YOHANES 12:42 - Alkitab Singog In Mongondow Masa In Tanaa

⁴² Umpaka natua, nobayongbí in intau, nodapot in oyúon in itoi mita in Yahudi in nopirisayadon kon i Yesus. Táe mosia in diá mokobaḻí in mongaku taran-tarangan, sin moondok dikabo diádon ogoi intau in Parisi in mosia tumuot kon baḷoi pososambayangan.

YOHANES 12:42 Referans Kwoze

YESAYA 51:7

Indongogaidon in Akuoi ei bangusa-Ku, kinotaauanbí monimu onu in totuu; totundú-Ku in noitagú kon bonu in ginamu. Dika moondok aka moiko singkuḻeon in intau, dika moḻia-ḻiaw in gina aka moiko singkuḻeon monia.

YOHANES 9:22

Guyanganea in noguman natua sin moondok in mosia kon itoi mita in Yahudi; sin mosia ain noyopakat kon intau inta mongaku kon ki Yesus tua in Datu Mopoposaḷamat, diádon motaau in tumuot kon baḷoi pososambayangan.

YOHANES 7:13

Táe diá in tobatúmai intau in mokobaḻí moguman taran-tarangan soaḷ ki Yesus sin mosia in moondok kon itoi mita intau in Yahudi.

AMSAL 29:25

Moondok kon raian in intau, mokopoangoi kon roriga. Popirisaya kon i Tuhan, dá moamanbí in iko.

MATIUS 10:32

“Ki ine in diá mooyá in mongaku kon tayowon in intau moantó kon sia in dumodudui-Ku, yo sia in ḷabiton-Ku doman kon tayowon i Amá-Ku inta kon soroga.

YOHANES 1 4:15

Ki ine in mopirisaya kon ki Yesus tua in ki Adí i Allah, yo ki Allah notobatú takin intau tatua, bo intau tatua in notobatú domandon i Allah.

YOHANES 1 4:2

Nanaa in tandanea kon i naton monotaau mongo tua in Roho i Allah andeka deeman: Intau inta mongaku kon ki Yesus Kristus in namangoidon in dunia saḷaku intau, yo intau tatua kinawasa in Roho i Allah.

SURAT I PAULUS KON JAMAAT RUM 10:10

Sin takin ginanea, intau in mopirisaya, dá tarimaan i Allah in Sia saḷaku intau inta ain noyodame takin-Nea. Bo bibig in pinakénea nongaku sahingga pinosaḷamat in Sia.

OUMAN IN RASUL MITA 5:41

Rasul mita tatua in nobuidon nongkon sidang agama tatua takin pia in gina, sin kinotaauan bidon monia kon natuabí in mobaḻí dumodudui i Yesus. Patusbí in mosia motarima kon singkuḻe lantaran ki Yesus.

YOHANES 19:38

Noiduduimai kon tua, ki Yusup inta nongkon Arimatea nopoigum kon i Pilatus mogamá kon mayat i Yesus. (Ki Yusup naa in dumodudui Yesus, táe tongá umado-adop sin moondok kon intau mita Yahudi.) Inogoi i Pilatus in onu inta pinoigumnea tatua, dá binayáneadon pinopoponag in mayat i Yesus tatua.

YOHANES 16:2

Moiko in poḷuaionbí nongkon baḷoi mita in pososambayangan. Bo moiangoibí in wakutunea kon intau inta moḻimod kon i monimu in mosangka kon sia tua in dinumuduibí kon parenta i Allah.

YOHANES 12:11

Sin siadon in nokopopisí kon nobayongdon in intau Yahudi in nonaḷámai kon i monia bo nopirisayadon kon i Yesus.

YOHANES 11:45

Nobayong in intau Yahudi inta namangoi nohibur kon i Maria in nopirisayadon kon i Yesus naonda in nokoontong kon onu inta nobaḻí tatua.

YOHANES 9:34

Dá tubag monia kon inia, “Onu? Iko inta nopuḻing in dosa nongkon noilahirpamai, iko in moibog motundú kon inami?” Dá mulaidon singgai tuata sia in diádon inogoi monia sinumuot kon baḷoi pososambayangan.

YOHANES 3:2

Kon doḷom tobatú, sia in namangoi kon i Yesus bo noguman, “Pak Guru, kinotaauan nami kon ki Amá in pinotabábí i Allah. Sin diábí in tobatúmai intau in motaau mogaid kon soaḷ mita inta mokoherang ná inta pinomia i Pak Guru aka ki Allah diá kotaki-takinnea.”

LUKAS 12:8

“Torop kopira in naa: Intau inta moibog mongaku kon tayowon intau moantó kon sia in dumodudui-Ku, Sia in akúon doman in Adí Intau kon tayowon in malaekat mita i Allah.

LUKAS 6:22

Pia in kamang in moiko aka moiko sinaturu, diá sinarima, siningkuḻe bo pinoponapudan doman in uboḷ, sin popisí in moiko dumodudui i Adí Intau!

YESAYA 66:5

Indongogaidon onu in pinoguman i Tuhan, ei moiko inta moondok bo motoindudui kon i-Nia, “sin moiko in motoindudui kon i-Nakó, oyúon in kon sigad in bangusamu inta morongó kon i monimu, bo doí moyobayat monimu. Mosia in mopoyagi-yagimai kon i monimu pongin moguman, ‘Pomayádon mako in ki Tuhan mopoontong in kamuliaan-Nea, sinbá kami in mokoontong kon ḷunganga in ginamu.’ Táe mosiadon tontaní in bui mooyá.

YESAYA 57:11

Ki Tuhan in noguman, “Ki ine in dewa mita tatua inta nopobaḻí kon i monimu moondok, dá moiko in monguboḷ bo diádon mokotorop kon i-Nakó? Eta degá moiko in diádon mosumba kon i-Nakó popisí in Akuoi noonggot totok in kibio-biómai?

YEREMIA 38:19

Ki Datu in notubag, “Moondok in akuoi kon intau mita bangusa naton inta ain noḷagui bo dinumotá kon intau in Babel. Dika-dika akuoi ogoi kon i monia bo sikisaan.”

LUKAS 23:13

Ki Pilatus in nosipun kon imang mita itoi, bo itoi mita intau in Yahudi, bo rayat,

YOHANES 7:31

Nobayong in kon sigad monia tua in nomangkoidon mopirisaya kon i-Nia, bo noguman, “Aka Datu Mopoposaḷamat tua in mamangoi, yo degá Sia mokoaid kon mobayo-bayong in inta mokoherang mita nongkon Intau tanaa?”