hakimon.”

SURAT I PAULUS KON JAMAAT RUM 1:28

Bo lantaran irasa in intau kon diábí paraḷu in mosia monotaau kon i Allah, dá pinomayá bidon mako i Allah in kogoguyaatan in raian monia, sahingga in nogaidon mosia kon soaḷ mita inta pinoton aidan.

OUMAN IN RASUL MITA 17:23

Sin wakutu in akuoi nodondaḷoi kon kotámu tanaa, bo nonarukiramai kon tampat mita pososambayangan monimu kon naa, akuoi nokoontong doman kon tampat pobobogoian monimu kon sosumba; kon tampat tatua pinaisan nanaa, ‘Kon i Allah Inta Diá Kotaauan.’ Yo ki Allahbí inta diá kinotaauan monimu tuata in potaauku naa kon i monimu.

YOHANES 17:25

Amá inta moadil! Diá kinotaauan in dunia naa in ki Amá, táe Akuoi in nonotaaubí kon i Amá bo intau mita tanaa in nonotaau bidon kon ki Amábí in nopotabá kon i-Nakó.

YOHANES 16:3

Tua in aidan monia kon inimu sin diápa kinotaauan monia in ki Amá andeka Akuoi.

YOHANES 14:31

Tongá tua mita musti mobaḻí bá kotaauan in dunia naa kon Akuoi in motabibí kon i Amá bo mogaid doman kon bayongan inta pinarenta i Amá kon i-Nakó. Yo, koḻigai mayádon in kita nongkon naa.”

YOHANES 14:10

Pilipus! Diá degá in iko mopirisaya, kon Akuoi in notobatú i Amá, bo ki Amá in notobatú takin-Ku? Onu in pinoguman-Ku kon inimu naa deemanbí singog-Ku tontaní. Ki Amábí inta notobatú takin-Ku, Siabí in nogaid kon bayongan tua.

YOHANES 10:36

Yo nongonu sin singogonbí monimu kon Akuoi in mohojat kon i Allah popisí in Akuoi noguman kon Akuoi in ki Adí i Allah? Bokaka Akuoi in piniḻíbí i Amá bo pinotabá namangoi in dunia.

YOHANES 8:16

Táe aka Akuoi bo mohakim kon intau, yo onu inta sinantú-Ku tua in moadilbí, sin Akuoi in deemanbí tongá Aku-Akuoi mita, Akuoi in noyotakinbí i Amá-Ku inta nopotabá kon i-Nakó.

YOHANES 5:32

Táe oyúonbí in intau ibanea in nongonguman kon soaḷ Akuoi, bo kinotaauan-Kubí kon totuubí in oumannea tatua.

YOHANES 3:33

Sin intau inta mopirisaya kon onu inta inouman-Nea tatua, akúonneabí kon ki Allah tua in mobanar.

YOHANES 3:2

Kon doḷom tobatú, sia in namangoi kon i Yesus bo noguman, “Pak Guru, kinotaauan nami kon ki Amá in pinotabábí i Allah. Sin diábí in tobatúmai intau in motaau mogaid kon soaḷ mita inta mokoherang ná inta pinomia i Pak Guru aka ki Allah diá kotaki-takinnea.”

YOHANES 1:46

Táe ki Natanael in noguman, “Eta oyúon degá in mopia in mamangoi nongkon Nazaret?” Dá kai Pilipus doman, “Koḻigai, indoianmudon tontaní!”

LUKAS 10:22

Yagi-yagi komintandon pinosarakan i Amá kon i-Nakó. Bo diábí in tobatúmai intau nonotaau kon Adí, koḻikudbí in ki Amá. Bo diábí doman intau in nonotaau kon i Amá koḻikudbí in Adí; bo intau mita inta kinoibog in Adí popotaauan kon ki ine in ki Amá.”

LUKAS 2:51

Onda intua ki Yesus nobuidon kon Nazaret noyotakin monia bo umuran dinumudui kon parenta in guyanga-Nea. Bayongan inta ain nobaḻí umuran sinagú i Maria kon bonu in ginanea.

LUKAS 2:39

Naonda in nodait inaidan i Yusup bo i Maria onu inta pinarenta kon hukum i Tuhan, mosia in nobuidon kon Nazaret kon Galilea.

LUKAS 2:11

Singgai in naa kon ḻipú i Daud, noilahirdon in Datu inta mopoposaḷamat kon i monimu, tuata in ki Kristus, ki Tuhan naton.

LUKAS 2:4

Ná doman tua in ki Yusup. Sia in nobuat nongkon ḻipú in Nazaret kon Galilea bo minayá in Betlehem butá in Yudea, ḻipú inta kinolahiran i Daud, sin sia in buí i Daud.

MATIUS 2:23

Kon tua, sia nogutun kon ḻipú inta tangoinea in Nazaret. Tua komintan nobaḻí sinbá motompodon Pirman inta aindon pinoyaput i nabi mita, kon sia in tangoion, “Intau in Nazaret.”

HOSEA 5:4

Aid moraat inta inaidan in intau in Israel nokopopisí kon i monia diádon mokopobui mangoi kon i Allah monia. Mosia in kinadaiandon in posumbaan kon berhala, dá mosia in diádon mopandungmai kon i Tuhan.

HOSEA 4:1

Oyúon in pelekara i Tuhan kon intau inta nogutun kon butá tanaa. Ei Israel, indongogai onu in pinoguman-Nea, “Kon butá tanaa diádon in motoindudui andeka motabi, bo Akuoi in diá bidon ḷabiton monia saḷaku ki Allah monia.

YEREMIA 31:34

Diá bidon paraḷu tobatúmai in intau nongkon i monia in mositundúan bá monotaau kon i Tuhan. Sin mosia komintan, moḷoben mointok, in monotaau bidon kon i-Nakó. Taḷá mita monia in ḻiongon-Ku bidon, dosa mita monia in ampungan-Kubí. Akuoi, ki Tuhan, ain nosingog.”

MAZMUR 9:10

Ki Tuhan tua in pogogadopan in intau inta dinorot, tampat pononiungan kon dodai in mororiga.

SAMUEL 1 2:12

Ki adí mita i Eli in mongoraat totok. Mosia in doí dumudui kon parenta i Tuhan

YOHANES 7:14

Wakutu in koyogotdon pinoramean, ki Yesus in sinumuot kon Baḷoi Tuhan, bo nomangkoidon nobogoi in totundú.

MATIUS 26:55

Wakutu intua ki Yesus nosingog kon intau moantó inta namangoi nodomok kon i-Nia, “Irai monimu degá Akuoi naa mononakowbí sahingga in moiko mamangoi kodia-dia in pitow bo bobobak bo modomok kon i-Nakó? Pomuḷoi in singgai Akuoi in ḻimitú mako kon Baḷoi Tuhan, bo motundú kon tua táe diábí dinomok monimu!

YOHANES 6:42

Mosia in noguman, “Sia naa in ki Yesus, ki adí i Yusup toh? Kinotaauanbí nami in ki iná bo ki amá-Nea! Yo nongonu sin Sia in mogumanbí, kon Sia in noponag nongkon soroga?”

YOHANES 9:29

Kinotaauanbí nami kon ki Allah ain nobogoi in pirman-Nea kon i Musa. Táe aka Intau tatua, diábí kinotaauan nami in asaḷ-usuḷ-Nea.”