YOHANES 14:27 - Alkitab Singog In Mongondow Masa In Tanaa

²⁷ Kobiagan moonow bo motompia taḷaan-Ku kon i monimu. Dodamean-Kubí tontaní in ogoi-Ku kon inimu. Onu in ogoi-Ku tua deemanbí ná inta inogoi in dunia naa kon i monimu. Dika moḻia-ḻiaw in gina bo dika moondok.

YOHANES 14:27 Referans Kwoze

PILIPI 4:7

Dá kobiagan motompia nongkon i Allah inta diá kodapotan in raian intau, in moḷukad kon gina bo raianmu inta ain notobatú i Kristus Yesus.

YOHANES 16:33

Naa komintan in poguman-Ku sinbá moiko in mokouḻí kon kobiagan motompia bo moonow sin notobatú-Kudon. Kon dunia naa moyoyangpabí in moiko, táe korotonbí in ginamu, sin Akuoi in diábí taḷowon in dunia naa!”

YESAYA 41:10

Dika moondok, sin takinan-Kubí in iko, dika moḻia-ḻiaw in gina, sin Akuoi in ki Allahmu. Iko in irigonan-Ku bo tuḷungan-Ku, Ḻima-Ku inta moroton in pokapit-Ku.

TESALONIKA 2 3:16

Ki Tuhanbí tua in pangkoi in kobiagan naton motompia. Poigumon mako umuran in Sia mobogoi kon i monimu in kobiagan motompia bo moonow kon bayongan in yagi-yagi. Bo igumon doman mako sinbá ki Tuhan in umuran moyotakin monimu komintan.

KOLOSE 3:15

Pakédon in dodamean inta inogoi i Kristus, sinbá kawasaan-Neadon in ginamu, sin tuabí in mangaḻe pinogoinían kon i monimu motobatú kon awak, bo umuranbí posukur kon i Allah.

TIMOTIUS 2 1:7

Sin Roho inta inogoi i Allah kon i naton in deemanbí bá moondok in kita, táe Rohobí inta mobogoi in ropot bo mopuḻing in tabi bo mokotahang kon gina in kita.

SURAT I PAULUS KON JAMAAT RUM 15:13

Poigumon mako kon i Allah, inta tampat pohoharapan monimu, sinbá Sia in mobogoi kon i monimu in gina mosanang bo kobiagan motompia sin moiko in mopirisaya kon i-Nia. Poigumon doman mako sinbá moiko in umuran kawasaan in Roho i Allah, sahingga in modugangdon moḷoben in harapan monimu kon i Allah.

PINOGIAPAN 6:26

Poigumon mako ki Tuhan motabi kon i monimu bo mobogoi kon i monimu in kobiagan modame.

SURAT I PAULUS KON JAMAAT RUM 8:6

Aka raian monimu kinawasa in ibog in awak naa, dá popatoibí in mouḻí. Táe aka raianmu bo kinawasa in ibog in Roho i Allah dá mouḻímubí in kobiagan bo iko mobiag motompia takin i Allah.

YEREMIA 1:8

Dika moondok kon i monia, sin Akuoi in moyotakinmu bo moḷukad kon inimu. Akuoi ki Tuhan ain nosingog!”

GALATIA 5:22

Tongá intau mita inta kinawasa in Roho i Allah, yo nanaabí in aidan monimu: Oyúon totabian, umuran mosanang in gina bo moonow in gina, oyúon kasabaran, mopia in gina, umuran mopia kon tumpaḷa intau, motoindudui,

MAZMUR 29:11

Igumon mako ki Tuhan mobogoi in ropot kon umat-Nea, bo nopomia kon i monia mobiag motompia.

SURAT I PAULUS KON JAMAAT RUM 5:1

Tanaa kita in noyodamedon bui takin i Allah, sin kita in mopirisaya. Tuamai in koḻigai bá mobiag in kita kon bonu in dodamean takin i Allah inta podoyon kon pirisaya naton kon i Tuhan naton ki Yesus Kristus.

