YOHANES 3:13 - Alkitab Singog In Mongondow Masa In Tanaa

¹³ Diábí in tobatúmai intau inta nokoimontandon namonik in soroga, koḻikudbí in Sia inta ain noponag kon dunia naa, Sia tuata in ki Adí Intau.

YOHANES 3:13 Referans Kwoze

AMSAL 30:4

Intaubí táonda in nokoimontandon in noponik noponag kon soroga? Nokoimontandon degá in sia norangkom mako kon tompot, bo mopobakut in ḷambungnea kon tubig, andeka nonantú kon sigad mita in dunia? Ki ine in sia, bo ki ine in ki adínea? Notantúbí kon kinotaauanmu!”

YOHANES 6:38

Sin Akuoi in namangoi nongkon soroga deemanbí mamangoi mogaid kon onu inta kinoibog-Ku tontaní, táe mogaidbí kon inta kinoibog-Nea inta nopotabá kon i-Nakó.

OUMAN IN RASUL MITA 2:34

Ki Daud tontaní in diábí namonik in soroga, táe sia in nosingog nanaa, ‘Ki Tuhan in noguman kon i Tuhanku:

YOHANES 1:18

Diábí in nokoimontanmai in nokoontong kon i Allah, koḻikudbí in ki Adí tuḷong i Amá, inta notongkai i Amá bo modagin totok kon i-Nia. Kon i-Nia tuata moniata kon i naton in ki Amá.

KORINTUS 1 15:47

Ki Adam inta muna pinomia nongkon ḷobud in butá, táe ki Adam inta induanea in nongkon sorogabí.

YOHANES 13:3

Kinotaauan bidon i Yesus kon ki Amá in noposarakandon in kawasa-Nea komintan kon i-Nia. Kinotaauan-Neabí doman kon Sia in namangoi nongkon i Allah bo mobui doman kon i Allah.

SURAT I PAULUS KON JAMAAT RUM 10:6

Táe aka moyodame i Allah sin podoyon kon pirisaya, yo nanaa in pinais kon Buk Motusi, “Dikadon in iko mosingog kon bonu in ginamu, ki ine in momonik in soroga? (mangaḻenea modia kon i Kristus moponag),

YOHANES 6:62

Yo onu degá in mobaḻí aka moiko in mokoontongdon kon i Adí Intau mamonik bui kon tampat-Nea inta muna?

YOHANES 3:31

Inta namangoi nongkon soroga noiḻiubí nongkon bayongan yagi-yagi. Inta namangoi nongkon dunia noibonubí kon dunia naa bo nongonguman doman kon soaḷ in dunia mita naa. Ki ine inta nongkon omonik Sia in noiḻiubí nongkon bayongan yagi-yagi.

YOHANES 6:46

Tongá tua in deemanbí mangaḻenea kon oyúondon intau inta ain nokoontong kon i Amá. Tongábí Sia inta namangoi nongkon i Allah in nokoontongdon kon i Amá.

YOHANES 6:42

Mosia in noguman, “Sia naa in ki Yesus, ki adí i Yusup toh? Kinotaauanbí nami in ki iná bo ki amá-Nea! Yo nongonu sin Sia in mogumanbí, kon Sia in noponag nongkon soroga?”

ULANGAN 30:12

Tampatnea in deemanbí kon ḷangit, dá moiko in moḻibó, ‘Ki ine in mamonik mogamá kon tua sin pakéon naton, sinbá kodongogandon naton bo motaaudon duduian?’

YOHANES 17:5

Amá! Pomuliadon in Akuoi in tanaa mako kon tayowon-Mu, takin kamuliaan inta kon i-Nakó wakutu in noyotakin i Amá kon dodai in dunia naa diápa binaḻí.

YOHANES 8:42

Dá ki Yesus in noguman kon i monia, “Aka ki Allah tua ki Amámu, yo motabibí in moiko kon i-Nakó, sin Akuoi in namangoibí nongkon i Allah. Bo deemanbí ibog-Ku tontaní in namangoi, táe ibogbí i-Nia inta nopotabá mangoi kon i-Nakó.

YOHANES 6:51

Akuoibí in roti inta noponag nongkon soroga, roti inta mobogoi in kobiagan. Intau inta mokaan kon roti tanaa in umuranbí mobiag. Roti inta ogoi-Ku kon kobiagan intau kon dunia naa in awak-Kubí.”

YOHANES 6:33

Sin roti inta inogoi i Allah in Siabí inta noponag nongkon soroga bo nobogoi in kobiagan kon intau kon dunia.”

OUMAN IN RASUL MITA 20:28

Manangka intua yo mokopopiadon in moiko bo umuran moḷukad kon awak monimu bo poḷat doman ḷukadai in bayongan umat i Allah inta ain pinosarakan i Allah kon i monimu sinbá ḷukadan. Sin moiko nion ain sinantú in Roho i Allah mobaḻí moḷoḷukad bo mononompia kon umat i Allah inta ain sinobut-Nea in dugú i Adí-Nea tontaní.

MATIUS 28:20

Bo tundú in mosia mogaid kon onu inta aindon pinoguman-Ku kon i monimu. Bo bá kotaauan monimu, kon Akuoi in umuranbí kotaki-takin monimu modapot in singgai pangabisan.”

EPESUS 1:23

Jamaat tua awakbí i Kristus, pinosompurna i Allah inta noposempurna in bayongan yagi-yagi kon ondaka.

MATIUS 8:20

Ki Yesus in noguman kon inia: “Serigala oyúon in bubúnea, bo ḷagapan oyúon in pugadnea, táe ki Adí Intau diá in tampat posiugan-Nea.”

YOHANES 3:12

Moiko in diá mopirisaya aka Akuoi mongonguman kon inimu in soaḷ mita nongkon dunia, dá naondabí in moiko mopirisaya aka Akuoi in mongonguman kon i monimu kon soaḷ mita inta nongkon soroga?