YOHANES 19:9 - Alkitab Singog In Mongondow Masa In Tanaa

⁹ Dá sia in sinumuot bui kon komaḻig bo naonda in ki Yesus dinia pinotuot, ki Pilatus in noḻibó kon i-Nia, “Nongkon ondabí in Iko nion?” Táe diá sinubagan i Yesus.

YOHANES 19:9 Referans Kwoze

YOHANES 18:33

Ki Pilatus in sinumuot bui kon komaḻig bo nogoiní kon i Yesus poḷat noḻibó, “Degá Iko nion Datu Intau Yahudi?”

PILIPI 1:28

Bo topiḻikmai dikabí moondok kon saturumu mita; sin aka diá moondok in moiko, yo tua in mopoontong kon mosia in taḷowonbí bo moiko in mountung, sin ki Allahbí tontaní in mobogoi intua kon i monimu.

YOHANES 8:14

Ki Yesus in notubag, “Umpakabí in Akuoi mongonguman kon soaḷ kaadaan-Ku tontaní, táe totuubí onu inouman-Ku tua, sin kinotaauan-Kubí kon nongkon onda in Akuoi namangoi bo kon onda in bayáan-Ku.

MATIUS 26:63

Táe ki Yesus tongábí kibio-biómai. Bo imang moḷoben tatua in noguman kon i-Nia: “Popodoyon kon i Allah inta nobiag, yo pogumankadon kon inami, mongo Iko degá in ki Mesias ki Adí i Allah, andeka, deeman?”

YESAYA 53:7

Iromu-romúmai in pinogogaid kon inia, táe binabanea intua takin gina nosabar. Diábí in sia noposingo-singog naonda bo ki adí in domba inta dinia kon tampat pororataan andeka ki iná in domba inta kinarugan in bubuḷnea.

HAKIM MITA 13:6

Nopaḷut mako kon tua ki buḷoi Manoah minayá kon i buḷoinea bo noguman, “Uḻe, totabá i Allah in namangoi kon inakó; batangannea in ná malaekat i Allah, dá inagían in ondok in akuoi. Diábí in akuoi noḻibó mongo nongkon onda in sia, bo diábí doman pinogumannea in tangoinea kon inakó.

YOHANES 18:37

Dá ki Pilatus in noḻibó kon i-Nia, “Aka natua, yo Iko nion in Datu?” Ki Yesus in notubag, “Ikodon in noguman kon Akuoi naa in Datu. Akuoi in noilahir bo namangoi in dunia naa takin tobatú makusud mobogoi in kosakusian soaḷ inta nobanar. Intau inta nongkon nobanar tatua in mokidongogbí kon i-Nakó.”

MATIUS 27:27

Onda intua tontara mita i gubernur nodia kon i Yesus pinobayá in baḷoi pongadilan, bo bayongan in tontara noyosipun kon ḻibumai i Yesus.

LUKAS 23:9

Tuamai onda in noyodungkuḷ totoknea in pinoḻibo-ḻibóanmai in Sia, táe diá tobatúmai in sinubagan i Yesus.

YOHANES 18:28

Doḷo-doḷompa totok dinia monia in ki Yesus nongkon baḷoi i Kayapas pinobayá kon komaḻig i gubernur. Intau mita in Yahudi in diábí sinumuot kon komaḻig tatua, sinbá mosia in diá monajis podudui in agama monia, sin mosia in tumakindon mokaan kon kaanon in Paska.

YOHANES 18:34

Ki Yesus in notubag, “Ḷoḻibómu nion in nongkon bonu in ginamu tontaní andeka oyúon in intau ibanea in nopotaau muna kon inimu soaḷ Akuoi?”

YOHANES 19:8

Naonda in ki Pilatus nokodongog kon singog monia natua, nodugangdon bui in ondoknea.

YOHANES 19:10

Dá ki Pilatus in noḻibó bui, “Iko in doídon mongonguman takin-Ku? Bá kotaauan-Mu, oyúon in kawasaku mopobebas kon ini-Mu, bo kawasaku mopopakú kon kayu pinoyotaḻempang kon ini-Mu!”