YOHANES 14:1

“Donaai mohawatir in ginamu,” guman i Yesus kon i monia. “Popirisayadon kon i Allah, bo popirisaya kon i-Nakó doman.

YESAYA 9:6

Sia in momarenta saḷaku datu buí i Daud, kawasaannea totok in moḷoben. Butánea in umuran modame bo mobiag mooyúon; pomarentaannea in pinodoyon kon hukum bo koadilan tanaa mako modapot in mononoi. Ki Tuhan Inta Totok in Mokawasa notantúbí kon mogaid kon tua.

MAZMUR 112:7

Sia in diábí moondok in motarima kon habar diá mopia, ginanea in morotonbí popisí in mopirisaya kon i Tuhan.

SURAT I PAULUS KON JAMAAT RUM 5:10

Sin tungkuḷpa in nobaḻí saturu i Allah in kita, kita pinoyodamedon takin-Nea inta pinodoyon kon kinopatoian i Adí-Nea, apa doman in tanaa naonda in hubungan naton takin i Allah notompiadon bui, tantú kita in posaḷamatonbí doman bui pongin kinobiagan i Kristus.

YOHANES 20:21

Bo ki Yesus in noguman kon i monia bui, “Salam dodamean bo kobiagan motompia kon i monimu. Ná ki Amá nopotabá kon i-Nakó, yo natua doman in Akuoi mopotabá kon i monimu.”

MAZMUR 56:11

Akuoi in modayow kon i Tuhan Allah, popisí in onu inta pinodandi-Nea.

MAZMUR 91:5

Iko in dika moondok kon anib kon dodai in doḷom, andeka daḻí tubuon kon dodai in singgai;

KOLOSE 1:20

Bo Sia doman tua inta pinaké i Allah namangoi nopoyodame kon bayongan in yagi-yagi takin-Nea, inta kon butá ande kon soroga. Tua in pinomia i Allah pinodoyon kon kinopatoian i Adí-Nea kon kayu pinoyotaḻempang.

SURAT I PAULUS KON JAMAAT RUM 1:7

Tuamai in akuoi in nomais kon surat kon i monimu. Poigumon mako kon i Allah inta ki Amá naton bo ki Tuhan Yesus Kristus mobogoi in barakat bo kobiagan motompia kon i monimu.

YESAYA 54:13

Bayongan in intaumu mobaḻí murí-Ku, mosia in mobiag mooyúon bo motompia.

MAZMUR 85:10

Totuu, Sia in moibogbí moposaḷamat kon intau inta modagin kon i-Nia, ki Allah inta moḷantud in mogutunbí kon butá naton.

MAZMUR 56:3

Kinoouput in singgai akuoi iyunta-yuntai in saturuku; mobayongbí in mosaturu kon inakó, o Allah Inta Totok in moḷantud.

YOHANES 20:19

Kon singgai doman in Diminggu tatua, naonda in nodoḷomdon, murí mita i Yesus noyosipun kon baḷoi tobatú bo kinunsían monia komintan in ḷoḻingkop, sin moondok kon intau mita in Yahudi. Táe ki Yesus in baḷúbí noisindog magí kon yua-yuak monia bo noguman, “Salam dodamean bo kobiagan motompia kotaki-takin monimu.”

TESALONIKA 2 1:2

in umuran mopoigum mako in doa sinbá ki Allah ki Amá naton bo ki Tuhan Yesus Kristus mobogoi in barakat bo kobiagan motompia kon i monimu komintan.

OUMAN IN RASUL MITA 10:36

Pirman inta pinoki poyaput-Nea kon intau mita Israel, tuata in Habar Mopia inta nopotaau in dodamean inta inaidan i Yesus Kristus, Tuhan in bayongan intau.

LUKAS 2:14

“Dinayo-dayowdon in ki Allah kon tampat inta Totok in Moḷantud! Bo dodamean umuran kotaki-takin monimu, intau inta umuran mogaid kon mokosanang kon gina i Tuhan!”

LUKAS 1:79

natua in Sia monimbayag kon bayongan intau inta nobiag kon sindip bo inta umuran moondok. Sia in nodia kon i naton mayá mongin daḷan inta mopobayá in tampat inta mopia.”

