YOHANES 3:11 - Alkitab Singog In Mongondow Masa In Tanaa

¹¹ Pirisayadon: Kami in mosingog kon onu inta kinotaauan nami, bo tongábí doman onu inta ain inontong nami tua in potaau nami; táe moiko in doí motarima kon onu in pinotaau nami.

YOHANES 3:11 Referans Kwoze

YOHANES 8:38

Onu in inontong-Ku kon i Amá-Ku tua in poguman-Ku. Ná doman moiko mogaid kon onu inta pinoguman i amá monimu.”

YOHANES 14:24

Bo intau inta diá motabi kon i-Nakó, in doíbí dumudui kon totundú-Ku. Totundú inta dinongog monimu tua, deemanbí nongkon i-Nakó, táe nongkon i Amábí inta nopotabá kon i-Nakó.

YOHANES 12:49

Sin Akuoi in mosingog deemanbí podudui in ibog-Ku tontaní; Táe ibogbí i Amá inta nopotabá kon i-Nakó. Siabí tua in nomarenta kon i-Nakó kon onu i musti singogon-Ku bo potaau-Ku.

YOHANES 8:14

Ki Yesus in notubag, “Umpakabí in Akuoi mongonguman kon soaḷ kaadaan-Ku tontaní, táe totuubí onu inouman-Ku tua, sin kinotaauan-Kubí kon nongkon onda in Akuoi namangoi bo kon onda in bayáan-Ku.

YOHANES 7:16

Ki Yesus in notubag, “Onu in sinundú-Ku naa in deemanbí totundú-Ku, táe totundúbí i-Nia inta nopotabá mangoi kon i-Nakó.

YOHANES 1:18

Diábí in nokoimontanmai in nokoontong kon i Allah, koḻikudbí in ki Adí tuḷong i Amá, inta notongkai i Amá bo modagin totok kon i-Nia. Kon i-Nia tuata moniata kon i naton in ki Amá.

KORINTUS 2 4:4

Sin ilah moraat inta mongawasa kon dunia naa in tantú mogoḻingoi kon raian in intau mita inta diá mopirisaya. Siabí tua in tantú mogoḻingoi kon i monia sinbá diá mokoontong kon bayag in Habar Mopia soaḷ kawasa i Kristus inta moḷoben, inta nobaḻí oḻinow i Allah.

YESAYA 65:2

Akuoi in umuranbí mogoḷat mako in motomu kon umat-Ku, táe mosia in moibog momarontak. Bangusa tatua in mogaid kon inta moraat bo dumudui kon tomayánea tontaní.

YOHANES 1:11

Sia in namangoi in dunia inta pinomia-Nea tontaní táe intau mita kapunyaan-Nea tatua in doí motarima kon i-Nia.

LUKAS 10:22

Yagi-yagi komintandon pinosarakan i Amá kon i-Nakó. Bo diábí in tobatúmai intau nonotaau kon Adí, koḻikudbí in ki Amá. Bo diábí doman intau in nonotaau kon i Amá koḻikudbí in Adí; bo intau mita inta kinoibog in Adí popotaauan kon ki ine in ki Amá.”

YESAYA 53:1

Bangusa tatua in notubag, “Ki ine in mopirisaya kon onu inta ain dinongog nami? Kon i ine in pinoponiataan in kawasa i Tuhan?

YESAYA 50:2

Nongonu sin nongkon umat-Ku diábí tobatúmai in intau in notubag, kon tungkuḷ in Akuoi namangoi nogoiní kon i monia? Degá mosia in tongá kibio-biómai sin kai monia kamai Akuoi in diá mokopoḷuat bo moposaḷamat kon i monia? Totuubí, podudui in parenta-Ku dagat nobaḻí noingkag, ongkag mita binaḻí-Ku padang gurun, nodapot in toyá mita minatoi bo nobódon in ḷandig.

WAHYU 1:5

bo nongkon i Yesus Kristus, sakusi inta mosatia. Sia tua inta muna-munamai totok biniag bui nongkon kinopatoian bo Sia doman in nongawasa kon bayongan datu kon dunia naa. Ki Yesus in motabi kon i naton, tuamai Sia in noibog minatoi sin momilat kon i naton nongkon kawasa in dosa mita naton,

OUMAN IN RASUL MITA 22:18

Akuoi in nokoontong kon i Tuhan; bo Sia in noguman kon inakó, ‘Ḷagidon taḷaai in Yerusalem naa, sin diábí indongogan monia in onu in pogumanmu soaḷ Akuoi.’

YOHANES 5:43

Akuoi namangoi takin kawasa i Amá-Ku, táe moiko in doí motarima kon i-Nakó. Táe aka intau ibanea in mamangoi kon i monimu takin kawasanea tontaní yo tarimaan monimu in sia.

YOHANES 3:13

Diábí in tobatúmai intau inta nokoimontandon namonik in soroga, koḻikudbí in Sia inta ain noponag kon dunia naa, Sia tuata in ki Adí Intau.

YOHANES 3:5

Ki Yesus in notubag, “Totuubí in singog-Ku tanaa: aka intau bo diá polahiron nongkon tubig bo nongkon Roho i Allah, yo intau tatua in diábí motaau in mobaḻí umat i Allah.

YOHANES 3:3

Tubag i Yesus, “Totuu, kon diábí in tobatúmai in intau motaau in mobaḻí umat i Allah, aka sia in diá polahiron bui.”

MATIUS 23:37

“Yerusalem, Yerusalem! Nabi mita iḻimodmu. Totabá mita i Allah inandurmu in batu nodapot in minatoi. Nokakitdon in Akuoi moibog totok mosipun kon i adímu mita naonda bo ki iná in manuk mosipun kon i adínea mita kon koḻikipnea, tongá doí in moiko!

MATIUS 11:27

Bo ki Yesus in noguman, “Bayongan yagi-yagi inogoi i Amá kon i-Nakó, bo diá doman tobatúmai in nonotaau kon Adí koḻikudbí in ki Amá, bo diá doman tobatúmai intau in nonotaau kon i Amá kuḻikudbí in Adí bo intau inta kinoibog in Adí popoontongan.

YESAYA 55:4

Totuubí, sia in baḻíon-Ku itoi bo umpung pongayow, sakusi in kawasa-Ku kon bangusa mita.

WAHYU 3:14

“Paisdon kon malaekat in jamaat Laodikia nanaa: Naadon in koyow nongkon i-Nia inta sinumangoi Amin, sakusi inta mosatia bo mobanar, pangkoi in bayongan yagi-yagi inta pinomia i Allah.

YOHANES 3:12

Moiko in diá mopirisaya aka Akuoi mongonguman kon inimu in soaḷ mita nongkon dunia, dá naondabí in moiko mopirisaya aka Akuoi in mongonguman kon i monimu kon soaḷ mita inta nongkon soroga?

YOHANES 8:26

Mobayongpabí in musti poguman-Ku bo hakimon-Ku soaḷ moiko nion. Táe Sia inta nopotabá kon i-Nakó in diábí mouboḷ. Bo Akuoi in mopotaau kon dunia naa onu inta dinongog-Ku nongkon i-Nia.”