YOHANES 13:34 - Alkitab Singog In Mongondow Masa In Tanaa

³⁴ Akuoi in mobogoi in parenta mobagu kon i monimu: Moiko in mustibí mositabian tobatú bo tobatú. Ná Akuoi motabi kon i monimu, dá moiko in musti mositabian doman natua.

YOHANES 13:34 Referans Kwoze

EPESUS 5:2

Kobiagbí takin oyúon tabi, ná ki Kristus motabi kon i naton. Sia in nopokuruban in kobiagan-Nea kon i naton bo nobaḻí tobatú sosumba inta totok in mobondu bo inta mokosanang kon gina i Allah.

IMAMAT 19:18

Dika mopotuḻí in yaat in ginamu bo dika moyaat in gina kon intau ibanea, táe kotabibí in tumpaḷa intau ná kototabimu kon awakmu tontaní. Akuoi in ki Tuhan.

YOHANES 15:17

Naadon in parenta-Ku kon inimu: Moiko in musti umuran mositabian tobatú bo tobatú.”

PETRUS 1 1:22

Popisí in moiko bo umuran dinumudui kon onu inta sinundú i Allah, dá tabidon in nondarit kon i monimu sahingga in totu-totuudon in moiko motabi kon intau mita inta tumpaḷa mopirisaya kon i Kristus. Pogumanku bui, totu-totuudon positabian in moiko kon tobatú bo tobatú takin gina motuḻid.

GALATIA 6:2

Mosituḷungan aka mokoontong kon roriga ande oaidan in intau ibanea, sin aka tua in aidan monimu yo dinumuduidon kon parenta i Kristus in moiko.

YOHANES 1 3:23

Naa in pinarenta-Nea kon i naton: Kita in musti mopirisaya kon i Adí-Nea, tuata in ki Yesus Kristus, bo kita in musti umuran mositabian, ná inta ain pinarenta i Kristus kon i naton.

YOHANES 1 4:21

Tuamai, naa in parenta inta inogoi i Kristus kon i naton: Ki ine in motabi kon i Allah yo musti motabi kon i utatnea doman.

YAKOBUS 2:8

Moiko in mogaid kon inta moitutui, aka aidan monimu in hukum inta totok in moponting inta pinais kon bonu in tontagá in Buk Motusi nanaa: “Kotabibí in tumpaḷa intau ná kotabimu kon awakmu tontaní.”

TESALONIKA 1 3:12

Bo igumon doman mako nami kon i Tuhan bá moiko in umuran mositabian bo oyúon doman in tabi monimu kon tumpaḷa intau, sahingga in tabi monimu in kodugang-kodugangdon ná tabi nami kon i monimu.

SURAT I PAULUS KON JAMAAT RUM 12:10

Utat mita, moiko in musti umuran mototabian tobatú bo tobatú naonda bo mogutat motoḷuadí kon tombonu in baḷoi, bo mosiunaan mohoromat.

YOHANES 2 1:5

Tuamai, Iná poigumonkudon totok sinbá kita komintan in umurandon mositabian. Onu in pinogumanku tanaa in deemanbí parenta mobagu; parenta tanaa ain bidon inogoi kon i naton wakutu in kita bagupa nopirisaya.

GALATIA 6:10

Dá tuamai kon dodai in oyúonpa in kasampatan naton, yo koḻigai in kita sinbá mogaid kon inta mopia kon bayongan in intau, muna-munamai kon i utat mita naton inta mopirisaya kon i Tuhan Yesus.

YOHANES 1 3:11

Nongkon pinomangkoianmai habar tanaa ain pinotaau kon i monimu: Kita in musti mositabian tobatú bo tobatú.

IMAMAT 19:34

Baḻí in mosia ná intau mita tobangusamu bo kotabidon in mosia ná kototabi monimu kon awak monimu tontaní. Toropdon kon moiko tontaní nokoimontan doman nobiag nobaḻí intau ango-angoi kon butá in Mesir. Akuoi in ki Tuhan Allahmu.

IBRANI 13:1

Moiko in musti umuran mositabian saḷaku intau mita in Keresten inta mogutat.

TESALONIKA 2 1:3

Nobaḻí bidon kowajiban nami mopoyaput in sukur kon i Allah lantaran moiko. Oo patusbí intua aidan nami sin pirisaya monimu kon i Kristus in tantú kodugang-kodugang bo tabi monimu kon tumpaḷa intau in moḷoben domandon.

GALATIA 5:22

Tongá intau mita inta kinawasa in Roho i Allah, yo nanaabí in aidan monimu: Oyúon totabian, umuran mosanang in gina bo moonow in gina, oyúon kasabaran, mopia in gina, umuran mopia kon tumpaḷa intau, motoindudui,

PETRUS 2 1:7

Bo aka mobiag podudui in ibog i Allah yo musti intompodan in tabi kon i utat mita inta tumpaḷa mopirisaya kon i Allah bo tabi doman kon bayongan intau.

GALATIA 5:6

Sin aka kita bo ain notobatú takin i Kristus Yesus, yo soaḷ sunaton ande diá sunaton, diábí mobaḻí soaḷ kon i naton. Sin totok moponting in pirisayabí kon i Kristus bo tua in moniata kon tabi naton kon tumpaḷa intau.

YOHANES 17:21

Akuoi in mopoigum Amá sinbá mosia komintan in motobatúdon, ná ki Amá notobatú takin-Ku bo Akuoi in notobatú doman i Amá; sinbá mosia in motobatú doman takin Naton sinbá dunia in mopirisaya kon Ikobí inta ain nopotabá kon i-Nakó.

MAZMUR 119:63

Akuoi in noyobayat in bayongan in intau inta motoguondok, bayongan in intau inta nogaid kon parenta-Mu,

MAZMUR 16:3

Ihoromatku in intau mita motusi kon butá tanaa; inta mokosanang kon ginaku in mogutunbí takin i monia.

MATIUS 5:44

Táe tanaa Akuoi in moguman kon inimu: kotabibí in saturumu bo sambayangaidon in mosia inta nomogutú kon inimu,

SURAT I PAULUS KON JAMAAT RUM 13:8

Donaaidon monomboḻi kon onuka kon inekabí, táe moiko in musti mototabian. Sin intau inta motabi kon tumpaḷa intau, sia tua ain dinumudui kon bayongan hukum i Musa.

SURAT I PAULUS KON JAMAAT RUM 13:10

Intau inta motabi kon intau ibanea, yo diábí in sia mopoaid in moraat kon intau tatua. Manangka intua intau inta motabi kon tumpaḷa intau, sia tua in dinumuduidon kon bayongan inta ain pinarenta kon hukum i Musa.