IBRANI 13:20

Ki Allah in nomiagdon bui kon i Yesus Kristus Tuhan naton nongkon kinopatoian-Nea. Popisíbí in popatoi-Nea tatua, dá masai naa Sia in nobaḻídon Gombala Momulia kon i naton inta domba-Nea mita. Kinopatoian-Nea tatua in noposah bidon kon dodandian mononoi inta inaidan i Allah takin inaton.

OUMAN IN RASUL MITA 18:9

Kon doḷom tobatú ki Paulus nokoontong kon tobatú oontongon, ki Tuhan in namangoi kon inia bo noguman nanaa, “Dikabí moondok! Umuran popotaau in Habar Mopia, dika tongá kibio-biómai.

MATIUS 10:26

“Manangka intua donaaidon moiko moondok kon i monia. Sin diábí in tobatúmai inta noiḻingkop, in diá bukatan, bo diábí doman in tobatúmai inta noibuni in diá popotaau.

YESAYA 55:12

Moiko in monaḷámai kon Babel takin pia in gina, bo inatod iḻumuai takin nosaḷamat. Buḷud bo tombuḷudnea in moḷunganga bo morogiow, pangkoi in kayu mita kon gobá in mononggoḷokap.

MAZMUR 27:1

Mazmur i Daud. Ki Tuhan in sindarku bo kasaḷamatanku, diábí in koondokku. Ki Tuhan in nobaḻí benteng pogogadopanku, diábí in akuoi mourot.

WAHYU 2:10

Dikabí moondok kon yoyiga inta diádon moonggot in musti korasaan monimu. Pokotorop, oyúon in tongonumai intau kon sigad monimu in potuoton Ibilis kon bonu in ponjara sin mosoba kon i monimu. Moiko in mokorasa kon yoyiga kon bonu in mopuḷú nosinggai. Táe kotoinduduibí tantú in moiko kon i-Nakó modapot in matoi, dá moiko ogoian-Ku in kobiagan mononoi saḷaku tombuinag sin nountungdon.

WAHYU 1:4

Utat mita inta kon pitu nojamaat kon daerah in Asia! Akuoi, ki Yohanes, mopoigum mako sinbá moiko in ogoian i Allah in barakat bo kobiagan motompia--tuata in ki Inta oyúon, bo inta koyongandon oyúon, bo inta umuran oyúon, bo nongkon roho pitu inta kon tayowonmai in tampat pomomarentaan i Allah,

IBRANI 7:2

Dá ki Melkisedek in inogoian i Abraham in mopuḷú noporsen nongkon bayongan inta nouḻínea kon pinoparangan. Tangoi Melkisedek naa, mangaḻenea: “Datu Moadil” muna-munamai; bo lantaran sia nongkon Salem dá tangoinea sinomangaḻean doman: “Datu Dodamean”.

YOHANES 20:26

Naonda in todiminggu noiduduimai kon tua, murí mita i Yesus noyosipun bui kon tua, ki Tomas in oyúon domandon kon tua noyotakin monia. Komintan kinunsían monia in ḷoḻingkop, táe ki Yesus in namangoi bo sinimindog kon yua-yuak monia bo noguman, “Salam dodamean bo kobiagan motompia kotaki-takin monimu.”

YEHEZKIEL 2:6

Táe iko, ei intau inta ilo-ilow, dikabí moondok kon momomarontak mita tatua, andeka kon onukadon in singogon monia. Mosia in monayowbí bo moningkuḻe kon inimu, modapot in iko in naonda bo nobiag kon yua-yuak in bambau. Umpaka natua, yo dikabí moondok.

MAZMUR 28:3

Dikabí moyompat kon inakó poyotakinon in intau moromú, moyotakin in intau inta nogaid kon inta moraat. Mopia in potosingog monia, táe gina monia in nopuḻing in moraat.

DANIEL 4:1

Naadon in palakat i Datu Nebukadnezar inta pinoki dianea kon intau mita nongkon bayongan in bangusa, inanakan bo singog kon sinangkub in dunia: “Salam kobiagan motompia!

