YOHANES 4:23 - Alkitab Singog In Mongondow Masa In Tanaa

²³ Táe moiangoibí in wakutunea, sedang bo noiangoi bidon, takin in kawasa in Roho i Allah intau mita in mosumba kon i Amá inta mobanar ná inta kinoibog i Amá.

YOHANES 4:23 Referans Kwoze

PILIPI 3:3

Bokaka kitabí naa in intau mita inta notarima kon sunat nongkon i Allah. Kitabí naa in intau inta ain dinia i Allah sin mosumba kon i-Nia, bo umuran mosukur mako in kita sin notobatúdon i Kristus Yesus. Diá bidon in kita moitogot mako kon upacara inta sipatnea in tongábí samantara.

YOHANES 5:25

Pirisayadon: Moiangoibí in wakutunea, sedang bo noiangoi bidon, kon intau minatoi in mokodongogbí kon singog i Adí Allah. Bo intau inta mokodongog in mobiagbí.

GALATIA 4:6

Moiko nion in ki adí mita i Allah, dá pinotabá-Neadon in Roho i Adí-Nea mamangoi kon i naton inta tantú mokuani; Amá, o Amáku.

SURAT I PAULUS KON JAMAAT RUM 8:26

Tongá Roho i Allah in mamangoibí motuḷung kon i naton aka kita in moyangkódon. Sin diábí kotaauan naton naonda in pososambayang naton. Rohobí tatua in mayá tumayow kon i Allah bo mopoigum kon bayongan inta inamuimai naton.

YOHANES 12:23

Ki Yesus in noguman kon i monia, “Wakutuneadon Adí Intau pomuliaan.

EPESUS 6:18

Aidai intua komintan takin mosambayang mopoigum kon totuḷung i Allah. Posambayangdon pomuḷoi mako podudui ibog in Roho i Allah kon i monimu. Umuran pobasadia in moiko bo dika umundok. Tantú sambayangai in bayongan umat i Allah.

YOHANES 4:21

Ki Yesus in noguman kon inia: “Popirisayadon, komintanmai intau in mosumba kon i Amá, deeman bidon kon tombuḷud tanaa bo deemanbí doman kon Yerusalem.

YOHANES 1:17

Hukum i Tuhan sinarima naton nongkon i Musa. Táe tabi bo kososatia i Allah in pinoniatadon kon i Yesus Kristus.

YESAYA 29:13

Ki Tuhan in noguman, “Intau mita tatua in tongábí mosumba kon i-Nakó pongin tosingogon, táe gina monia in moyayúbí kon i-Nakó. Agama monia in tongábí atorang in intau inta ihapal.

YESAYA 58:2

Mosia in mosumba kon i-Nakó pomuḷoi in singgai, bo moibog monotaau kon ibog-Ku, naonda bo moibog in mosia mogaid kon inta mopia, bo motoindudui kon hukum-Ku. Mosia in moguman kon mosanang in gina monia in mosumba kon i-Nakó bo moibog in hukum-Ku inta moadil.”

YESAYA 43:21

Mosiabí tua in bangusa inta binaḻí-Ku kon i-Nakó: sinbá motaau mopotaau in dodayow kon i-Nakó.”

SURAT I PAULUS KON JAMAAT RUM 8:15

Sin Roho, inta inogoi i Allah kon i monimu, diábí mopobaḻí kon i monimu ata, sahingga moiko in mobiagdon kon bonu in porasaan moondok. Táe Roho i Allah in mopobaḻíbí kon i monimu ki adí mita i Allah. Bo takin kawasa in Roho tatua kita komintan in monangoi kon i Allah, “Amá, o Amáku!”

YOSUA 24:14

“Dá, tanaa,” ki Yosua noguman doman nanaa, “horomatonbí in ki Tuhan. Pogundoidon kon i-Nia takin gina motuḻid bo mosatia. Ḷumbúdon in toḻindua in Tuhan inta sinumba in mogoguyangmu koḻipod kon Mesopotamia bo Mesir. Tongádon ki Tuhan in pogundoian.

PETRUS 1 2:9

Táe moiko nion in bangusa inta kinopiḻían, imang mita inta mobantung kon datu, bangusa inta mokudus, umat inta kapunyaan i Allah. Ain piniḻí bo inoiní i Allah in moiko iḷumuai nongkon sindip bo mayá tumuot kon bayag-Nea inta momulia, takin makusud bá moiko in mopotaa-taau mako in habar in bayongan inta pinomia i Allah inta diá in poḻiuan tua.

