YOHANES 21:12 - Alkitab Singog In Mongondow Masa In Tanaa

¹² Ki Yesus in noguman kon i monia, “Koḻigai mongaandon.” Diá tobatúmai in kon sigad monia tua in nokobaḻí noḻibó, “Mongo ki ine in ki Amá!” Sin kinotaauandon monia kon Tuhan in Sia.

YOHANES 21:12 Referans Kwoze

OUMAN IN RASUL MITA 10:41

tongá deemanbí kon bayongan intau, táe tongábí kon inami inta piniḻí-Nea muna mobaḻí sakusi-Nea mita. Kami ain nongaan bo nonginum noyotakin-Nea wakutu in Sia nobiagdon bui nongkon kinopatoian-Nea.

YOHANES 16:19

Kinotaauanbí i Yesus kon mosia in moibog moḻibó kon i-Nia. Dá tuamai Sia in noguman, “Koina Akuoi in noguman, ‘Diádon moonggot, moiko in diádon mokoontong kon i-Nakó, bo diá domandon moonggot poindoian monimu kon i-Nakó.’ Tua degá inta oumanonmai monimu mongo onu in makusudnea?

YOHANES 21:15

Nopaḷut mako mosia nongaan, ki Yesus in noguman kon i Simon Petrus, “Simon, adí i Yohanes, degá tabimu in moḷobe-ḷoben nongkon tabi monia kon i-Nakó?” “Totuu, Tuhan,” tubag i Petrus, “Kinotaauanbí i Tuhan kon akuoi in motabibí kon i Tuhan.” Ki Yesus in noguman kon inia, “Ḷukadaidon in ki adí mita in domba-Ku.”

MARKUS 9:32

Diá kinomangaḻean in murí-Nea mita in makusud in singog i Yesus tatua, táe moondok mosia in moḻibó kon i-Nia.

YOHANES 4:27

Bo dodai intua murí mita i Yesus noiangoidon bui. Mosia in noherang totok in nokoontong kon i Yesus nongonguman takin tobatú bobay. Táe diá in tobatúmai in mosia in nokobaḻí noḻibó kon bobay tatua, “Onu in paraḷu i iná?” andeka noḻibó kon i Yesus, “Mongo onu in inouman i Amá takin bobay tatua?”

LUKAS 9:45

Tongá diá kinomangaḻean in murí-Nea mita in singog-Nea tatua. Sin tua in sinontuonbí binuni kon i monia sinbá diá komangaḻean monia. Bo mosia in moondok doman in moḻibó kon i-Nia.

MATIUS 22:46

Diá tobatúmai in nokotubag kon singog-Nea tatua. Bo mulai singgai tua, diádon in tobatúmai in mokobaḻí mopoḻibó-ḻibómai kon i-Nia.

YOHANES 21:11

Ki Simon Petrus in sinumakoi kon uangga bo nogugut kon landará bo pinobayá in toba. Landará tatua in nopuḻing in toyá mongoḷoben, mogatut bo ḻima nopuḷú botoḷú in kobayongnea. Táe umpaka natua in kobayong toyá, yo diábí nobisik in landará.