AMSAL 3:25

Dika bidon in iko moondok kon bodito inta modaḻí moiangoi naonda bo deḷang, bo mondumpak kon intau moraat.

WAHYU 21:8

Táe intau mita inta ondokon, mosia inta diá mosatia, intau moromú, moḷoḻimod, intau mokotor, intau mongonggaing, mososumba kon berhala bo komintan intau mouboḷ, toko pogambat kon bonu in dagat tuḷú bo balerang inta kodoko-dokot, tuata in popatoi inta induanea.”

GALATIA 6:16

Kon bayongan intau inta umuranpa nokadai kon atorang tatua bo bayongan doman intau inta dinumudui kon ibog i Allah, umuran igumonku mako sinbá ki Allah in mobogoi in kobiagan motompia bo barakat-Nea.

LUKAS 10:5

Bo aka moiko in tumuot kon tobatú baḷoi yo naa in singogon muna, ‘Igumon mako dodamean bo saḷamat kotaki-takin monimu tobaḷoian naa.’

ZAKHARIA 6:13

Siabí tua inta bain moposindog in Baḷoi-Ku bo motarima kon kahoromatan naonda bo datu tobatú, bo sia in momarenta kon rayatnea. Imang tobatú in umapidbí kon inia bo mosia in mogaidon moyotakin takin pia-pia mako.’

YESAYA 57:19

Akuoi in mobogoibí in kobiagan moaman kon bayongan in intau, pinomayá inta nodiug andeka inta noyayú. Akuoi in monompiabí kon umat-Ku.

MAZMUR 72:7

Igumon mako kooadil in modugang kon bonu in wakutunea, bo kororomon in moiḻiu kon tungkuḷ in oyúonpa in buḷan.

LUKAS 12:4

“Pokotorop uḻe yobayat-Ku mita! Dika moondok kon i monia inta tongá motaau moḻimod kon awak, táe onda intua diádon motaau mogaid moiḻiu kon tua.

YESAYA 41:14

Guman i Tuhan, “Dika moondok, Israel, umpaka in iko mointok bo moyangkó. Akuoibí in ki Tuhan inta motuḷung kon inimu, Inta Totok in mokudus, Allah in Israel in mopoposaḷamatmu.

DANIEL 6:25

Onda intua ki datu nomarenta kon intau sinbá modomok kon intau mita inta ain nopongadu kon i Daniel. Bo mosia takin ki adí mita bo ki buḷoi mita monia pinogonag kon bonu in angob in singa tatua. Diápa nodapot in mosia kon apad in angob tatua, singa mita tatua ain nodomok kon i monia poḷat nomutuk kon tuḷan mita monia.

YESAYA 12:2

Totuu, ki Allah tua in mopoposaḷamatku, akuoi in mopirisaya kon i-Nia. Akuoi in diábí moondok, sin Sia in moginropot kon inakó. Mopoposaḷamatku in ki Allah, Kon i-Nia in popoyaputanku in dondong.

MAZMUR 11:1

Kon i itoi in mododondong. Mazmur i Daud. Akuoi in noniung kon i Tuhan; diábí in mangaḻenea in moguman kon inakó, “Posaḷamatdon in awakmu naonda bo ḷagapan inta iḷumayug kon buḷud.

AYUB 34:29

Aka ki Allah in monantúdon kon tongá kibio-biómai, diábí tobatúmai in intau mokobaḻí mosingog kon i-Nia. Aka mogadop in Sia, diábí tobatúmai intau in mokouḻí kon i-Nia.

OMBAḶ 3:17

Noonggotdon in akuoi in diá nokorasa kon kobiagan mopia; kinoḻiongankudon mongo naonda in porasaan moḷunganga.

MAZMUR 72:2

Igumon mako sia in mohakim kon umat-Mu podudui in hukum, bo mopoaid in inta moadil kon intau inta dinorot.

TAWARIKH 2 20:30

Tuamai in ki Yosapat nomarenta takin pia, bo ki Tuhan in nobogoi kon inia in kaadaan dame kon bayongan in butá.