MAZMUR 51:6

Tongábí kon ini-Mu, tongábí kon ini-Mu binaradosa in akuoi, bo pinomiaku in onu inta inanggap-Mu moraat. Dá patusbí hukumon-Mu in akuoi, moadilbí in pononantú-Mu.

MAZMUR 17:1

Sambayang i Daud. Indongogaipa kaasí in kuaniku mopoigum in inta moadil, taridiaipa kaasí in sambayangku inta motuḻid, o Tuhan.

SAMUEL 1 12:24

Horomatdon in ki Tuhan bo pogundoidon kon i-Nia takin satia takin ḻimbatú in ginamu. Toropdon in aid-Nea mita inta moḷoben inta ain inaidan-Nea kon inimu.

YOHANES 16:32

Pokotorop! Moiangoibí in wakutunea, sedang bo noiangoi bidon, moiko in poyayiton. Moiko in mobuidon kon baḷoinea-baḷoinea bo taḷaandon monimu in Akuoi. Táe Akuoi in diábí tongá Aku-Akuoi mita, sin ki Amá in kotaki-takin-Kubí.

YEREMIA 4:2

Aka moiko in mongibot podoyon kon tangoi-Ku bo moiko in mobiag mojujur moadil bo mobanar, dá bayongan in bangusa in mopoigumbí kon i-Nakó sinbá barakatan-Ku in mosia, bo mosia in modayow kon i-Nakó.”

YEREMIA 3:10

Naonda in nogaid kon tua mita, Yohuda inta diá mosatia tua nobui kon i-Nakó táe tongá ki ubo-uboḷmai, sin ginanea in diábí notuḻid. Akuoi, ki Tuhan, ain nosingog.”

AMSAL 15:8

Ki Tuhan in motarima kon sambayang in intau mopia, táe doíbí in Sia kon sosumba in intau moraat.

TAWARIKH 1 29:17

Kinotaauankubí kon Iko in monungkuḷ kon gina in intau kon batúannea bo kinoibog-Mu in intau inta motuḻid in ginanea. Takin gina nobayag bo pia in gina posumbaku in naa komintan kon ini-Mu. Akuoi in nokoontongdon tontaní kon naonda in umat-Mu inta noyosipun kon naa nodia kon sosumba monia kon ini-Mu takin pia in gina.

SURAT I PAULUS KON JAMAAT RUM 1:9

Umuranku kotoropan in moiko aka mosambayang in akuoi. Kinotaauanbí i Allah kon onu in siningogku tua in totuubí. Sia tua in ki Allah inta oaidan-Nea in inaidanku takin gina motuḻid, oaidan tatua in mopoyaput in Habar Mopia soaḷ ki Adí-Nea.

MAZMUR 147:11

Mopia in gina i Tuhan kon intau inta motoguondok, kon intau inta umuran mongamang mako kon tabi-Nea.

YEHEZKIEL 22:30

Kon sigad in intau in Israel tua, tayakon-Ku in intau inta mokoposindog in dinding, andeka simindog kon tampat mita inta dindingnea ain noumpag sin moḷukad kon butá tatua aka Akuoi morimumudon kon tua popisí in torú-Ku; táe diá tobatúmai in intau in nouḻí-Ku.

DONDONG MOḶANTUD 2:14

O paḷomaku kon sigad in batu, kon pinogadopan kon obaga mita in buḷud inta mosindog, pomayádon mako ontongonku in pogotmu, bo mokodongog kon singogmu, sin pogotmu moḷunat, dondongmu in mopia.

MAZMUR 32:2

Pia in kamang in intau inta aidnea moraat diádon irekengmai i Tuhan, bo inta doí mongakaḷ.

YESAYA 10:20

Moiangoibí in wakutunea ki agat in bangusa in Israel inta nokoḷagui in diá bidon mopoandoḷ in ukurnea kon bangusa inta mongongawasa inta gogió momutú kon i monia, táe umandoḷ bidon kon i Tuhan, Allah inta mokudus in Israel.

YOHANES 5:28

Dika moherang moiko in mokodongog kon soaḷ tanaa, sin moiangoibí i wakutunea kon intau inta ain minatoi in mokodongogbí kon singog-Nea,

YOHANES 16:2

Moiko in poḷuaionbí nongkon baḷoi mita in pososambayangan. Bo moiangoibí in wakutunea kon intau inta moḻimod kon i monimu in mosangka kon sia tua in dinumuduibí kon parenta i Allah.