YESAYA 64:3 - Alkitab Singog In Mongondow Masa In Tanaa

³ Nokoimontandon in Iko nopoontong in oaid-Mu inta motoyang, inta diábí sinangkamai nami. Iko in noponag, bo kon tayowon-Mu buḷud mita modandú.

YESAYA 64:3 Referans Kwoze

HABAKUK 3:3

Iko in ki Allah Inta Totok in motusi namangoi nongkon Téman, Iko in namangoi nongkon buḷud in Paran. Ḷangit kinokoḷoban in koagung-Mu; butá nopuḻing in dodayow kon ini-Mu.

MAZMUR 106:22

Totuu motoyang in aid-Nea mita kon butá tatua, mokotongaw onu in inaidan-Nea kon Dagat in Gelagah.

MAZMUR 66:5

Angoidon bo indoiaidon in aid i Allah, totuu mokotongaw in bayongan inta inaidan-Nea kon sigad in intau!

MAZMUR 66:3

Pogumandon kon i Allah, “Totuu mokoherang onu in inaidan-Mu! Musung tumungkud kon ini-Mu takin iḻibutan in ondok, sin totuubí moḷoben in kawasa-Mu.

ULANGAN 10:21

Dayowdon in Sia sin Sia in ki Allahmu. Moikodon tontaní in nokoontong kon onu in pinomia-Nea inta motoyang bo mokoondok inta pinomia-Nea sin motuḷung kon i monimu.

HABAKUK 3:6

Aka Iko tumogon, moḷundan in butá; aka Iko mobobui, yo modoḻiok in bangusa mita. Buḷud mita inta mononoi in mobota-botak; tombuḷudpa mita inta mononoi in umompábí doman, kon tombuḷud mita tatuata Iko in mayá nongkon dungkuḷpabímai.

YESAYA 64:1

Berakdon in ḷangit bo poponagdon, o Tuhan, baḻídon in buḷud mita modandú kon tayowon-Mu,

MAZMUR 76:12

Intompodaidon in dandimu kon i Tuhan Allahmu. Bayongan bangusa inta nogutun kon diugmai in modia kon sosumba kon i Allah inta kinoondok.

MAZMUR 68:8

O Allah, kon tungkuḷ in kinapit-Mu in umat-Mu minayá nongin rawang inta noingkag,

SAMUEL 2 7:23

Kon dunia naa in diábí in bangusa ná Israel. Tongábí Israel tuata in bangusa inta ain pinoḷuat-Mu nongkon pinononggataan sin mobaḻí umat-Mu tontaní. Bayongan in aid moḷoben bo inta mokoherang inta pinomia-Mu kon i monia, mopobaḻí kon tangoi-Mu ponango-nangoian kon dunia. Bangusa mita ibanea takin dewa mita monia aindon inuntun-Mu kon tungkuḷ in umat-Mu minayá noparang.

ULANGAN 4:34

Dodai in onda in oyúon in ilah tobatú inta nobarani nogamá kon bangusa tobatú nongkon bangusa mita inta oyúon bodongka binaḻí umatnea tontaní, ná inta inaidan i Tuhan Allahmu kon inimu kon Mesir? Inontongdon monimu tontaní naonda in ki Allah takin ropot inta moḷoben nopoangoi in bodito bo parang, nomia kon inta mokoherang mita bo nomia kon soaḷ mita inta motoyang totok.

IḶUAIAN 34:10

Ki Tuhan noguman kon i Musa, “Tanaa mako Akuoi momiadon kon dodandian takin bangusa Israel. Kon tayowon mata monia Akuoi mogaid kon inta mokoherang mita inta diápa dodai onda inaidan kon sigad in bangusa inta kon ondaka in kon dunia naa. Bayongan bangusa in mokoontong kon soaḷ mita mokoherang inta pomiaan-Ku, sin Akuoi, ki Tuhan in momiabí kon tobatú oaidan inta motoyang kon i monimu.

YESAYA 5:25

Ki Tuhan in sinumorú kon bangusa-Nea. Sia in nosadiadon kon mohukum kon i monia. Buḷud mita in modandú, mayat mita posiyayit naonda bo apat kon daḷan. Táe ki Tuhan in sinumorúpabí bo tantúbí mohukum.