YOHANES 6:69 - Alkitab Singog In Mongondow Masa In Tanaa

⁶⁹ Kami naa in nopirisaya bo noyakin bidon kon ki Tuhanbí in totabá inta motusi nongkon i Allah.”

YOHANES 6:69 Referans Kwoze

YOHANES 11:27

“Tuhan,” kai Marta, “akuoi in mopirisayabí kon ki Tuhan in ki Adí i Allah, Datu Mopoposaḷamat inta mamangoi in dunia naa.”

LUKAS 9:20

Ki Yesus in noḻibó bui kon i monia, “Aka podudui in raian monimu, yo ki ine in Akuoi naa?” Dá ki Petrus in notubag, “Ki Amá in Datu Mopoposaḷamat inta pinodandi i Allah.”

MARKUS 8:29

“Yo aka podudui in raian monimu tontaní, Ki ine in Akuoi naa?” Tua in ḷoḻibó i Yesus. Ki Petrus in notubag, “Ki Pak Guru naa in Datu Mopoposaḷamat!”

YOHANES 1 5:1

Intau inta mopirisaya kon ki Yesus tua in Datu Mopoposaḷamat inta namangoi nongkon i Allah, yo intau tatua ki adí i Allah. Intau inta motabi kon i-Nia inta nopoangoi tua in motabibí doman kon i-Nia inta namangoi nongkon i Allah.

YOHANES 1 5:20

Kinotaauan bidon naton kon ki Adí i Allah ain namangoi bo ain nobogoi in pongortian kon i naton, sinbá kotaauan naton in ki Allah inta mobanar. Kita in nobiag notobatú takin i Allah inta mobanar bo umuran nobiag notobatú takin i Adí-Nea ki Yesus Kristus. Naadon in ki Allah inta mobanar, bo naadon in kobiagan inta mopia bo mononoi.

SURAT I PAULUS KON JAMAAT RUM 1:3

Habar Mopia tatua in soaḷbí ki Adí i Allah, inta ki Tuhan naton, ki Yesus Kristus. Inta aka podudui in awak ilo-ilow naa, yo Sia tua in buíbí i Daud.

YOHANES 20:31

Táe onu inta pinais kon buk tanaa, makusudnea kon bá mopirisaya in moiko kon ki Yesusbí tua in Datu Mopoposaḷamat, bo ki Adí i Allah, bo popisí in pirisayamu tatua dá mokouḻí i moiko kon kobiagan.

YOHANES 20:28

Ki Tomas in noguman kon i Yesus, “Tuhanku bo Allahku!”

YOHANES 1:41

Dá ki Andreas in ḷagi notayak kon i Simon ki utatnea bo noguman kon inia, “Kami ain noyodungkuḷ i Mesias!” (Mesias notongkai in Kristus: Datu Mopoposaḷamat.)

YOHANES 1:29

Nopoikoḷomai kon singgai, indoianmai Yohanes ki Yesus namangoi kon inia. Bo ki Yohanes in noguman, “Indoiai, tuata in ki Adí in Domba i Allah inta momopat kon dosa in dunia.

MARKUS 1:24

“Ei Yesus, intau in Nazaret, onuon-Mu in kami? Mamangoi degá momutú kon inami in Iko? Kotaauankubí in Iko: Iko nion in totabá i Allah inta motusi!”

MATIUS 16:16

Dá ki Simon Petrus in notubag, “Iko in ki Mesias, ki Adí i Allah Inta Nobiag.”

OUMAN IN RASUL MITA 8:36

Kon binayáan monia tatua, mosia noidapot in tobatú tampat inta oyúon in tubig. Pogawai tatua noguman, “Indoiaika, kon tua oyúon in tubig! Motaau degá aka akuoi baptisondon kon tua?” [

MARKUS 1:1

Naa in Habar Mopia soaḷ ki Yesus Kristus, ki Adí i Allah.

YOHANES 10:36

Yo nongonu sin singogonbí monimu kon Akuoi in mohojat kon i Allah popisí in Akuoi noguman kon Akuoi in ki Adí i Allah? Bokaka Akuoi in piniḻíbí i Amá bo pinotabá namangoi in dunia.

EPESUS 4:13

Sahingga in kita komintan motobatúdon kon pirisaya bo motongkaidon in pongortian kon soaḷ ki Adí i Allah. Bo kita in mobaḻí intau mita inta noguyangdon kon pirisaya, inta koonggot-koonggot kodugang-kodugangdon in kososompurna ná ki Kristus.

YOHANES 1 4:16

Kita tontaní ain nonotaau bo nopirisaya kon tabi i Allah kon i naton. Ki Allah tua in tabibí. Intau inta umuran kototabi kon tumpaḷa intau, in notobatúdon takin i Allah in Sia, bo ki Allah in notobatúdon takin intau tatua.